ដោយ ៖ ឡាំ សុធា ថ្ងៃទី 04 កក្កដា 2012ម៉ោង 17:34:25
ខេត្ដសៀមរាប ៖ សមត្ថកិច្ចចម្រុះរបស់ខេត្ដសៀមរាបបានបើកប្រតិបត្ដិការឆែកឆេរទីតាំងលក់ថ្នាំពេទ្យខុសច្បាប់ មួយកន្លែងរបស់ជនជាតិកូរ៉េនៅកណ្ដាល ក្រុងសៀមរាប ដោយបានរកឃើញឱសថមិនប្រក្រតីជាង២ម៉ឺនគ្រាប់ ស្មើនឹង៣៥,៥គីឡូក្រាមត្រូវបានដកហូត និងផាកពិន័យជាប្រាក់៥លានរៀលតាមច្បាប់ស្ដីពីការគ្រប់គ្រងឱសថ ។ការចុះឆែកឆេរទ្រង់ទ្រាយធំនេះធ្វើឡើងកាលពីព្រឹកថ្ងៃទី៤ ខែកក្កដា ឆ្នាំ២០១២ ស្ថិតក្នុងភូមិក្រួស សង្កាត់ស្វាយដង្គំ ក្រុងសៀមរាប ផ្ទះលេខA១៩ តាមបណ្ដោយផ្លូវជាតិលេខ៦ ដែលមានកម្លាំងសហការពីការិយាល័យនគរបាលប្រឆាំងបទល្មើសសេដ្ឋកិច្ចខេត្ដ នាយកដ្ឋានប្រឆាំងបទល្មើសសេដ្ឋកិច្ចក្រសួងមហាផ្ទៃ មន្ទីរសុខាភិបាលខេត្ដ ការិយាល័យនគរបាលអន្ដោប្រវេសន៍ខេត្ដ ក្រោមកិច្ចដឹកនាំបញ្ជាដោយលោកជួន សុបញ្ញា ព្រះរាជអាជ្ញារងនិងជាតំណាងអយ្យការសាលាដំបូងខេត្ដសៀមរាប ។
ក្រុមសមត្ថកិច្ចដែលចុះប្រតិបត្ដិការបានឱ្យដឹងថា ជនជាតិកូរ៉េដែលបើកលក់ឱសថខុសច្បាប់នេះមានឈ្មោះ គឹម ដុងជុល ភេទប្រុស អាយុ៤៨ឆ្នាំ ចូលមកប្រទេសកម្ពុជាដើម្បីរកស៊ី ។ សមត្ថកិច្ចបន្ដថា ទីតាំងរបស់ជនជាតិកូរ៉េនេះ បើកលក់ថ្នាំពេទ្យជាយូរមកហើយ តែមិនមានសមត្ថកិច្ចណាដឹងនោះទេ ទើបគេបើកដំណើរការជាហូរហែររហូតមកដល់ពេលនេះ ។
លោកអនុសេនីយ៍ឯក វ៉ាន់ រិទ្ធ នាយរងការិយាល័យអន្ដោប្រវេសន៍បានឱ្យដឹងថា លោកបានចុះធ្វើកិច្ចការផ្នែករដ្ឋបាលជនបរទេស ស្រាប់តែឃើញទីតាំងមួយនេះមានដាក់តាំងលក់ថ្នាំពេទ្យជាច្រើនមុខ ដោយមានការសង្ស័យលោកក៏បានរាយការណ៍ទៅស្ថាប័នជំនាញដើម្បី ចុះមកត្រួតពិនិត្យ ។
លោកអនុសេនីយ៍ឯក ឡុង សំអឿន នាយផ្នែកនាយកដ្ឋាននគរបាលប្រឆាំង បទល្មើសសេដ្ឋកិច្ចក្រសួងមហាផ្ទៃបានឱ្យដឹងថា ថ្នាំពេទ្យខុសច្បាប់ដែលរក ឃើញនៅក្នុងទីតាំងនេះមាន៤០មុខចំនួន ២០.៥១៧គ្រាប់ ស្មើនឹង៣៥,៥គីឡូក្រាម។
