ក្នុងញត្តិដាក់ទៅកាន់ស្ថានទូតសហរដ្ឋអាមេរិកនៅថ្ងៃនេះបាន សរសេរថា កម្មករកម្មការិនីរោងចក្រតៃណាន (អតីតរោងចក្រតៃយៀនទី១ ទី២ និងខេមវែល) មានទីតាំងស្ថិតនៅភូមិត្នោតមួយដើម ឃុំបែកចាន ស្រុកអង្គស្នួល ខេត្តកណ្តាល បានធ្វើការទាមទារអស់រយៈពេល៤សប្តាហ៍មកហើយ ចាប់ពីថ្ងៃទី២៥ ខែមិថុនា ឆ្នាំ២០១២ រហូតមកដល់ពេលនេះ នៅពុំទាន់ទទួលបានដំណោះស្រាយសមរម្យឡើយ បន្ទាប់ពីបានដឹងថា រោងចក្រនេះបានប្តូរឈ្មោះ ពីរោងចក្រតៃយៀន ទៅរោងចក្រតៃណាន កាលពីឆ្នាំ២០១០ ដោយនិយោជកពុំបានជូនដំណឹង និងពុំមានការធានាអះអាងអំពីអត្ថប្រយោជន៍របស់ក្រុមកម្មករ ដោយមានន័យថា និយោជករំលោភច្បាប់ការងារ។
ញត្តិបន្តថា នៅថ្ងៃទី០៥-០៦ ខែកក្កដា ឆ្នាំ២០១២ មានជំនួបចរចាមួយក្រោមអធិបតីភាពរដ្ឋមន្រ្តីក្រសួងការងារ ប៉ុន្តែពុំបានដំណោះស្រាយឡើយ។ ហើយនៅថ្ងៃទី១៣ និងទី១៨ ខែកក្កដា ឆ្នាំ២០១២ ក្រោមការសម្របសម្រួលរបស់គណៈកម្មការសម្រាប់ដោះស្រាយបញ្ហាបាតុកម្ម កូដកម្ម នៅតាមគ្រប់មុខសញ្ញា ក៏មិនទទួលបានដំណោះស្រាយដែរ។ ដោយបានបន្ថែមថា នៅព្រឹកថ្ងៃទី១១ ខែកក្កដា ឆ្នាំ២០១២ ពេលតំណាងកម្មករប្រមាណ២០នាក់ដង្ហែញត្តិដាក់ជូននាយករដ្ឋមន្រ្តី កម្ពុជា ត្រូវបានកងកម្លាំងអាជ្ញាធរក្រុងភ្នំពេញបង្រ្កាបដោយហិង្សា បណ្តាលឲ្យមន្រ្តីសហជីពម្នាក់រងរបួសធ្ងន់ និងឃុំខ្លួននៅស្នងការក្រុងអស់ជាច្រើនម៉ោងថែមទៀត ដែលវាគឺជាការរំលោភលើកិច្ចព្រមព្រៀង និងរំលោភសិទ្ធិកម្មករ។
ជាចុងក្រោយតំណាងកម្មកររោងចក្រតៃណាន បានស្នើឲ្យឯកអគ្គរដ្ឋទូតសហរដ្ឋអាមេរិកប្រចាំប្រទេសកម្ពុជាជួយ អន្តរាគមន៍រកដំណោះស្រាយដល់ពួកគេ ព្រោះទីផ្សាររបស់រោងចក្រតៃណាននេះមាននៅសហរដ្ឋអាមេរិក ដូចជាក្រុមហ៊ុន GAP, Levistrauss និង OLANAVY ដែលជាអ្នកទទួលទិញពីរោងចក្រតៃណាន។
ដំណោះស្រាយដែលកម្មកររោងចក្រតៃណានចង់បាននោះរួមមាន ១.សុំឲ្យភាគីនិយោជកផ្តល់ប្រាក់អត្ថប្រយោជន៍តាមច្បាប់ស្តីពីការងារ លើ៥ចំណុច (១៧០ដុល្លារម្នាក់ក្នុងមួយឆ្នាំ)។ ២.សុំឲ្យនយោជកផ្តល់ប្រាក់អត្ថប្រយោជន៍យ៉ាងតិចចំនួន១៣៥ដុល្លារ ម្នាក់ក្នុងមួយឆ្នាំ៕free press