(ដោយ៖អ៊ិន.សាមិត្តប៉ោយប៉ែត)៖ កម្មករអូសទំនិញតាមរទេះបានលើកឡើងអំពីផលលំបាករបស់ពួកគាត់ តែងប្រឈមនឹងការគាបសង្កត់ ពីសំណាក់សមត្ថកិច្ចជាច្រើនស្ថាប័ននៅចំណុចខ្លោងទ្វារប្រាសាទកំពូល៣ គល់ស្ពានមិត្ដភាពកម្ពុជា-ថៃ ច្រកអន្ដរជាតិប៉ោយប៉ែត ពិសេសគឺមន្ដ្រីកាំកុងត្រូល តែម្ដងដែលគាត់បង្ខំឱ្យអ្នកអូសរទេះបង់ប្រាក់ពី២០បាតទៅ៥០បាត បើទោះជាទំនិញទាំងនោះស្របច្បាប់ឬមិនស្របច្បាប់ក៏ដោយ ។
ភាពជាក់ស្ដែង កន្លងមកក៏ដូចជាពេល បច្ចុប្បន្ននេះគេបានឃើញពីទិដ្ឋភាពមន្ដ្រីកាំកុងត្រូលចំនួន៣រូប គឺអនុប្រធាន១រូបឈ្មោះ ស៊ាន ស៊ីណាត និងមន្ដ្រីកាំកុងត្រូល២រូប គឺឈ្មោះ ស៊ាន តារា និងឈ្មោះ វឌ្ឍានា ដែលជាសមាជិកមានវត្ដមានតម្រូវឱ្យអ្នកអូសរទេះចូលបង់ប្រាក់ក្នុង១ថ្ងៃៗមានរាប់រយរទេះ ក្រៅពីនោះនៅមានរទេះដែលមានថៅកែធំៗចាត់ទុកជារទេះដឹកទំនិញជាខ្សែទោះជាមិនបានទូទាត់ប្រាក់ភ្លាមៗ ក៏មន្រ្តីកាំកុងត្រូលនេះអង្គុយរាប់រទេះដើម្បីទៅទូទាត់ប្រាក់នៅពេលល្ងាចជាក្រោយ ។
ទិដ្ឋភាពដែលមន្ដ្រីកាំកុងត្រូលអង្គុយចាំយកប្រាក់ពីកម្មករអូសទំនិញតាមរទេះ គឺជាអំពើមិនថ្លៃថ្នូរនិងផ្ទុយពីគោលការណ៍របស់រាជរដ្ឋាភិបាល ក៏ដូចជាក្រសួងពាណិជ្ជកម្ម ពីព្រោះអគ្គនាយកដ្ឋានកាំកុងត្រូលតែងតែតម្រូវឱ្យមន្ដ្រីកាំកុងត្រូល អនុវត្ដឱ្យបាននូវវិធានការទប់ស្កាត់ទំនិញ ខូចគុណភាព ចំណីអាហារមានជាតិពុល ដើម្បីការពារទៅលើសុខភាពរបស់ប្រជាពលរដ្ឋដែលជាអ្នកប្រើប្រាស់និងបរិភោគ។ ប៉ុន្ដែភាពជាក់ស្ដែង មន្ដ្រីកាំកុងត្រូល ច្រកប៉ោយប៉ែតមានវត្ដមានចាំយកលុយពីកម្មករអូសទំនិញតាមរទេះរថយន្ដដឹក ទំនិញជាងការទទួលខុសត្រូវទប់ស្កាត់ទំនិញខូចគុណភាពនិងចំណីអាហារមានជាតិពុលហូរចូលក្នុងប្រទេស ។
លទ្ធផលកន្លងមក គេបានត្រឹមតែឃើញមន្ដ្រីកាំកុងត្រូលចាប់ស៊ុតមាន់ ទា សាច់មាន់ ជង្គង់មាន់ និងភេសជ្ជៈខូចគុណភាព ចំណីអាហារមានជាតិពុលបន្ដិចបន្ដួច ខណៈដែលឈ្មួញមួយចំនួន មិនបង់ប្រាក់ឱ្យយកមកដុតបំផ្លាញចោល ដើម្បីបញ្ជាក់ឱ្យឃើញថា មន្ដ្រីកាំកុងត្រូលច្រកប៉ោយប៉ែត ក៏ដូចជាសាខាកាំកុងត្រូលខេត្ដបន្ទាយមានជ័យមានវិធាន ការតឹងតែងទប់ស្កាត់ទំនិញខូចគុណភាព និងចំណីអាហារមានជាតិពុលហូរចូលក្នុងប្រទេស ។