ចំណែកលោកវរសេនីយ៍ទោ សឿន សេន នាយការិយាល័យនគរបាលប្រឆាំង បទល្មើសសេដ្ឋកិច្ចខេត្ដសៀមរាបបានឱ្យដឹងថា នេះជាប្រតិបត្ដិការជោគជ័យ មួយថ្មីទៀតរបស់ក្រុមសមត្ថកិច្ចដែល មានការដឹកនាំដោយតំណាងអយ្យការ ក្នុងការបង្ក្រាប និងឆែកឆេរទៅលើទីតាំង បើកលក់ឱសថខុសច្បាប់របស់ជន បរទេស ហើយបានរកឃើញឱសថដ៏ច្រើន សន្ធឹកសន្ធាប់ដែលមិនមានចុះបព្ជាី និង ទទួលស្គាល់ដោយក្រសួងសុខាភិបាល ។ លោក សឿន សេន បន្ដថា តាមការ សាកសួរទៅលើជនជាតិកូរ៉េរូបនេះបាន ប្រាប់ថា ថ្នាំពេទ្យខ្លះទិញនៅទីផ្សារកម្ពុជា និងមួយចំនួនទៀតនាំយកមកពីប្រទេសកូរ៉េ៉ផ្ទាល់តាមច្រកព្រលានយន្ដហោះអន្ដរ ជាតិខេត្ដសៀមរាប តែសម្រាប់ការ លក់ដូរវិញ គឺសម្រាប់តែក្រុមជនជាតិ កូរ៉េប៉ុណ្ណោះ ។ លោកនាយការិយាល័យ រូបនេះបន្ដថា ដោយសារតែម្ចាស់ទីតាំង ជាជនបរទេសនេះសហការល្អសម្រាប់ សមត្ថកិច្ចប្រតិបត្ដិការទើបផាកពិន័យជា កំហុសលើកទីមួយជាទឹកប្រាក់៥លានរៀល។
ទាក់ទិននឹងករណីនេះលោកជួន សុបញ្ញា ព្រះរាជអាជ្ញារងដែលជាតំណាងអយ្យការបានឱ្យដឹងថា ចំពោះវិធានការត្រូវចាត់ ការបន្ដទៀតនោះ លោកបានប្រគល់ការងារទៅឱ្យស្ថាប័នជំនាញ គឺខាងសុខាភិបាលតើត្រូវមានចំណាត់ការបែបណា? តើត្រូវពិន័យអន្ដរកាលឬមានវិធានការតាមច្បាប់?
លោកស្រី លី វណ្ណៈ ប្រធានការិយាល័យគ្រប់គ្រងឱសថនៃមន្ទីរសុខាភិបាលខេត្ដសៀមរាបបានឱ្យដឹងថា ឱសថដែល រកឃើញថាខុសច្បាប់ទាំងអស់នេះត្រូវបានដកហូត ។ ចំណែកទីតាំងនេះត្រូវ បិទទ្វារជាបណ្ដោះអាសន្នមិនឱ្យដំណើរការតទៅទៀតទេ ហើយចាំបាច់ត្រូវពិន័យ គាត់ទៅតាមច្បាប់ស្ដីពីការគ្រប់គ្រងឱសថផងដែរ ព្រោះនេះជាកំហុសលើកទីមួយ ។ លោកស្រីបន្ដថា បើសិនជាគាត់ចង់បើកធ្វើអាជីវកម្មលក់ឱសថចាំបាច់់ត្រូវបំពេញបែបបទរកអ្នកតំណាងឱ្យបានត្រឹមត្រូវដើម្បីសុំច្បាប់ពីក្រសួងសុខាភិបាល។
ពាក់ព័ន្ធនឹងប្រតិបត្ដិការនេះប្រភពពីមន្ដ្រីនគរបាលបានឱ្យដឹងថា ទីតាំងមួយ នេះខាងសមត្ថកិច្ចគ្រោងនឹងបង្ក្រាប កាលពីរសៀលថ្ងៃទី៣ ខែកក្កដា មកម្ល៉េះ តែការងារនេះត្រូវបានខកខានទៅវិញ ដោយសារខាងតំណាងអយ្យការលោក ហេង ផេង បោះបង់ចោលការដឹកនាំ អនុវត្ដប្រតិបត្ដិការឆែកឆេរ ។ ប្រភព ដដែលបន្ដថា ការអនុវត្ដនាព្រឹកថ្ងៃទី៤ ខែកក្កដានេះ ដោយសារតែមានបញ្ជា ពីលោកឧត្ដមសេនីយ៍ឯក ម៉ក់ ជីតូ ប្រធាននាយកដ្ឋានកណ្ដាលនគរបាលយុត្ដិធម៌ក្រសួងមហាផ្ទៃ ៕អត្ថបទនគរវត្ត