ដោយ ៖ វិច្ឆិកា ថ្ងៃទី 24 កក្កដា 2012ម៉ោង 16:47:55
ខេត្ដបន្ទាយមានជ័យ ៖ សមត្ថកិច្ច ចម្រុះស្រុកអូរជ្រៅមកដល់ថ្ងៃទី២៤ ខែ កក្កដា ឆ្នាំ២០១២ នៅតែបន្ដរុករកក្រុមចោរប្លន់ទូមាសអាជីវករនៅផ្សារគត្ដសត បើទោះបីក្នុងប្រតិបត្ដិការនេះក្រុមចោរបាញ់តដៃជាមួយសមត្ថកិច្ច ហើយឃាត់ខ្លួនជនសង្ស័យបាន៣នាក់ក៏ដោយ ។គួររំលឹកថា កាលពីថ្ងៃទី២៣ ខែកក្កដា ឆ្នាំ២០១២ វេលាម៉ោង៤រសៀល នៅក្នុងផ្សារគត្ដសត ស្ថិតក្នុងភូមិយាងថ្មី ឃុំ កូប ស្រុកអូរជ្រៅ ខេត្ដបន្ទាយមានជ័យ ក្រុមចោរប្លន់ប្រដាប់អាវុធមួយក្រុមបានចូលប្លន់ផ្ទះអ្នកលក់មាស២ ល្វែងជាប់គ្នា ហើយក៏មានការបះទង្គិចដោយអាវុធ ជាមួយនឹងកម្លាំងសមត្ថកិច្ចផងដែរ ។
តាមន្ដ្រីនគរបាលស្រុកអូរជ្រៅ ឱ្យដឹងក្រោយការបះទង្គិចថា សមត្ថកិច្ចកងរាជអាវុធម្នាក់បានរងរបួសដោយគ្រាប់កាំភ្លើងក្រុមចោរ ហើយរថយន្ដសមត្ថកិច្ច ក៏រងនឹងគ្រាប់កាំភ្លើងផងដែរ ។ ក្នុងនោះ អាជីវករលក់មាស ដូរលុយ ត្រូវក្រុមចោរបាញ់គំរាម និងវាយឱ្យរងរបួស គ្រាដែលដណ្ដើមយកថង់មាសពីក្រុមចោរ ។
នៅព្រឹកថ្ងៃទី២៤ ខែកក្កដា លោកអ៊ុន សំអន នាយការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្ដបន្ទាយ មានជ័យ បានឱ្យដឹងថា នៅព្រឹកថ្ងៃខាងលើនេះ សមត្ថកិច្ចនៅតែបន្ដរុករកក្រុមចោរប្លន់ប្រដាប់អាវុធដែលគេសង្ស័យ ថា កំពុងលាក់ខ្លួនក្នុងគុម្ពោតព្រៃមួយកន្លែង ស្ថិតក្នុងភូមិត្រី។ លោកបានឱ្យដឹងដែរថា ជនសង្ស័យក្រុមចោរប្លន់៣នាក់ត្រូវ បានឃាត់ខ្លួនផងដែរកាលពីថ្ងៃទី២៣ ខែកក្កដា នៅក្នុងវត្ដរតននិមិត្ដ ដែលមាន ឈ្មោះទី១- វ័រ រ៉ាវីត ហៅយ៉ៃ ភេទប្រុស អាយុ៤៦ឆ្នាំ ជាជនជាតិថៃ បច្ចុប្បន្នជាអាជីវករលក់ដូរនៅក្នុងផ្សាររុងក្លឿនៃប្រទេសថៃ, ទី២-ង៉ែត ថៃ ភេទប្រុស អាយុ ៣៤ឆ្នាំ មុខរបរអ្នករត់តាក់ស៊ីពីស្វាយស៊ីសុផុនទៅប៉ោយប៉ែត មានទីលំនៅក្នុងភូមិបាលិលេយ្យ សង្កាត់-ក្រុងប៉ោយ ប៉ែត និងទី៣-ឈ្មោះ ញ៉ែម សាមឿន ភេទប្រុស អាយុ៥៥ឆ្នាំ ជាកម្មករបោសសម្អាតនៅហាងយីហោ(អារញមីន) ដែលជាហាងរបស់ជនសង្ស័យ វ័រ រ៉ាវីត ហៅយ៉ៃ ។
លោកនាយការិយាល័យបានឱ្យដឹងថា យោងតាមចម្លើយជនសង្ស័យទាំង៣ នាក់ខាងលើបានឆ្លើយថា មុនពេលសមត្ថកិច្ចឃាត់ខ្លួនពួកគេបានជិះរថយន្ដចេញ ពីក្រុងប៉ោយប៉ែតទៅហូបបាយនៅហាង មួយឈ្មោះយីហោបុកល្មុត នៅក្រុងសេរីសោភ័ណ ហើយពេលធ្វើដំណើរត្រឡប់មកវិញចៃដន្យឃើញគេបាញ់គ្នា ក៏ជិះរថយន្ដគេចចូលទៅក្នុងវត្ដរតននិមិត្ដ ទើបត្រូវសមត្ថកិច្ចឃាត់ខ្លួនតែម្ដង ។
បើទោះបីជាជនសង្ស័យទាំង៣បាន បញ្ជាក់ដូច្នេះក៏ដោយ សមត្ថកិច្ចនៅបន្ដស៊ើបអង្កេត និងសាកសួរជនសង្ស័យទាំង៣ថា តើពួកគេជាដៃជើងក្រុមចោរ ប្លន់ទូមាសខាងលើនេះដែរឬទេ?
