ថ្ងៃទី 13 ខែមិថុនា ឆ្នាំ2012, ម៉ោង 03:43 PM ឈ ភ
ភ្នំពេញ ៖ ព្រឹកថ្ងៃទី១៣ ខែមិថុនា ឆ្នាំ២០១២នេះ ក្រោយជំនួបរវាងសម្ដេចនាយករដ្ឋ មន្ដ្រី ហ៊ុន សែន និង លោក ហ៊ឺ គួឈាង មក មានពិធីចុះហត្ថលេខា ឯកសារសំខាន់ៗ ចំនួន៤ ក្នុងនោះក៏មានការចុះហត្ថលេខា ស្ដីពីការផ្ដល់យន្ដហោះ ប្រភេទ MA-60 ដល់កម្ពុជា ចំនួន ២គ្រឿង ផងដែរ ។
ពិធីចុះហត្ថលេខា ឯកសារសំខាន់ៗ ចំនួន៤ នោះគឺ៖ ១. លោកឧបនាយករដ្ឋមន្ដ្រី គាត ឈន់ រដ្ឋមន្ដ្រីក្រសួងសេដ្ឋកិច្ចនិងហិរញ្ញវត្ថុ បានចុះហត្ថលេខាជាមួយភាគីចិន ស្ដីពីកិច្ចព្រម ព្រៀងពង្រីកកំណាត់ផ្លូវជាតិលេខ ៦អា ។ ២.លោក ម៉ម ប៊ុនហេង រដ្ឋមន្ដ្រីក្រសួងសុខាភិបាល បានចុះហត្ថលេខាជាមួយភាគី ចិន ស្ដីពីគម្រោងសាងសង់ មណ្ឌលសុខភាពអន្លង់ក្ងាន នៅក្នុងខណ្ឌសែនសុខ រាជធានីភ្នំពេញ ។ ៣.លោក ឌុល គឿន អគ្គនាយក នៃអគ្គនាយកដ្ឋានភស្ដុភារ ក្រសួងមហាផ្ទៃ បានចុះហត្ថលេខាជាមួយភាគីចិន ស្ដីពីប្រព័ន្ធទូរស័ព្ទបន្ទាន់ និងគ្រប់គ្រងចរាចរ និង៤.លោក ចៅ ភីរុណ អគ្គនាយក នៃអគ្គនាយកដ្ឋានភស្ដុភារ និងបច្ចេកទេសក្រសួងការពារជាតិ បានចុះហត្ថលេខាជាមួយភាគីចិន ស្ដីពីការប្រគល់និងទទួលយន្ដហោះ ប្រភេទ MA-60 ចំនួន ២គ្រឿង ។
បន្ទាប់ពិធីចុះហត្ថលេខាទាំង៤នេះមក សម្ដេចនាយករដ្ឋមន្ដ្រី និងលោក ហ៊ឺ គួឈាង បានអញ្ជើញបើកផ្ទាំងកំណាត់ជានិម្មិតរូប បង្ហាញ ពីតំបន់សេដ្ឋកិច្ចពិសេស នៅក្រុងព្រះសីហនុផងដែរ៕Angkorthom