ដោយ ៖ វណ្ណា ថ្ងៃទី 04 ឧសភា 2012ម៉ោង 09:59:24
ប៉ោយប៉ែត ៖ សពពលករខ្មែរមាន ស្រី មានប្រុស ដែលជួបឧបទ្ទវហេតុ គ្រោះថ្នាក់ចរាចរដ៏សាហាវមួយផ្ទួនៗ គ្នាបណ្ដាលឱ្យពលករខ្មែរជិត២០នាក់ ស្លាប់ និងរងរបួសជាច្រើននាក់ កំពុង សម្រាកព្យាបាលនៅមន្ទីរពេទ្យប្រទេស ថៃ ត្រូវបានបញ្ជូនមកកម្ពុជាហើយ ។ដោយឡែកនៅល្ងាចថ្ងៃទី៣ ខែឧសភា ឆ្នាំ២០១២ វេលាម៉ោង៥និង៥៥នាទី អគ្គកុងស៊ុលខ្មែរប្រចាំនៅប្រទេសថៃ (ខេត្ដស្រះកែវ)សហការជាមួយអាជ្ញា ធរថៃបានបញ្ជូនសាកសពពលករខ្មែរ ៤នាក់មកឱ្យសាច់ញាតិធ្វើបុណ្យតាម ប្រពៃណីខ្មែរ តាមច្រកទ្វារអន្ដរជាតិ ប៉ោយប៉ែត រួមមានឈ្មោះ១-គាត ស្រី រ័ត្ន ភេទស្រី អាយុ១៨ឆ្នាំ, ២-ម៉ក់ រ៉ន ភេទស្រី អាយុ៣២ឆ្នាំ, ៣-ម៉ក់ រី ភេទ ស្រី អាយុ២០ឆ្នាំ, ៤-អូ សារិទ្ធ ភេទ ប្រុស អាយុ១៦ឆ្នាំ ។ សាកសពអ្នកទាំង អស់នេះរស់នៅភូមិជីរោទិ៍ ឃុំជីរោទិ៍១ ស្រុកត្បូងឃ្មុំ ខេត្ដកំពង់ចាម ។
ហេតុការណ៍នេះបានកើតឡើងនៅ ថ្ងៃទី២៩ ខែមេសា ឆ្នាំ២០១២ នៅចំណុច ឆាកឈឿនសៅ កាប៊ីន ត្រង់ផ្លូវបំបែក នៃប្រទេសថៃ ។
តាមការឱ្យដឹងពីសាច់ញាតិមកពី ខេត្ដកំពង់ចាម មកយកសាកសពនេះ បានប្រាប់ថា មានប្ដីប្រពន្ធឈ្មោះអ៊ុក លី ភេទប្រុស អាយុជាង៥០ឆ្នាំ(ស្លាប់) និង ប្រពន្ធឈ្មោះព្រំ ចាន់នី (ស្លាប់) ពេល រួមដំណើរជាមួយអ្នកដែលស្លាប់ទាំង៤ ខាងលើ និងរស់នៅជាមួយគ្នា ត្រូវបាន កូនបូជានៅប្រទេសថៃ ពុំបានបញ្ជូនមក ទេ ព្រោះកូនចៅធ្វើការប្រទេសថៃយក ទៅបូជា ។
លោកនេត សារី អគ្គកុងស៊ុលខ្មែរ ប្រចាំនៅប្រទេសថៃ (ខេត្ដស្រះកែវ) បានឱ្យដឹងកាលពីថ្ងៃទី៣ ខែឧសភា ឆ្នាំ ២០១២ថា សាកសពពលករខ្មែរដែល ស្លាប់នេះ បណ្ដាលមកពីគ្រោះថ្នាក់ចរាចរ ខណៈពួកគេបានជិះរថយន្ដ១បាំងកន្លះ បើកលឿនជ្រុលចង្កូតទៅបុកគល់ឈើ ត្រង់ផ្លូវបំបែកនៅចំណុចកើតហេតុខាង លើ បណ្ដាលឱ្យស្លាប់ និងរងរបួស ។
គួរបញ្ជាក់ផងដែរថា សាកសពទាំង ៤នាក់នេះ អគ្គកុងស៊ុលខ្មែរ មន្ដ្រីពាក់ ព័ន្ធបានប្រគល់ឱ្យសាច់ញាតិនៅវត្ដ បាលិលេយ្យ ថ្ងៃទី៣ ខែឧសភា ឆ្នាំ២០១២ វេលាម៉ោង៦និង១៥នាទីល្ងាច ដើម្បី បូជា និងយកឆ្អឹងទៅធ្វើបុណ្យឯស្រុក កំណើត ហើយសាកសពពលករខ្មែរដែល គ្រោះថ្នាក់ចរាចរសាហាវ បើគិតតាំង ពីថ្ងៃទី២៩ ខែមេសា ឆ្នាំ២០១២រហូត ដល់ថ្ងៃទី៤ ខែឧសភា ឆ្នាំ២០១២ ជិត ២០នាក់ហើយ ចំណែកអ្នករងរបួសក៏ ច្រើនណាស់ដែរ តែសាកសពមួយចំនួន ទៀតកំពុងរៀបចំឯកសារបញ្ជូនមកឱ្យ សាច់ញាតិធ្វើបុណ្យ ៕
