ដោយ៖អ៊ិន សាមិត្ត
ប៉ោយប៉ែត ៖ ក្មេងស្រីរើសអេតចាយម្នាក់ ត្រូវសន្តិសុខថៃក្នុងផ្សាររុងក្លឿចាប់រំលោភរហូតបានសម្រេច ក្រោយពេលធ្វើសកម្មភាពរួចជនល្មើសគ្រោងសម្លាប់ជនរងគ្រោះបំបិទមាត់ទៀតផង តែសំណាងល្អជនរងគ្រោះរត់មកដីខ្មែរវិញទាន់ពេលវេលា។
ក្នុងករណីចាប់រំលោភនេះបានកើតឡើងកាលពីវេលាម៉ោង0២ :៣០នាទី រសៀល ថ្ងៃទី 0២ ខែ មិថុនា ឆ្នាំ២០១២ ត្រង់ចំណុចព្រៃខាងជើងផ្សាររុងក្លឿ ក្នុងស្រុកអរញ្ញ ខេត្ត ស្រះកែវ ជាប់ព្រំដែនថៃ-កម្ពុជាសព្វថ្ងៃនេះ។
ជនរងគ្រោះឈ្មោះ យ.ច.ណ អាយុ១៣ឆ្នាំ រស់នៅក្នុងភូមិ ក្បាលស្ពាន សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ បានឲ្យដឹងថា មុនពេលកើតហេតុនាងបានដើររើសអេតចាយ នៅជុំវិញផ្សាររុងក្លឿ ហើយនៅពេលដែលខ្លួនកំពុងតែដើររើសអេតចាយនោះស្រាប់តែមានបីសាចតណ្ហាសៀមម្នាក់ ដែលជាសន្តិសុខក្នុងផ្សារ បានជិះម៉ូតូមកចាប់ដៃនាងឲ្យឡើងលើម៉ូតូដោយដាក់នាងនៅខាងមុខ ។ ប្រភពដដែលៗបន្តថា ពេលឡើងលើម៉ូតូ ជនល្មើសចាប់ផ្ដើមធ្វើសកម្មភាពស្ទាបអង្អែល ចាប់ពី ដើមទ្រូង រហូតដល់ចំណុចសំខាន់។ លុះទៅដល់ព្រៃស្ងាត់ក្នុងដីថៃនោះ ជនល្មើសក៏បានចាប់សម្រាតខោអាវនាងអស់ពីខ្លួន រួចរំលោភបានសម្រេចតែម្ដង។ ក្រោយពីរំលោភរួចជនល្មើសគ្រោងនឹងសម្លាប់នាងនៅក្នុងព្រៃស្ងាត់នោះទៀត តែនាងបានរុញច្រានរួចរត់ចូលដីខ្មែរវិញភ្លាមៗតែម្ដង ។ គេបានបញ្ជាក់ថា នាងមានបងប្អូន៧នាក់ នាងជាកូនទី៤ ហើយមានម្ដាយឈ្មោះភាព គ្មានឪពុកទេ។ ខណៈពេលនេះអង្គការស្ត្រីមានវិបត្តិក្រុងប៉ោយប៉ែតបានជួយសង្គ្រោះជនរងគ្រោះហើយ៕
