ដោយ ៖ វិចិត្រា ថ្ងៃទី 09 ឧសភា 2012ម៉ោង 16:21:41
ខេត្ដកំពង់ស្ពឺ ៖ ក្មេងស្រីម្នាក់បានបាត់ ពីផ្ទះអស់រយៈពេលច្រើនថ្ងៃមកហើយ ពេលនេះម្ដាយឪពុកកំពុងតែស្វះស្វែង រកគ្រប់ច្រកល្ហកនៅតែរកមិនឃើញ នៅឡើយ ។ ករណីបាត់ក្មេងស្រីនេះកើត ឡើងកាលពីថ្ងៃទី៧ ខែឧសភា ឆ្នាំ២០១២។ ក្មេងស្រីដែលបាត់ខ្លួននោះឈ្មោះ ពេជ្រ រតនៈ ហៅច្រឹប អាយុ១៧ឆ្នាំ មានម្ដាយ ឈ្មោះអំ ស៊ឹម អាយុ៥៧ឆ្នាំ ឪពុកឈ្មោះ ពេជ្រ សាវឿន អាយុ៦៧ឆ្នាំ នៅភូមិ ចម្ការចេក៣ ឃុំត្រែងត្រយឹង ស្រុកភ្នំ ស្រួច ខេត្ដកំពង់ស្ពឺ ។
តាមការរៀបរាប់របស់ស្ដ្រីជា ម្ដាយ បានឱ្យដឹងថា កូនរបស់គាត់រៀនថ្នាក់ទី៦ នៅសាលារៀនចម្ការចេក ហើយមុន ពេលបាត់ខ្លួនកូនបានសុំរូបគាត់ទៅផ្សារ ត្រែងត្រយឹង ដើម្បីយករូបថត ។ ស្ដ្រីជា ម្ដាយបន្ដថា លុះពេលកូនគាត់ជិះម៉ូតូ ចេញទៅ ក៏បាត់ដំណឹងសូន្យឈឹងតែម្ដង ទើបតែនៅថ្ងៃទី៩ ខែឧសភា ឆ្នាំ២០១២ កូនស្រីរបស់គាត់បានទូរស័ព្ទមកប្រាប់ គាត់ឱ្យទៅយកម៉ូតូដែលនាងផ្ញើទុកនៅ ផ្ទះពូនី តែនាងមិនបានប្រាប់ពីទីកន្លែង ដែលនាងកំពុងស្នាក់នៅនោះឡើយ ។
តាមអ្នកជិតខាងម្នាក់បានឱ្យដឹង ដែរ ថា នៅពេលដែលដឹងថាបាត់កូន ម្ដាយ បានខិតខំស្វះស្វែងរកគ្រប់ច្រកល្ហក និង បានទំនាក់ទំនងតាមលេខទូរស័ព្ទរបស់ កូន ពេលដែលតេចូលហើយស្រាប់តែ មានមនុស្សស្រីផ្សេងនិយាយទៅវិញ ដោយបានប្រាប់ថា មីងច្រឡំលេខហើយ។ ក្រោយមកបានទូរស័ព្ទទៅរកកូនស្រីរបស់ គាត់ទៀត ក៏បិទលែងដំណើរការតែម្ដង។ ប្រភពដដែលបន្ដថា តាមអ្នកដែល ស្គាល់ក្មេងស្រីរងគ្រោះបានឱ្យដឹងដែរថា នៅថ្ងៃទី៧ ខែឧសភា ឆ្នាំ២០១២ វេលា ម៉ោង២រសៀល គេបានឃើញក្មេងស្រី រូបនោះដើរជាមួយមនុស្សស្រី២នាក់ វ័យចំណាស់បន្ដិច តែគេមិនបានចាប់ អារម្មណ៍ថាជាអ្នកណានោះទេ ព្រោះនឹក ស្មានថាជាបងប្អូន ។
ក្រោមតំណក់ទឹកភ្នែកស្ដ្រីជាម្ដាយ បានសុំឱ្យកូនវិលមកផ្ទះវិញ បើទោះជា កូនមានបញ្ហាអ្វីកើតឡើងក៏ដោយក៏ ម្ដាយឪពុកលើកលែងទោសឱ្យគ្រប់បែប យ៉ាង គឺសុំតែម្យ៉ាងគត់សូមឱ្យកូនវិល ត្រឡប់មកជួបជុំឪពុកម្ដាយវិញ ។
មជ្ឈដ្ឋានដែលបានដឹងរឿងបានលើក ឡើងថា ក្មេងស្រីដែលបាត់ខ្លួននោះអាច នឹងរត់ទៅតាមសង្សាររបស់គេ តែបើ មិនរត់តាមសង្សារទេ ទំនងជាត្រូវមនុស្ស ស្រី២នាក់នោះល្បួងយកទៅលក់ជាក់ជា មិនខាន ៕នគរវត្ត
