|
(ដោយ៖អ៊ិនសាមិត្តប៉ោយប៉ែត)៖ ក្រោយពីសមត្ថកិច្ចបើកយុទ្ធនាការចុះបង្ក្រាបមុខសញ្ញាក្រុមចោរវ័យក្មេងៗ ដែលធ្វើសកម្មភាពយ៉ាងសកម្មគាស់ផ្ទះប្រជាពលរដ្ឋ លួចទូរស័ព្ទដៃ និងលួចទ្រព្យសម្បត្តិឡើងកក្រើកតំបន់ជាយដែនខ្មែរ ថៃ រយៈពេលបីថ្ងៃ កងរាជអាវុធហត្ថក្រុងប៉ោយប៉ែតបានក្របួចជនសង្ស័យជាក្រុមចោរបានចំនួន ៥នាក់ និងក្រុមអាជីវករដែលរកស៊ីមិនស្របច្បាប់ចំនួន៣នាក់ផងដែរ ។ នៅរសៀលថ្ងៃទី០៨ ខែកក្កដា ឆ្នាំ២០១២ម្សិលមិញនេះសមត្ថកិច្ចកងរាជអាវុធហត្ថក្រុងប៉ោយប៉ែត បានបង្ហាញមុខជនសង្ស័យដែលជាបក្សពួកចោរចំនួនពីរនាក់បន្ថែមទៀតបន្ទាប់ពីចាប់ខ្លួនបានបីនាក់ កាលពីថ្ងៃទី០៦ កក្កដាកន្លងទៅ ។ ជនសង្ស័យទាំងពីរ មានឈ្មោះដា ណាង ភេទប្រុស អាយុ១៨ឆ្នាំ និងទីពីរឈ្មោះរ៉ន រី ភេទប្រុសអាយុ១៦ឆ្នាំ អ្នកទាំងពីរមានទីលំនៅមិនពិតប្រាកដ មុខរបរជាចោរ ។ ដោយឡែកជនដែលពាក់ព័ន្ធចំនួន៥នាក់ទៀត ដែលជាក្រុមអាជីវកររកស៊ីទទួលបញ្ចាំ និងទិញរបស់ចោរ ក៏ត្រូវសមត្ថកិច្ចឃាត់ខ្លួនផងដែរ ដោយចោទប្រកាន់ពីបទទទួលទិញផលចោរកម្ម ។ ទី១ មានឈ្មោះអ៊ុត ណៃហឿន ភេទស្រី អាយុ៣២ឆ្នាំ ទី២ឈ្មោះហុង លីម៉េង ភេទប្រុសអាយុ២៧ឆ្នាំ និងទី៣ មានឈ្មោះយឿត យួម ភេទប្រុស អាយុ៣៣ឆ្នាំរស់នៅសង្កាត់/ក្រុងប៉ោយប៉ែតខេត្តបន្ទាយមានជ័យ។ លោក ហម ម៉ុត មេបញ្ជាការកងរាជអាវុធហត្ថក្រុងប៉ោយប៉ែតបានថ្លែងថា ក្រុមចោរ និងអ្នកដែល ទទួលទិញផលចោរកម្ម គឺមានទោសដូចគ្នា ហើយក្រោយពីធ្វើការសួរនាំ រួចហើយពួកគេទាំងអស់ ត្រូវបញ្ជូនទៅកាន់ទីបញ្ជាការកងរាជអាវុធហត្ថ ខេត្តបន្ទាយមានជ័យ ដើម្បីចាត់ការបន្តតាមនីតិវិធី ៕ |