មេបញ្ជាការកងរាជអាវុធហត្ថស្រុក អូរជ្រៅលោក ធា ពិសី បានឱ្យដឹងដែរថា នៅពេលប៉ះទង្គិចជាមួយក្រុមចោរ មន្ដ្រីរបស់លោកម្នាក់ឋានៈអនុសេនីយ៍ត្រីឈ្មោះ ព្រឿង សារ៉ាន់ ត្រូវក្រុមចោរបាញ់ត្រូវជើងឆ្វេងបណ្ដាលឱ្យបៀមក្បាលគ្រាប់ ហើយពេលនេះក្រុមវេជ្ជបណ្ឌិត ក្នុងមន្ទីរពេទ្យមិត្ដភាពកម្ពុជា-ជប៉ុន ស្រុកមង្គលបុរីបានវះកាត់យកក្បាលគ្រាប់ចេញ ដែលក្បាលគ្រាប់ជាប្រភេទអាកា៤៧ ។ លោកមេបញ្ជាការបានឱ្យ ដឹងទៀតថា រថយន្ដឡង់គ្រីស័ររបស់លោក បានរងនឹងគ្រាប់កាំភ្លើងអាកា៤គ្រាប់ ៣គ្រាប់ចំកញ្ចក់រថយន្ដមុខក្រោយបែកទាំងស្រុង និង១គ្រាប់ទៀតចំធ្លុះទ្វារ រថយន្ដ ។
គួរបញ្ជាក់ថា នៅថ្ងៃកើតហេតុយោងតាមសាក្សីឃើញហេតុការណ៍ផ្ទាល់ភ្នែក បានអះអាងថា ក្រុមចោរប្លន់ទូ មាសមានគ្នា៤នាក់ ២នាក់ប្រដាប់ អាវុធអាកា និង២នាក់ទៀតកាន់អាវុធខ្លី ជិះម៉ូតូ២គ្រឿងម៉ាកហុងដា និងម៉ាស៊ុយ ហ្ស៊ូគីឃ្លីក ចូលទៅភ្ជង់ប្លន់ប្រមូលយក មាសពីអាជីវករលក់មាសប្ដូរប្រាក់ផ្ទះជាប់គ្នា ហើយខណៈក្រុមចោរប្លន់ជិះ ម៉ូតូចេញប្រហែល១០ម៉ែត្រត្រូវកម្លាំង សមត្ថកិច្ចចម្រុះស្រុកអូរជ្រៅ ស្ទាក់ បាញ់សន្ធាប់ទៅលើក្រុមចោរ ពេលដែល ក្រុមចោរជិះម៉ូតូចេញដល់ច្រកទ្វារផ្សារ។ នៅពេលនោះក្រុមចោរបានផ្ដួលម៉ូតូ រួច បាញ់រះតបតសមត្ថកិច្ចអស់រយៈពេល ១០នាទីធ្វើឱ្យប្រជាពលរដ្ឋ និងអាជីវករ រត់រកកន្លែងសុវត្ថិភាពផងដែរ ។ បន្ទាប់ មកក្រុមចោរប្លន់បន្ដបាញ់រំដោះខ្លួន ប៉ុន្ដែពុំបានយកការ៉ុងមាស ប្រាក់ គ្រឿង អលង្កាកាឡៃទៅជាមួយទេ គឺរត់សំដៅ ចូលក្នុងវត្ដរតននិមិត្ដ។ ស្របជាមួយគ្នា នោះពេលដែលសមត្ថកិច្ចដេញប្រមាញ់ ក្រុមចោតប្លន់ក៏ប្រទះឃើញជនសង្ស័យ៣នាក់ខាងលើ ព្រមទាំងរថយន្ដកាមរី១ គ្រឿងនៅក្នុងវត្ដក៏ឃាត់ខ្លួនដោយសង្ស័យថា អ្នកទាំង៣ជាបក្ខពួកចាំគាំទ្រ និងដឹកជម្លៀសក្រុមចោរប្លន់គេចដោយសុវត្ថិភាព ។
ព័ត៌មានចុងក្រោយជុំវិញការរុករក ក្រុមចោរប្លន់មាស៤នាក់ដែលកំពុងរត់គេខ្លួន ត្រូវបានគេរាយការណ៍ឱ្យដឹងថា ជនសង្ស័យជាចោរប្លន់សមត្ថកិច្ចនៅពុំ ទាន់ចាប់បាននៅឡើយទេ បើទោះបីជាសមត្ថកិច្ចបានប្រើប្រាស់កម្លាំងពាក់ព័ន្ធ ជាច្រើននាក់នៅចំណុចភូមិទួលប្រាសាទ ក្នុងភូមិសាស្ដ្រព្រៃគុក តំបន់អូរនាង សិលាខ្មែរ ទំបន់ដាច់ ជោគជ័យ អូរ៣ជាន់ ក្នុងព្រាវរហូតដល់ព្រៃកាឡឺទា ៕នគរវត្ត