 |
(ដោយអ៊ិនសាមិត្តប៉ោយប៉ែត)៖ ក្រុមសន្តិសុខដែលជាបុគ្គលិកក្លឹបខារ៉ាអូខេ សាន់ កូ ចំនួនបួននាក់ក្នុងចំណោមបក្សពួក របស់គេជាច្រើននាក់ស្ថិតនៅខាងត្បូងផ្លូវជាតិលេខ៥ ក្នុងភូមិក្បាលកោះ សង្កាត់ប៉ោយប៉ែត ក្រុងប៉ោយប៉ែត ត្រូវសមត្ថកិច្ច ប៉េអឹមឃាត់ខ្លួនបានភ្លាមៗ បន្ទាប់ពីពួកគេ វាយកាប់ចាក់គ្នា ដូចក្នុងរឿងបងតូច បងធំ សង្គមងងឹត នៃភាពយន្តហុងកុងអីចឹង បណ្ដាលឲ្យមានការភ្ញាក់ផ្អើលដល់ ភ្ញៀវដែលកំពុងផឹកស៊ីផ្អើលរត់ចែកជើងគ្នា ។ ការឃាត់ខ្លួននេះគឺធ្វើឡើងកាលពីវេលាម៉ោង០៤ និង០០នាទីថ្ងៃទី៥ខែកក្កដា ឆ្នាំ២០១២ នៅចំណុចក្លឹបខារ៉ាអូខេខាងលើតែម្ដង ដោយសមត្ថកិច្ចឃាត់បានជនសង្ស័យចំនួន បួននាក់ ដែលមានឈ្មោះ ដូចខាងក្រោម ទី១៖ឈ្មោះសូ រិទ្ឋី ភេទប្រុសអាយុ២៤ឆ្នាំ ទី២៖ ឈ្មោះជូន ជូឡាយ ភេទប្រុសអាយុ ២២ឆ្នាំ ទី៣៖ ឈ្មោះ ថាច់ វាសនា ភេទប្រុសអាយុ ២៧ឆ្នាំ និងទី៤៖ ឈ្មោះឃុយ វ៉ាន់លី ភេទប្រុសអាយុ ២៦ឆ្នាំ អ្នកទាំងបួន ជាបុគ្គលិកបម្រើការងារនៅក្នុងក្លឹបខាងលើ ។ លោក ហម ម៉ុត មេបញ្ចាការប៉េអឹមក្រុងប៉ោយប៉ែតបានប្រាប់ថា ដោយមានសេចក្ដីរាយការណ៍ថាមានក្រុមបងតូចបងធំ វ៉ៃកាប់ចាក់គ្នា ផ្អើលពេញខារ៉ាអូខេខាងលើ ខណៈនោះលោកបានបញ្ជាកម្លាំង ឲ្យទៅដល់កន្លែងកើតហេតុ ហើយធ្វើការឃាត់ខ្លួនបានក្រុមជនសង្ស័យចំនួនបួននាក់នៅនឹងកន្លែង យកមកទីបញ្ជាការ ដើម្បីសួរនាំ និងកសាងសំណុំរឿងបញ្ជូនទៅកាន់ទីបញ្ជាការកងរាជអាវុធហត្ថខេត្តបន្ទាយមានជ័យ ដើម្បីដោះស្រាយតាមផ្លូវច្បាប់ ។ ដោយឡែកជនសង្ស័យដែលពាក់ព័ន្ធរឿងវ៉ៃកាប់ចាក់គ្នានេះដែរ នៅសល់មួយចំនួនទៀតដែលកំពុងរត់គេចខ្លួន ត្រូវលោកថៅកែ ក្លឹបបា ខារ៉ាអូខេ សាន់ កូ ឈ្មោះ ជឿន បានលួចលាក់ដោយមិនបញ្ជូនពួកគេឲ្យច្បាប់ដោះស្រាយឡើយ ប៉ុន្តែទោះបីជាលោកថៅកែឈ្មោះ ជឿន ខំប្រឹងលាក់បំពួនឲ្យជនសង្ស័យរត់គេចខ្លួនទៅដល់ជើងមេឃក៏ដោយ គេសង្ឃឹមថា សមត្ថកិច្ច និងតាមដល់ទីបញ្ចប់មិនអនុញ្ញាតឲ្យក្រុមនោះ រស់នៅមានសេរីភាពក្រៅសំណាញ់ច្បាប់បានឡើយ ៕ |
