ថ្ងៃទី 27 ខែមិថុនា ឆ្នាំ2012, ម៉ោង 07:26 AM ឈ ភ
ភ្នំពេញ៖សាលាឧទ្ធរណ៍របស់ប្រទេសកម្ពុជាបានសម្រេចដោះលែងស្រ្តីអ្នក បឹងកក់ទាំង១៣នាក់ពីពន្ធនាគារព្រៃសហើយ ក្រោយពីពួកគាត់ជាប់ពន្ធនាគាររយៈពេល១ខែ៣ថ្ងៃមក។
ព្រឹកថ្ងៃទី២៧មិថុនានេះ ក្រុមប្រជាពលរដ្ឋសហគមន៍បឹងកក់ប្រមាណជាង១រយនាក់ដែលមានទាំងកុមារ តូចៗផង ត្រូវបានអាជ្ញាធរប៉ូលិសរារាំងមិនឲ្យទៅកាន់សាលាឧទ្ធរណ៍ដើម្បី ស្តាប់ការសម្រេចរបស់តុលាការចំពោះស្រ្តីបឹងកក់ទាំង១៣ឡើយ។
ផ្លូវដែលស្ថិតជុំវិញសាលាឧទ្ធរណ៍ត្រូវបានបិទទាំងស្រុង ហើយកម្លាំងប៉ូលិសបង្រ្កាបបាតុកម្មរាប់រយនាក់ត្រូវបានគេដាក់ ពង្រាយ ដើម្បីធ្វើការទប់ស្កាត់មិនឲ្យអ្នកបឹងកក់ដែលពាក់អាវយឺតពណ៌ខ្មៅ មានផ្កាឈូក និងកាន់រូបជញ្ជីង ចូលទៅកាន់សាលាឧទ្ធរណ៍ដែលកំពុងកាត់ក្តីលើស្រ្តីអ្នកបឹងកក់ចំនួន ១៣នាក់ក្នុងជម្លោះដីធ្លីជាមួយក្រុមហ៊ុនស៊ូកាគូអ៊ីននោះ។
នៅពេលនោះ ក៏មានការប៉ះទង្គិចគ្នារវាងក្រុមប៉ូលិសបង្រ្កាបបាតុកម្មដែលមាន ដំបងឆក់គ្រប់ដៃ និងប្រជាពលរដ្ឋអ្នកបឹងកក់ដែលស្រែកតវ៉ា ដោយមានការវាយទាត់ធាក់ បណ្តាលឲ្យស្រ្តីដែលមានផ្ទៃពោះជាង២ខែម្នាក់រលូតកូន និងក្មេងៗជាច្រើននាក់ទៀតរងរបួសផងដែរ។
តែទោះបីយ៉ាងណាក៏ដោយ ក៏នៅពេលបើកសវនាការព្រឹកមិញនេះ តុលាការសាលាឧទ្ធរណ៍ បានសម្រេចដោះលែងស្រ្តីអ្នកបឹងកក់ទាំង១៣នាក់ពីពន្ធនាគារព្រៃសវិញ ហើយ បន្ទាប់ពីពួកគេជាប់ពន្ធនាគាររយៈពេល១ខែ៣ថ្ងៃមក ហើយស្រ្តីអ្នកបឹងកក់ទាំង១៣នាក់ដែលត្រូវដោះលែងពីពន្ធនាគារនោះ នឹងបានមកជួបជុំក្រុមគ្រួសារនៅផ្ទះវិញនៅរសៀលថ្ងៃនេះ ឬយ៉ាងយូរថ្ងៃស្អែក ក្រោយពីពីបំពេញបែបបទតាមនីតិវិធីរួជមក។
ស្រ្តីអ្នកបឹងកក់ទាំង១៣នាក់ ត្រូវបានតុលាការក្រុងភ្នំពេញកាត់ទោសកាលពីថ្ងៃទី២៤ ខែឧសភា ឆ្នាំ២០១២ ឲ្យជាប់ពន្ធនាគារម្នាក់ៗ២ឆ្នាំ៦ខែ ចំពោះបទចូលកាន់កាប់ទ្រព្យសម្បត្តិបុគ្គលឯកជន និងជេរប្រមាថមន្រ្តីសាធារណៈ៕Agkor thom