(ដោយ៖អ៊ិន.សាមិត្តប៉ោយប៉ែត)៖ភ្ញៀវជនជាតិចិនចំនួនពីរ បានដេញវាយគ្នាដោយបញ្ចេញក្បាច់គុណ យ៉ាងសាហាវតាមរយៈកណ្ដាប់ដៃ និងជង្គង់ហោះ បណ្ដាលឲ្យភាគីម្ខាងរងរបួសយ៉ាងដំណំប៉ោងមុខខៀវភ្នែក និងម្នាក់ទៀតរងរបួសបន្តិចបន្តួច ការប្រយុទ្ធគ្នានេះ គេសង្ស័យថា ប្រហែលជាចាញ់ល្បែងក្នុងកាស៊ីណូ ហ្គូឌិនក្រោន អស់លុយគ្មាន សល់ក៏កើត ជារឿងពាក់មុខយក្សដាក់គ្នា ហើយក៏ប្រយុទ្ឋគ្នាតែម្ដងទៅ ។ ហេតុការណ៍ដ៏ភ្ញាក់ផ្អើលខាងលើនេះ បានកើតឡើងកាលពីវេលាម៉ោង ១និង០០នាទីថ្ងៃ១៦ ខែកក្កដា ឆ្នាំ ២០១២ នៅចំណុចមុខកាស៊ីណូ ហ្គោលឌិនក្រោន ក្នុងភូមិក្បាលស្ពាន សង្កាត់ប៉ោយប៉ែត ក្រុងប៉ោយប៉ែត ។ សាក្សីដែលឃើញហេតុការណ៏បានប្រាប់ឲ្យដឹងថា មុនពេលកើតហេតុគេឃើញជនជាតិចិនពីរនាក់ចេញពីកាស៊ីណូ ហ្គោលឌិនរួចហើយស្រែកឈ្លោះប្រកែកគ្នាឡើងតឹងសសៃ ក ដាក់គ្នារៀងៗខ្លួន ជាភាសាចិន ដែលមិនអាចស្ដាប់បាន តែគេអាចកាត់យល់ថា ជនជាតិចិនទាំងពីររូបនេះ ប្រហែល ជាចាញ់ល្បែងនៅក្នុងកាស៊ីណូអស់លុយពីខ្លួន ។ ប្រភពបន្តទៀតថា ក្រោយពីជម្លោះឡើងផ្អៀងដីមួយសន្ទុះ រួចមកពួកគេទាំងពីរ ក៏បានបើកឆាកប្រយុទ្ធគ្នាមួយប្រាវ ដោយប្រើកណ្ដាប់ដៃដែក និងក្បាច់ម៉ែចែកអោយ ថ្វីបើមិនល្អមើលដូចភាពយន្តហុងកុងក្ដី ក៏មានភ្ញៀវទេសចរណ៍ជាតិ និងអន្តរជាតិដែលធ្វើដំណើរឆ្លងកាត់ព្រំដែន កម្ពុជា ថៃ ចាប់អារម្មណ៍ នាំគ្នាចោមរោមមើលឆាកប្រយុទ្ធនោះយ៉ាងច្រើនកុះករ ។ ប៉ុន្តែក៏មានភ្ញៀវខ្លះ ឃើញសភាពមិនស្រួល ក៏នាំគ្នារត់គេច ផងដែរព្រោះខ្លាចខ្ទាត់ឈាមប្រឡាក់ត្រូវ ។ ជនជាតិចិនទាំងពីរនាក់នេះ គេពុំអាចស្គាល់អត្តសញ្ញាណបានទេ ខណៈដែលប្រយុទ្ធគ្នារួចហើយ ម្នាក់រត់ចូលទៅក្នុងកាស៊ីណូ ឯម្នាក់ទៀតតាមស្រែកឡាំប៉ា នៅខាងក្រៅកាស៊ីណូហ្គោលឌិនក្រោន ។ ដោយឡែកសមត្ថកិច្ចនៅទីនោះមិនខ្ចីរវល់ ។ មានល្បែងស៊ីសង គឺនាំមកនៅក្ដីវិនាសអន្តរាយ កើតអំពើចោរកម្មផ្សេងៗ និងអំពើអសន្តិសុខក្នុងសង្គមគ្រប់បែបយ៉ាង ប្រជាពលរដ្ឋរស់នៅគ្មានសេចក្ដីសុខឡើយ ។ សូមរំលឹកផងដែរថា នៅតំបន់ជាយដែនក្រុងប៉ោយប៉ែត មានក្រុមហ៊ុនកាស៊ីណូ ចំនួនជាង១០ គ្រប់កាស៊ីណូទាំងនោះ ភាគច្រើនបានបើកដៃ អោយជនជាតិខ្មែរ ចូលលេងល្បែង យ៉ាងភ្លូកទឹក ភ្លូកដី គ្មានការទប់ស្កាត់ ខណៈដែលច្បាប់នៃព្រះរាជាណាចក្រកម្ពុជា បានហាមឃាត់ មិនឲ្យជនជាតិ ខ្មែរចូលលេងឡើយ ៕ |