រាជធានីភ្នំពេញ៖ លោកជំទាវឧកញ៉ាភាព ហៀក ក្រុមប្រឹក្សាភិបាលក្រុមហ៊ុន ជីប ម៉ុង គ្រុប និងលោកឧកញ៉ាលាង ឃុន អគ្គនាយកក្រុមហ៊ុន ព្រមទាំងបុគ្គលិកក្រុមហ៊ុនជីបម៉ុងគ្រុប និងក្រុមហ៊ុនខ្មែរប៊្រូវើរី រួមជាមួយបុគ្គលិកខ្មែរប្រ៊ូវើរីទាំងអស់មានសេចក្តីសោមនស្សរីករាយ បាននាំយកអំណោយសប្បុរសធម៌ជាទឹកប្រាក់ចំនួន៣ម៉ឺនដុល្លារអាមេរិក សម្រាប់ឧបត្ថម្ភដល់មន្ទីរពេទ្យគន្ធបុប្ជា សម្រាប់ទ្រទ្រង់ក្នុងមូលនិធិគន្ធបុប្ជា កាលពីរសៀលថ្ងៃទី៣០ កក្កដា ។
ក្រុមហ៊ុន ជីប ម៉ុង គុ្រប តែងតែចូលរួមចំណែកយ៉ាងសកម្មដល់សង្គម និងរាជរដ្ឋាភិបាល ក្នុងការកាត់បន្ថយភាពក្រីក្រ តាមរយៈការអភិវឌ្ឍន៍ធនធានមនុស្ស តាមរយៈកាកបាទ ក្រហម កម្ពុជា និងតាមរយៈការផ្តល់អាហារូបករណ៍ជាច្រើនដល់សិស្ស និស្សិតក្រីក្រ និងគ្មានទីពឹងឲ្យបន្តការសិក្សានៅសាកលវិទ្យាល័យនានាជារៀងរាល់ឆ្នាំ ។ ដោយក្រុមហ៊ុន ជីប ម៉ុង គុ្រប មើលឃើញពីតម្រូវការនិងកង្វះខាត នៅក្នុងមន្ទីរពេទ្យគន្ធបុប្ជានាពេលបច្ចុប្បន្ននិងពេលអនាគត ជាពិសេសនាពេលសព្វថ្ងៃនេះ នៅក្នុងប្រទេសកម្ពុជាយើងកំពុងជួបប្រទះជម្ងឺថ្មីមានឈ្មោះថា EV-71 កំពុងរាតត្បាតទៅលើកុមារនៅក្នុងប្រទេសកម្ពុជា ហេតុនេះហើយ លោកជំទាវឧកញ៉ា ភាព ហៀក និងលោកឧកញ៉ា លាង ឃុន ព្រមទាំងបុគ្គលិកក្រុមហ៊ុនជីបម៉ុងគ្រុបទាំងអស់ រួមជាមួយបុគ្គលិកក្រុមហ៊ុនខ្មែរប៊្រូវើរីទាំងអស់ បាននាំយកអំណោយសប្បុរសធម៌ជាទឹកប្រាក់ចំនួន៣ម៉ឺនដុល្លារ យកទៅប្រគល់ជូនដល់មន្ទីរពេទ្យគន្ធបុប្ជា។
ក្រុមហ៊ុន ជីប ម៉ុង គ្រុប ជាក្រុមហ៊ុនឈានមុខគេ ក្នុងព្រះរាជាណាចក្រកម្ពុជា ក្នុងការនាំចូល និងចែកចាយនូវសម្ភារៈសំណង់ និងសម្ភារៈបន្ទប់ទឹកគ្រប់ប្រភេទ ។ ក្រុមហ៊ុនមានរោងចក្រផលិតបេតុងលាយស្រេច មានឈ្មោះថា ក្រុមហ៊ុន ជីប ម៉ុង ខនគ្រីត ដែលទទួលបានវិញ្ញាប័ណ្ណបត្របញ្ជាក់ពីគុណភាព ISO 9001:2008 ។
លើសពីនេះទៅទៀតក្រុមហ៊ុនជីបម៉ុង គ្រុប ក៏បានបង្កើតនូវរោងចក្រផលិតស្រាបៀរដ៏ទំនើប និងជាកម្មសិទិ្ធរបស់វិនិយោគិនខ្មែរយើងសុទ្ធសាធមានឈ្មោះថា រោងចក្រផលិតស្រាបៀរ ខ្មែរ ប៊្រូវើរី ដែលផលិតនូវស្រាបៀរកម្ពុជា ។ រោងចក្រនេះ ត្រូវបានវិនិយោគអស់ទឹកប្រាក់ចំនួនប្រមាណ៦០ លានដុល្លារអាមេរិក និងបង្កើតការងារជូនប្រជាជនខ្មែរយើងមានការងារធ្វើដោយផ្ទាល់ចំនួន១៥០០ នាក់ និងដោយប្រយោលចំនួន៥០០០ នាក់ថែមទៀត ។
