  |
ដោយ៖អ៊ិន សាមិត្តប៉ោយប៉ែត៖ហុងដាសេ១២៥ ពីរគ្រឿងបានព្រលះគ្នាយ៉ាងពេញទំហឹង នៅលើកំណាត់ផ្លូវជាតិលេខ៥ កាលពីវេលា ម៉ោង ៥.៤០នាទីល្ងាចថ្ងៃទី២៤ ខែមិថុនា ឆ្នាំ២០១២ ស្ថិតក្នុងភូមិគីឡូម៉ែត្រលេខ ៤ សង្កាត់ប៉ោយប៉ែត ក្រុង ប៉ោយប៉ែត ខេត្តបន្ទាយមានជ័យ ។ អ្នកឃើញហេតុការណ៍គ្រោះថ្នាក់ចរាចរណ៍ ខាងលើនេះបានប្រាប់ ឲ្យដឹងថា មុនពេលកើតគេឃើញ ម៉ូតូម៉ាក់សេ១២៥សេរីឆ្នាំ២០០៨ ព៏ណខ្មៅគ្មានស្លាកលេខ មួយគ្រឿង បើកបរដោយ ឈ្មោះសួស ប៊ុនធឿន មុខរបរជាអ្នកបោក គក់ ស្បែកជើង នៅក្នុងផ្សាររ៉ុងក្លឿ ប្រទេសថៃ ឌុបប្រពន្ធ ឈ្មោះ តឿ អាយុ៤២ឆ្នាំនិងកូនស្រីម្នាក់ទៀត អាយុប្រហែល១០ឆ្នាំ ធ្វើដំណើរពីលិច ទៅកើតលុះមកដល់ចំណុច កើតហេតុ ម៉ូតូខាងលើបានបត់ឆ្វេង ចូលហាងស្រះត្រជាក់ចិត្តថ្មី ។ ស្របពេលនោះ មានម៉ូតូ សេ១២៥ ពណ៌ខ្មៅសេរីឆ្នាំ២០០៥ បិទតែមឆ្នាំ២០១០ ពាក់ស្លាកលេខ1W-7052 បើកបរដោយឈ្មោះ ចាន់ ញ៉ែម ភេទប្រុសអាយុ ៦៥ឆ្នាំ រស់នៅក្នុងភូមិប្រជាធម្ម ក្រុងប៉ោយប៉ែត មុខរបរ រត់ម៉ូតូឌុប ដោយឌុបស្រីម្នាក់ ឈ្មោះឆាត ណារី អាយុ៥០ឆ្នាំ បើកបរច្រាសទិសគ្នា ពីកើតទៅលិច បានបុកនិងម៉ូតូខាងលើ យ៉ាងពេញទំហឹងតែម្ដង ខណៈដែលម៉ូតូនោះ កំពុងបត់ទទឹងផ្លូវ បណ្ដាលឲ្យភាគី ទាំងសងខាង ខ្ទាតចេញពីគ្នា របួសធ្ងន់នឹងស្រាលរៀងៗខ្លួន ។ ក្នុងនោះឈ្មោះ ចាន់ ញ៉ែម ដែលជាអ្នករត់ម៉ូតូឌុប និងស្រី្តជិះពីក្រោយឈ្មោះ ឆាត ណារី របួសធ្ងន់ ហើយត្រូវគេដឹកទៅសង្គ្រោះបន្ទាន់នៅគ្លីនិកឯកជន ភ្លាមៗ ចំណែកភាគីម្ខាងទៀត ដែលបត់ម៉ូតូទទឹង ផ្លូវរងរបួសស្រាល មិនមានបញ្ហាអ្វីឡើយ ។ ដោយឡែកម៉ូតូទាំងពីរគ្រឿង ក៏រងនូវការខូចខាតផ្នែកខាងមុខផង ដែរ ត្រូវសមត្ថកិច្ច ចរាចរណ៍ យកទៅរក្សាទុក នៅអធិការក្រុងប៉ោយប៉ែត ដើម្បីរង់ចាំការដោះស្រាយ តាមផ្លូវច្បាប់ នាពេលក្រោយ ៕ |
