ដោយ ៖ សុខ ខេមរា ថ្ងៃទី 20 ឧសភា 2012ម៉ោង 19:03:38
ខេត្តបន្ទាយមានជ័យ៖ កាលពីរសៀលថ្ងៃទី២០ ខែឧសភា ឆ្នាំ២០១២ អាជីវករប្រមាណជិត២០០នាក់ មកពីផ្សារមង្គលបុរី និងផ្សារបន្ទាយនាង ស្រុកមង្គលបុរី បានប្រមូលផ្តុំគ្នាមុខអធិការដ្ឋាននគរបាល ស្រុកមង្គលបុរីទាមទារឲ្យនគរបាលដោះលែងពួកគាត់ដែលនគរបាលព័ទ្ធចាប់ ក្នុងបទចោទទទួលផលចោរកម្ម។ ក្រុមអាជីករបានឲ្យដឹងថា នគរបាលស្រុកមង្គលបុរីបានឃាត់អាជីវករចំនួន៤រូប គឺឈ្មោះ ១ ពៅ ស៊ីគង់ និងប្រពន្ធឈ្មោះសាប ឡាក់គី, ២ ឈ្មោះ ជាង ទូច និងប្រពន្ធឈ្មោះសម ដែន អ្នកទាំងអស់គ្នាជាអាជីវ ករលក់មាសនៅផ្សារមង្គលបុរីត្រូវសមត្ថកិច្ចឃាត់ខ្លួនបន្ទាប់ពី ជនសង្ស័យឈ្មោះ ឆាន់ យួង ភេទប្រុស អាយុ២២ឆ្នាំ រស់នៅភូមិអង្គារបោស សង្កាត់កោះសាត់ ក្រុងសេរីសោភ័ណ បានលួចផ្លាកទីនពីម្ចាស់ ហាងលក់ទូរស័ព្ទដៃយីហោ ភ្នំពេញថ្មី នៅក្រុងសេរីសោភ័ណ រួចហើយយកទៅលក់ឲ្យអាជីវករដែល ត្រូវបានសមត្ថកិច្ចឃាត់ខ្លួន ទើបនគរបាលឃាត់ខ្លួនពួកគាត់ ។
អាជីវករបានលើកឡើងថា ការទិញមាសផ្លាកទីន ឬពេជ្រ ពួកគាត់មិនដឹងថា ជារបស់ដែលគេលួចនោះទេ ដូច្នេះការឃាត់ខ្លួនពួកគាត់ចោទពីបទទទួលផលចោរកម្មគឺជារឿងមិន ត្រឹមត្រូវ ពីព្រោះការទទួលផលចោរកម្ម លុះណាតែពួកគាត់ទិញដូចជាម៉ូតូ ឡាន និងសម្ភារៈមួយចំនួនទៀត ទើបនគរបាលឃាត់ខ្លួនបាន។
ប្រភពពីអាជីវករបានឲ្យដឹងថា នៅថ្ងៃដដែលនេះ ព្រះរាជអាជ្ញារងអមសាលាដំបូងខេត្តបន្ទាយមានជ័យ បានបញ្ជាឲ្យនគរបាលស្រុកមង្គលបុរីធ្វើការដោះលែងអាជីវករ បន្ទាប់ពីអាជីវករជាច្រើននាក់ធ្វើការតវ៉ានោះ៕nokowat