ដោយ ៖ ព.អមតៈ ថ្ងៃទី 08 មិថុនា 2012ម៉ោង 10:08:50
ខេត្ដពោធិ៍សាត់ ៖ ស្ដ្រីចំណាស់ម្នាក់បានស្លាប់បន្ទាប់ពីទទួលទានមីម៉ាម៉ា ហើយមនុស្ស៤នាក់ផ្សេងទៀតក៏បានពុលស្ថិតក្នុងសភាពធ្ងន់ធ្ងរដែរ ។ ប៉ុន្ដែដោយការយកចិត្ដទុកដាក់សង្គ្រោះទាន់ពេលវេលាពីក្រុមគ្រូពេទ្យ មនុស្សទាំង៤នាក់បានឆ្លងផុតពីសេចក្ដីស្លាប់ ប៉ុន្ដែពួកគេមិនបានទទួលសំណង ឬការទទួលខុសត្រូវណាមួយពីក្រុមហ៊ុនលក់មីម៉ាម៉ានោះឡើយ ។សេចក្ដីរាយការណ៍ពីស្រុកភ្នំក្រវាញ ខេត្ដពោធិ៍សាត់ បានឱ្យដឹងថា ពិធីបុណ្យ សពស្ដ្រីវ័យចំណាស់ ដែលពុលមីបាន បញ្ចប់រួចរាល់ ។ ប៉ុន្ដែមិនឃើញតំណាង ក្រុមហ៊ុនលក់មីចុះទៅសួរនាំករណីប្រជា ពលរដ្ឋពុលមីនេះឡើយ ។ មិនដឹងថាតើ បញ្ហានេះ ក្រុមគ្រួសារជនរងគ្រោះនឹង ត្រូវទទួលបានសំណង ឬក៏ដំណោះស្រាយ យ៉ាងណាជាមួយក្រុមហ៊ុនលក់មីនោះទេ។ ប៉ុន្ដែបើតាមប្រជាពលរដ្ឋនៅតាមទីជន បទក្នុងខេត្ដពោធិ៍សាត់អះអាងថា ជីវិត អ្នកស្លាប់ដោយសារពុលមីម៉ាម៉ាមិន អាចមានការទទួលខុសត្រូវនោះទេ ។
គួរបញ្ជាក់ថា ស្ដ្រីម្នាក់បានស្លាប់ និងមនុស្ស៤នាក់ទៀតត្រូវក្រុមគ្រូពេទ្យ ជួយសង្គ្រោះបន្ទាន់នៅមណ្ឌលសុខភាព ភ្នំក្រវាញកាលពីវេលាម៉ោង៦និង៣០ នាទីព្រឹក ថ្ងៃទី៤ ខែមិថុនា ឆ្នាំ២០១២ ។
មន្ដ្រីនគរបាលស្រុកភ្នំក្រវាញ បានឱ្យដឹងថា ករណីដែលគេសង្ស័យមានមនុស្ស ស្លាប់ដោយពុលមីម៉ាម៉ាបានកើតឡើង នៅក្នុងភូមិក្រូចឆ្មា ឃុំលាច ស្រុកភ្នំ ក្រវាញ ខេត្ដពោធិ៍សាត់ ។ មន្ដ្រីខាងលើ បានឱ្យដឹងទៀតថា ស្ដ្រីម្នាក់ឈ្មោះ ជា សុន អាយុ៧៨ឆ្នាំ បានស្លាប់នៅបន្ទាប់ពី គេអះអាងថា ក្រោយទទួលទានមីម៉ាម៉ា ផលិតនៅប្រទេសថៃ និងពេលបញ្ជូន មកដល់មន្ទីរពេទ្យ។ រីឯពលរដ្ឋ៤នាក់ ទៀត ដែលគេសង្ស័យពុលមីដូចគ្នានេះ ដែលត្រូវគ្រូពេទ្យកំពុងជួយសង្គ្រោះមាន ឈ្មោះ ព្រំ ស្រីទូច ភេទស្រី អាយុ២៧ឆ្នាំ, ឈ្មោះ សាត សីលា ភេទស្រី អាយុ៦ឆ្នាំ, ឈ្មោះ ព្រំ រដ្ឋា ភេទស្រី អាយុ២៤ឆ្នាំ និង ឈ្មោះសាត លីកា ភេទស្រី អាយុ៤ឆ្នាំ ។
ប្រភពពីមន្ដ្រីដដែលបានឱ្យដឹង ដែរថា ក្មេងស្រី សាត លីកា និងស្ដ្រី ព្រំ រដ្ឋា ត្រូវបានគេបញ្ជូនមកព្យាបាលនៅរាជ ធានីភ្នំពេញ ក្រោយពេលដែលមាន អាការកាន់តែធ្ងន់ធ្ងរ ។
អ្នកភូមិបានឱ្យដឹងថា ស្ដ្រីដែលមាន គ្រោះថ្នាក់ដល់ជីវិតនោះនៅមុនមាន ហេតុការណ៍កើតឡើងគាត់បានទទួល ទានមីម៉ាម៉ា ។ ប៉ុន្មាននាទីក្រោយមក គាត់បានក្អួតចង្អោរក្នុងសភាពធ្ងន់ធ្ងរ ហើយត្រូវបានក្រុមគ្រួសារបញ្ជូនមក សង្គ្រោះបន្ទាន់នៅមណ្ឌលសុខភាពភ្នំ ក្រវាញប្រមាណកន្លះម៉ោងបានបាត់បង់ ជីវិត ។ ចំណែកមនុស្ស៤នាក់ទៀត ដែល គេសង្ស័យថា ពុលមីម៉ាម៉ាដែរនោះ ក៏ ត្រូវបានដឹកមកជួយសង្គ្រោះបន្ទាន់ដូច គ្នាដែរ ។
ក្រុមគ្រូពេទ្យមិនបានអះអាងពី ការ សង្ស័យថា អ្នកទាំងនេះពុលមីម៉ាម៉ានោះ ទេ ប៉ុន្ដែទាំងអ្នកស្លាប់ និងអ្នកកំពុងជួយ សង្គ្រោះពួកគេក្អួតចេញសុទ្ធតែមី ។ គ្រូ ពេទ្យបានឱ្យដឹងដែរថា អ្នកដែលកំពុង ជួយសង្គ្រោះរហូតមកដល់ពេលនេះមាន អាការធូរស្រាលបន្ទាប់ពីព្យាបាល និង ពួកគេក្អួតចង្អោរចេញមីពីក្នុងពោះ ។
មន្ដ្រីនគរបាលជំនាញបានបញ្ជាក់ថា ករណីសង្ស័យអ្នកស្លាប់ និងអ្នកក្អួតចង្អោរ ដោយសារទទួលទានមីនៅពេលនេះកំពុង យកមី និងទឹកស្រុសមីទៅពិនិត្យ និង ពិសោធន៍ថាតើអ្នកភូមិទាំងនេះស្លាប់ និងក្អួតចង្អោរដោយសារមូលហេតុអ្វី ។ ប្រភពបានឱ្យដឹងដែរថា ចំពោះករណី កើតឡើងខាងលើនេះ សមត្ថកិច្ចមិនបាន ឃាត់ខ្លួនជនណាម្នាក់ដែលបានលក់មី \ឱ្យអ្នកទទួលទានបណ្ដាលឱ្យពុលក្អួតចង្អោរ ដូចខាងលើនេះទេ ៕នគរវត្ត