ថ្ងៃទី 31 ខែកក្កដា ឆ្នាំ2012, ម៉ោង 06:08 PM ហេង សុខា
រាជធានីភ្នំពេញ៖ យុវជនម្នាក់ មិនដឹងថា តូចចិត្តនឹងសង្សារបែកចិត្ត ឬក៏មានវិបត្តិនៅក្នុងគ្រួសារទេ បានសម្រេចចិត្តជិះម៉ូតូសេ១០០ ស៊េរី៩៣ ពណ៌ខ្មៅ ទៅលោតទឹកសម្លាប់ខ្លួននៅលើស្ពានជ្រោយចង្វារ តែត្រូវសមត្ថកិច្ចចេញទូកទៅជួយស្រង់ទាន់ពេលវេលា ។
ហេតុការណ៍នេះ កើតឡើងនៅវេលាម៉ោង៣ និង៣០ នាទីរសៀល ថ្ងៃទី៣១ កក្កដា នៅលើស្ពានជ្រោយចង្វារ ។
សាក្សីឃើញហេតុការណ៍ បានឲ្យដឹងថា មុនពេលកើតហេតុ គេឃើញយុវជនរូបនេះ ជិះម៉ូតូឡើងលើស្ពានជ្រោយចង្វារ ក្នុងទិសដៅពីកើតទៅលិច ខណៈទៅដល់លើស្ពានស្រាប់តែលោតពីលើស្ពានសម្លាប់ខ្លួន គាប់ជួនពេលនោះ សមត្ថកិច្ចបានចេញទូកទៅជួយស្រង់ទាន់ពេលវេលា តែយុវជននោះ សន្លប់ស្តូកស្តឹងមិនទាន់ដឹងខ្លួននៅឡើយ ត្រូវបានរថយន្តសាមុយដឹកយកទៅសង្គ្រោះ នៅមន្ទីរពេទ្យកាល់ម៉ែត ។
យុវជនលោតទឹកសម្លាប់ខ្លួននោះ មានឈ្មោះ កែវ ប៊ុនតុល អាយុ២២ ឆ្នាំ មានស្រុកកំណើតនៅភូមិ៦ ឃុំវាលវង់ ស្រុកកំពង់ចាម ខេត្តកំពង់ចាម ស្នាក់នៅផ្ទះលេខ៨៩ ផ្លូវលេខ៦៣ សង្កាត់បឹងរាំង ខណ្ឌដូនពេញ ។
ទាក់ទិននឹងការលោតទឹកសម្លាប់ខ្លួននេះ គេនៅមិនទាន់ដឹងមូលហេតុពិតប្រាកដនៅឡើយទេ ដោយសារយុវជនរូបនោះ សន្លប់ស្តូកស្តឹងមិនទាន់ដឹងខ្លួន ហើយមិនទាន់មានសាច់ញាតិដឹងនៅឡើយ ប៉ុនែ្តបើតាមព័ត៌មានក្រៅផ្លូវការ បានឲ្យដឹងថា ទំនងជាខូចចិត្តនឹងសង្សារមានថ្មី ឬក៏មានវិបត្តិនៅក្នុងក្រុមគ្រួសារទើបធ្វើឲ្យយុវជនរូបនោះដាច់ចិត្ត សម្លាប់ខ្លួន ៕AGKOR THOM
