ថ្ងៃទី 27 ខែមិថុនា ឆ្នាំ2012, ម៉ោង 04:58 PM ហេង សុខា
រាជធានីភ្នំពេញ៖ យុវជនម្នាក់ជានិស្សិតលោតសម្លាប់ខ្លួនពីលើផ្ទះជាន់ទី២ កាលពីវេលាម៉ោង១២ និង៣០នាទី ថ្ងៃត្រង់ ថ្ងៃទី២៧ មិថុនា នៅផ្ទះលេខ 934AE2 មហាវិថីកម្ពុជា ក្រោម ក្រុម១៧ ភូមិ៥ សង្កាត់ទឹកល្អក់១ ខណ្ឌទួលគោក ។
យុវជនលោតសម្លាប់ខ្លួនពីលើផ្ទះជាន់ទី២ មានឈ្មោះ ភឹម ជីលីណា ភេទប្រុស អាយុ២៥ឆ្នាំ ជានិស្សិត មានឪពុកជាមន្ត្រីប៉ូលិស រងរបួសបាក់ឆ្អឹងជំនីរ ។
ក្រុមគ្រួសាររបស់ជនរងគ្រោះព្យាយាមលាក់លៀម មិនផ្តល់ព័ត៌មានទេ សូម្បីតែថតរូបភាព ក៏មិនឲ្យថតដែរ រហូតដល់គ្រូពេទ្យសាកសួរពីស្ថានភាពរបួស ក៏មិនហ៊ានប្រាប់ដែរ ខ្លាចគ្រូពេទ្យលួចប្រាប់អ្នកសារព័ត៌មាន គ្រាន់តែបង្ហើបប្រាប់ថា កូនប្រុសរបស់គាត់ វិលមុខរអិលជើងធ្លាក់ពីលើផ្ទះតែប៉ុណ្ណោះ ។
បើតាមប្រភពព័ត៌មានពីកន្លែងកើតហេតុ បានឲ្យដឹងថា យុវជនខាងលើនេះ សង្ស័យប្រើប្រាស់ថ្នាំញៀន ហើយកាលពីម្សិលមិញនេះ ត្រូវក្រុមគ្រួសារដឹកយកទៅព្យួរសេរ៉ូមទៅមន្ទីរពេទ្យ ដោយប្រាប់អ្នកជិតខាងថា មានជម្ងឺប្រចាំកាយ ។
ទាក់ទិននឹងករណីនេះ អ្នកដឹងហេតុការណ៍បានឲ្យដឹងទៀតថា ជនរងគ្រោះលោតពីលើផ្ទះជាន់ទី២ ដើម្បីសម្លាប់ខ្លួន ដោយប្រាប់ថា រូបគេមានវិបត្តិនៅក្នុងគ្រួសារ ចង់តែលោតសម្លាប់ខ្លួនឲ្យស្លាប់ មិនចង់រស់នៅលើលោកនេះទេ ។ មុនពេលលោតសម្លាប់ខ្លួន ឈ្មោះ ភឹម ជីលីណា បានហាមមិនឲ្យយករូបគេ ទៅមន្ទីរពេទ្យទេ ដោយសារថារូបគេចង់ស្លាប់ មិនចង់រស់នៅទៀតទេ ។ បន្ទាប់ពីលោតពីលើផ្ទះជាន់ទី២ ធ្លាក់មកដល់ក្រោម បណ្តាលឲ្យសន្លប់ បាក់ឆ្អឹងជំនីរ និងក្អួតចង្អោរជាប់រហូត ត្រូវក្រុមគ្រួសារបញ្ជូនទៅព្យាបាលនៅមន្ទីរពេទ្យព្រះកុសុមៈ បានដឹងខ្លួនឡើងវិញហើយ ប៉ុន្តែនៅក្អួតចង្អោរមិនទាន់បាត់ ៕Agkor thom