ក្នុងពិធីប្រគល់អំណោយសប្បុរសធម៌ចំនួន៣ម៉ឺនដុល្លារអាមេរិក ពីលោកជំទាវឧកញ៉ា ភាព ហៀក ប្រធានក្រុមប្រឹក្សាភិបាលក្រុមហ៊ុន ជីប ម៉ុង គ្រុប ប្រគល់ជូនដល់លោក ដេនីស ឡូរ៉ង់ត៍ (DENIS LAURENT ) នាយករងមន្ទីរពេទ្រ និងជាជីវវិទូ (Biologist and Deputy Director )។
នាឱកាសនោះ លោកដេនីស ឡូរ៉ង់ត៍ បានថ្លែងអំណរគុណយ៉ាងជ្រាលជ្រៅដល់លោកជំទាវឧកញ៉ា ភាព ហៀក ដែលផ្តល់ជាថវិកាដល់មន្ទីរពេទ្យគន្ធបុប្ជាសម្រាប់ទ្រទ្រង់ ដល់មូលនិធិគន្ធបុប្ជា ។
លោក ដេនីស ឡូរ៉ង់ត៍ មានប្រសាសន៍ឲ្យដឹងថា មន្ទីរពេទ្យគន្ធបុប្ជាមានសាខាពីរ នៅទីក្រុងភ្នំពេញ និងនៅទីរួមខេត្តសៀមរាប សម្រាប់មន្ទីរទាំងពីរសាខានេះក្នុងមួយឆ្នាំមូលនិធិគន្ធ បុប្ជាចំណាយអស់ថវិការ ៣៥ លានដុល្លារអាមេរិក ជារៀងរាល់ឆ្នាំ ។
លោកបានបញ្ជាក់ផងដែរថា មន្ទីរពេទ្យគន្ធបុប្ជាជាមន្ទីរពេទ្យ ដែលធ្វើការព្យាបាលទៅលើកុមារ ដោយមិនយកប្រាក់ និងមិនប្រកាន់អ្នកមាន អ្នកក្រទេ គឺព្យាបាលដូចគ្នាទាំងអស់ ។ ក្នុងមួយថ្ងៃ មន្ទីរពេទ្យគន្ធបុប្ជាទាំងពីរសាខា ទទួលបានកុមារដែលមានជំងឺគ្រប់ប្រភេទ ជាពិសេសរដូវកាលនេះ ជារដូវកាលជំងឺគ្រុនឈាម ស្របពេលនឹងមានជំងឺ EV-71 កំពុងរាតត្បាតផងនោះ ។ ចំពោះប្រភេទជំងឺ EV-71 នេះ លោកបានបញ្ជាក់ថា នេះមិនមែនជាប្រភេទជម្ងឺថ្មីទេ វាជាជម្ងឺដែលធ្លាប់កើតមាននៅប្រទេសជិតខាងយើងដែរ ។
ទាក់ទិននឹងមូលនិធិគន្ធបុប្ជា លោកបានបន្តឲ្យដឹងទៀតថា កន្លងមក មានសប្បុរសជននាំយកអំណោយមកប្រគល់ជូនជាហូរហែ ក្នុងនោះ មានលោកជំទាវបណ្ឌិត ប៊ុនរ៉ានី ហ៊ុនសែន ប្រធានកាកកបាទក្រហមនាំយកទឹកប្រាក់ចំនួន១ លានដុល្លារអាមេរិក, មូលនិធិបាយ័នដឹកនាំដោយលោកជំទាវ ហ៊ុន ម៉ាណា អគ្គនាយិកាស្ថានីយទូរទស្សន៍ និងវិទ្យុបាយ័ន ចំនួន៣០ ម៉ឺនដុល្លារអាមេរិក, អំណោយពីរាជរដ្ឋាភិបាលកម្ពុជា តាមរយៈក្រសួងសុខាភិបាល ចំនួន១ លានដុល្លារអាមេរិក, ក្រុមគ្រួសារសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជាចំនួន១០ ម៉ឺនដុល្លារអាមេរិក, មូលនិធិពីសប្បុរសជននានាដូចជានិស្សិត កម្មករ បុគ្គលិកធនាគារជាដើម សុរប៧ ម៉ឺនដុល្លារអាមេរិក និងថ្ងៃនេះ លោកជំទាវឧកញ៉ាភាព ហៀក ក្រុមប្រឹក្សាភិបាលក្រុមហ៊ុន ជីប ម៉ុង គ្រុប បាននាំយកថវិកាចំនួន៣ ម៉ឺនដុល្លារអាមេរិក ៕AGKOEWAT