ក្នុងនាមជាប្រធានអាស៊ាន នៅឆ្នាំ២០១២នេះ ប្រទេសកម្ពុជានឹងរៀបចំកិច្ចប្រជុំអាស៊ាន និងកិច្ចប្រជុំពាក់ព័ន្ធចំនួន១៩ ចាប់ពីថ្ងៃទី០៦ ដល់ថ្ងៃទី១៣ ខែកក្កដា ឆ្នាំ២០១២ ក្នុងទីក្រុងភ្នំពេញ។
តាម សេចក្តីប្រកាសព័ត៌មានរបស់ក្រសួងការបរទេសកម្ពុជា កិច្ចប្រជុំទាំង១៩នោះរួមមាន ៖ ១-កិច្ចប្រជុំរដ្ឋមន្រ្តីការបរទេសអាស៊ានលើកទី៤៥, ២-កិច្ចប្រជុំជាមួយប្រទេសដៃគូ, ៣-កិច្ចប្រជុំវេទិកាតំបន់អាស៊ានលើកទី១៩, ៤-កិច្ចប្រជុំរដ្ឋមន្រ្តីការបរទេសលើកទី២ នៃកិច្ចប្រជុំកំពូលអាស៊ីបូព៌ា, ៥-កិច្ចប្រជុំរដ្ឋមន្រ្តីការបរទេសអាស៊ានជាមួយគណៈកម្មការអន្តរជាតិ រដ្ឋាភិបាលអាស៊ាន ស្តីពីតំណាងសិទ្ធិមនុស្ស, ៦-កិច្ចប្រជុំគណៈកម្មការតំបន់អាស៊ីអាគ្នេយ៍គ្មានអាវុធនុយក្លេអ៊ែរ, ៧-កិច្ចប្រជុំរដ្ឋមន្រ្តីការបរទេសអាស៊ានបូក៣លើកទី១៣, ៨-កិច្ចប្រជុំរដ្ឋមន្រ្តីការបរទេសមេគង្គ-ជប៉ុនលើកទី៥, ៩-កិច្ចប្រជុំរដ្ឋមន្រ្តីការបរទេសមេគង្គ-សាធារណរដ្ឋកូរ៉េ, ១០-កិច្ចប្រជុំរដ្ឋមន្រ្តីការបរទេសអាស៊ាន-អូស្រ្តាលី, ១១-កិច្ចប្រជុំរដ្ឋមន្រ្តីការបរទេសអាស៊ាន-កាណាដា, ១២-កិច្ចប្រជុំរដ្ឋមន្រ្តីការបរទេសអាស៊ាន-សាធារណរដ្ឋប្រជាមានិតចិន, ១៣-កិច្ចប្រជុំរដ្ឋមន្រ្តីការបរទេសអាស៊ាន-សហភាពអឺរ៉ុប, ១៤-កិច្ចប្រជុំរដ្ឋមន្រ្តីការបរទេសអាស៊ាន-ជប៉ុន, ១៥-កិច្ចប្រជុំរដ្ឋមន្រ្តីការបរទេសអាស៊ាន-ឥណ្ឌា, ១៦-កិច្ចប្រជុំរដ្ឋមន្រ្តីការបរទេសអាស៊ាន-នូវែលហ្សេឡង់, ១៧-កិច្ចប្រជុំរដ្ឋមន្រ្តីការបរទេសអាស៊ាន-សាធារណរដ្ឋកូរ៉េ, ១៨-កិច្ចប្រជុំរដ្ឋមន្រ្តីការបរទេសអាស៊ាន-រុស្ស៊ី និង ១៩-កិច្ចប្រជុំរដ្ឋមន្រ្តីការបរទេសអាស៊ាន-សហរដ្ឋអាមេរិក។បើតាមសេចក្តីប្រកាសព័ត៌មាន ដដែល ក្នុងអំឡុងនៃកិច្ចប្រជុំខាងលើនេះ ឯកសារសំខាន់ៗមួយចំនួននឹងត្រូវចុះហត្ថលេខាដោយរដ្ឋមន្រ្តីការបរទេស អាស៊ាន និងរដ្ឋមន្រ្តីការបរទេសនៃប្រទេសដៃគូសន្ទនាដូចជា សេចក្តីប្រកាសស្តីពីពិធីសារលើសន្ធិសញ្ញានៃតំបន់អាស៊ីអាគ្នេយ៍ គ្មានអាវុធនុយក្លេអ៊ែរ ដោយរដ្ឋមន្រ្តីការបរទេសអាស៊ាន, អនុស្សារណៈ នៃការយោគយល់គ្នារវាងអាស៊ាន និងចិន លើសន្ធិសញ្ញាស្តីពីតំបន់អាស៊ីអាគ្នេយ៍គ្មានអាវុធនុយក្លេអ៊ែរ, ពិធីសារលើសន្ធិសញ្ញាស្តីពីតំបន់អាស៊ីគ្មានអាវុធនុយក្លេអ៊ែរ ដោយប្រទេសមហាអំណាចទាំង៥, លិខិតុបករណ៍នៃការចូលជាភាគីរបស់សហភាពអឺរ៉ុប និងលិខិតុបករណ៍នៃការបន្តលើសន្ធិសញ្ញានៃមិត្តភាព និងសហប្រតិបត្តិការនៅអាស៊ីអាគ្នេយ៍ និងចុងក្រោយ លិខិតុបករណ៍នៃការចូលជាភាគីរបស់ចក្រភពអង់គ្លេស ព្រមទាំងលិខិតុបករណ៍នៃការបន្តលើសន្ធិសញ្ញានៃមិត្តភាពនិងសហ ប្រតិបត្តិការនៅអាស៊ីអាគ្នេយ៍៕ព័ត៌មានសេរី