ពាក់ព័ន្ធនឹងការរិះគន់ថា វត្ដមានរបស់មន្ដ្រីកាំកុងត្រូលនៅច្រកអន្ដរជាតិប៉ោយប៉ែតអង្គុយចាំយកប្រាក់ពីកម្មករ អូសទំនិញតាមរទេះ និងរទេះដឹកទំនិញខ្សែរបស់ក្រុមហ៊ុន លោក អ៊ុត សុភាព ប្រធានសាខាកាំកុងត្រូលខេត្ដបន្ទាយមានជ័យបានទទួលស្គាល់ និងសារភាពប្រាប់អ្នកយកពត៌មានតាមទូរស័ព្ទកាលពីព្រឹកថ្ងៃទី៤ ខែកក្កដាឆ្នាំ២០១២ថា ជារឿងធម្មតាទេការយកលុយរបស់មន្ដ្រីកាំកុងត្រូលពីកម្មករអូសទំនិញតាមរទេះក្នុង១រទេះ២០ បាតទៅ៣០បាតនោះ ព្រោះរឿងនេះគយ ក៏យកលុយដូចកាំកុងត្រូលដែរ ដើម្បីថ្លៃ បាយ ថ្លៃទឹក ។ លោក អ៊ុត សុភាព បន្ដ ថា បើចំពោះរទេះដឹកទំនិញរបស់ក្រុមហ៊ុនវិញ គេពិតជាមកបង់ប្រាក់ពេលល្ងាចដល់កន្លែងមែនប៉ុន្ដែគេបង់តាមរយៈវិក្ក័យបត្រ បើទោះជាច្បាប់មិនឱ្យយក លុយពីកម្មករអូសទំនិញតាមរទេះពិតមែន តែមន្ដ្រីកាំកុងត្រូលដែលឈរជើង នៅទីនោះមានប្រាក់ខែតិចតួច តើរកប្រាក់ឯណាដើម្បីមកបំពេញតម្រូវការរបស់ខ្លួនដូចជាបាយទឹកដើម្បីធ្វើការនេះជាដើម ម្យ៉ាងទៀតប្រាក់ខែពួកគាត់ ក៏ដូចជារូបលោកជាប្រធានមានចំនួនតិចតួចដែរនោះ។
បើទោះជាលោក អ៊ុត សុភាព លើកឡើងអំពីវត្ដមានរបស់មន្ដ្រីកាំកុងត្រូលថា បានយកប្រាក់ពីកម្មករអូសទំនិញតាមរទេះ និងរទេះទំនិញរបស់ក្រុមហ៊ុនដើម្បី តម្រូវក្រពះ បាយ ទឹក ប៉ុន្ដែលោកប្រធានសាខាកាំកុងត្រូលរូបនេះមិនបានបញ្ជាក់នៅឡើយទេពីភាពទទួលខុសត្រូវក្នុងការ បំពេញភារកិច្ចរបស់មន្ដ្រីកាំកុងត្រូល ត្រូវមានកាតព្វកិច្ចទប់ស្កាត់ទំនិញខូចគុណភាពចំណីអាហារមានជាតិពុល ក៏ដូចជាទំនិញហួសកាលបរិច្ឆេទនៃការប្រើប្រាស់នោះទេ ។ ចំណុចនេះគួរណាស់ តែថ្នាក់ដឹកនាំសិក្សាពីបុគ្គលិកលក្ខណៈរបស់លោកអ៊ុតសុភាព ប្រធានសាខា កាំកុងត្រូលខេត្ដបន្ទាយមានជ័យអនុវត្ដ បែបនេះស្របទៅនឹងគោលការណ៍របស់រដ្ឋាភិបាលដែរឬមួយយ៉ាងណា ។
លោក ម៉ក់ ពេជ្ជរិទ្ធ ប្រតិភូរាជរដ្ឋាភិបាលទទួលបន្ទុកអគ្គនាយកដ្ឋានកាំកុងត្រូលនៃក្រសួងពាណិជ្ជកម្ម អ្នកយកពត៌មានយើងមិនអាចទាក់ទងបានទេកាលពី ព្រឹកថ្ងៃទី៤ខែកក្កដាឆ្នាំ២០១២ ៕knewdaily
