ដោយ៖អ៊ិន សាមិត្តប៉ោយប៉ែត៖ សន្តិសុខក្រុមហ៊ុន LKSម្នាក់ យាមនៅផ្សាររ៉ាថ្មី ក្នុងភូមិក្បាលស្ពាន១ សង្កាត់-ក្រុងប៉ោយប៉ែត ខេត្តបន្ទាយមានជ័យ ត្រូវគេកាប់ដោយដាវ សាម៉ូរ៉ៃរបួសសុសសាច់ កាលពីវេលាម៉ោង១០ព្រឹកថ្ងៃទី១១ ខែមិថុនា ឆ្នាំ២០១២ បន្ទាប់ពីសន្តិសុខរូបនេះ បានដេញមិនឲ្យយុវជនម្នាក់ ចតម៉ូតូមុខផ្សារដោយ សម្ដីទ្រគោះ បោះបោក ។ លោក អ៊ុំ សុផល អធិការនគរបាលក្រុងប៉ោយប៉ែត បានឲ្យដឹងនៅថ្ងៃទី១១ ខែមិថុនា ឆ្នាំ២០១២ ថា ជនរងគ្រោះមានឈ្មោះ ភក្រ័ វុត្ថា ភេទប្រុស អាយុ២៤ឆ្នាំ ជាសន្តិសុខផ្សាររ៉ាថ្មី ក្រុងប៉ោយប៉ែត ។ រីឯជនដៃដល់មានឈ្មោះ ស៊ីណា វណ្ណា ភេទប្រុស អាយុ១៩ឆ្នាំមានទីលំនៅមិនពិតប្រាកដ ។ លោកអធិការ អ៊ុំ សុផល បានបន្តថា មុនពេលកើតហេតុជនរងគ្រោះ ភក្រ័ វុត្ថា បានដើរទៅដេញឈ្មោះ ស៊ីណា វណ្ណា មិនឲ្យចតម៉ូតូមុខ ផ្សារដោយ និយាយ ថា ផ្លូវតូចចង្អៀត ក្នុងកាយវិការ ទ្រគោះបោះបោកភ្លាម នោះជនដៃ ដល់ បាន មើលមុខសន្តិសុខ រងគ្រោះរួចក៏បើកម៉ូតូចេញបាត់ទៅ លុះម៉ោង១១ព្រឹក ថ្ងៃដដែល ឈ្មោះ ស៊ីណា វណ្ណា បានត្រលប់មកសារជាថ្មី ហើយបានដកដាវ សាម៉ូ រៃ ពីចង្កេះរួចមិននិយាយអ្វី ទាំងអស់ ដើរសំដៅទៅ កាប់ឈ្មោះ ភក្រ័ វុត្ថា ជាសន្តិសុខ ឥតសំចៃដៃបណ្ដាលឲ្យរបួសដៃឆ្វេង និងកញ្ចឹងកចំនួន០៣ដាវ ភ្លាមនោះ ម្ដាយជនរងគ្រោះឃើញទាន់ក៏លោតទៅអោបជនបង្ក និងស្រែក ឲ្យគេជួយទើបឈានដល់ ការចាប់ជនសង្ស័យប្រគល់ជូននគរបាលក្រុង ប៉ោយប៉ែតបានសម្រេច ។ ចំពោះជនរងគ្រោះបច្ចុប្បន្ន កំពុងសម្រាកព្យាបាលនៅមន្ទីរពេទ្យ ។ បច្ចុប្បន្នជនសង្ស័យរួមជាមួយវត្ថុតាងក្រោយសួរនាំត្រូវបាននគរបាលបញ្ជូនទៅស្នងការដ្ឋាននគរបាលខេត្តដើម្បីកសាងសំណុំរឿងបញ្ជូនទៅតុលាការចាត់ការបន្តតាមនីតិវិធីច្បាប់ ៕ |