- Tuesday, 17 July 2012 02:32
សៀមរាបៈ ក្រុមហ៊ុនថៃដែលគ្រោង សាងសង់ ទំនប់វារីអគ្គិសនីសាយ៉ាប៊ូរី នៅប្រទេស ឡាវនៅមិនទាន់សាងសង់ទេ រហូតដល់ការសិក្សា ពីផលប៉ះពាល់ បរិស្ថាននៃទំនប់នោះ ទៅលើទន្លេមេគង្គ បញ្ចប់។ នេះបើតាមសម្តីរបស់លោកស្រី នាយករដ្ឋមន្ត្រីថៃ យីងឡាក់ ស៊ីណាវ៉ាត្រា ដែលបានថ្លែង កាលពីថ្ងៃសុក្រសប្តាហ៍ មុន។លោកស្រី យីងឡាក់ បានបញ្ជាក់ជាថ្មី ពីការតាំងចិត្តចំពោះការសិក្សានេះ ដែល ប្រទេស ក្នុងគណៈកម្មាធិការទន្លេមេគង្គ (MRC)រួមមានប្រទេស កម្ពុជា ឡាវ ថៃ និងវៀតណាម បានឯកភាពគ្នាពីខែធ្នូ ថា ត្រូវធ្វើមុនពេលការសាងសង់នោះត្រូវចាប់ផ្តើម។
លោកស្រី យីងឡាក់ បានថ្លែងក្រោយជំនួបជាមួយនាយករដ្ឋមន្ត្រីកម្ពុជាលោក ហ៊ុន សែន នៅខេត្តសៀមរាបថា៖ «យើងនឹងសិក្សារួមគ្នាទៅលើវិសាលភាពនៃផលប៉ះពាល់នៅដងទន្លេ មេគង្គនិងពិនិត្យមើលថា មានផលប៉ះពាល់អ្វីខ្លះ»។
ប្រទេស វៀតណាម និងកម្ពុជាបានបង្ហាញក្តីបារម្ភចំពោះផលប៉ះពាល់ពីទំនប់នេះទៅ លើសហគមន៍នៅផ្នែកខាងក្រោមទន្លេ បន្ទាប់ពីមានសេចក្តីរាយការណ៍ថ្មីៗនេះថា ក្រុមហ៊ុនថៃ Ch. Karnchang បង្កើនការសាងសង់។
លោក ហ៊ុន សែន ថ្លែងដែរថា លោកប្រើជំនួបប្រជុំពីថ្ងៃសុក្រនេះដើម្បីបង្ហាញក្តីបារម្ភបែប នោះជម្រាបទៅលោកស្រី យីងឡាក់ដែលប្រទេសថៃនឹងទទួលអគ្គិសនីពីទំនប់នោះ៩៥ភាគរយ។
លោកបានថ្លែងថា៖ «លោកជំទាវ យីងឡាក់ បានបញ្ជាក់ថា ទំនប់នោះពុំទាន់សាងសង់ទេ»។
លោក បន្តថា៖ «យើងរីករាយជាមួយដំណឹងនេះ ហើយសង្ឃឹមថា វានឹងផ្តល់ប្រយោជន៍ដល់ទាំងប្រទេសនៅតាមដងទន្លេមេគង្គលើ និងផ្នែកខាងក្រោម»។
ទោះមានសេចក្តីរាយការណ៍កាលពីខែមេសា ថា ក្រុមហ៊ុន Ch. Karnchang បានចុះកិច្ចសន្យាសាងសង់តាំងពីខែមីនាក្តី ក៏ប្រទេសឡាវបានអះអាងថា មានតែការងាររៀបចំបឋមសម្រាប់ទំនប់វារីអគ្គិសនីកម្លាំង ១ ២៦០ មេហ្គាវ៉ាត់នេះប៉ុណ្ណោះ។
លោក តែ ណាវុធ អគ្គលេខាធិការគណៈកម្មាធិការជាតិទន្លេមេគង្គកម្ពុជាថ្លែង នៅថ្ងៃម្សិលមិញថា ឯកអគ្គរាជទូតកម្ពុជាប្រចាំនៅទីក្រុងវៀងចន្ទន៍ ប្រទេសឡាវ ទទួលបានការអញ្ជើញឲ្យទៅពិនិត្យទីតាំងទំនប់សាយ៉ាប៊ូរីនាថ្ងៃ នេះនិងថ្ងៃស្អែក។ លោកថា៖ «ប៉ុន្តែ ខ្ញុំមិនដឹងថាគាត់ទៅឬអត់ទេ»។លោកបន្តថា កម្ពុជានិងវៀតណាមនឹងបន្តព្រាងលិខិតផ្ញើទៅរដ្ឋាភិបាលឡាវ ស្នើឲ្យប្រទេសនេះផ្អាកការសាងសង់សិន។
រដ្ឋមន្ត្រីការបរទេស ឡាវ លោក Thongloun Sisolouth ថ្លែងទៅអ្នកយកព័ត៌មាននៅក្រៅកិច្ចប្រជុំអាស៊ាននៅភ្នំពេញកាលពី ថ្ងៃសុក្រថា ការងារសាងសង់បឋមកំពុងត្រូវបានផ្អាក។ តាមទីភ្នាក់ងាររ៉យទ័រ លោកថ្លែងថា៖ «រដ្ឋាភិបាលឡាវបានសម្រេចផ្អាកការសាងសង់សិន។ យើងត្រូវធ្វើការសិក្សាបន្ថែមទៀត»។
អ្នកស្រី Ame Trandem នាយកកម្មវិធីប្រចាំតំបន់អាស៊ីអាគ្នេយ៍នៃអង្គការទន្លេអន្តរ ជាតិបានថ្លែងថា វាសំខាន់ដែលផលប៉ះពាល់អន្តរព្រំដែននៃទំនប់នោះត្រូវគេសិក្សា សិន មុនពេលសង់។
អ្នកស្រីថ្លែងថា៖ «ក្រុមហ៊ុនមិនដែលយកចិត្តទុកដាក់លើផលប៉ះពាល់លើប្រទេសកម្ពុជា ទេ»។ អ្នកស្រីថា កម្ពុជានឹងប្រឈមធ្ងន់ធ្ងរ បើគម្រោងនេះប៉ះពាល់ដល់ការផ្លាស់ទីរបស់មច្ឆជាតិ។ ក្រុមហ៊ុន Ch.Karnchang មិនអាចទាក់ទងបានទេ នៅថ្ងៃម្សិលមិញ៕ ដោយៈ ជាង សុខា-Shane Worrell (ភ្នំពេញប៉ុស្តិ៍)
