ដោយ ៖ ឡុង សំបូរ ថ្ងៃទី 11 ឧសភា 2012ម៉ោង 17:25:38
ខេត្តស្ទឹងត្រែង៖ បុរសជាប់សង្ស័យពីបទជួញដូរគ្រឿងញៀនពីរនាក់ ត្រូវបានកម្លាំងទីបញ្ជាការ ដ្ឋានកងរាជអាវុធហត្ថខេត្តចាប់ខ្លួនជាមួយថ្នាំញៀនចំនួន១០កញ្ចប់ ក្រោមការដឹកនាំដោយ លោកស្រីស៊ុន យ៉ឺត ព្រះរាជអាជ្ញារងអមសាលាដំបូងខេត្ត និងលោកឧត្តមសេនីយ៍ត្រីឧិ បូរិន្ទមេបញ្ជា ការកងរាជអាវុធហត្ថខេត្តស្ទឹងត្រែង។ប្រតិបតិ្តការណ៍ដឹកនាំកម្លាំង ចុះបង្ក្រាបបុរសជាប់សង្ស័យ ជួញដូរថ្នាំញៀនពីរនាក់ខាងលើនោះ បានប្រព្រឹត្តទៅនៅវេលាម៉ោង៣និង៤៥នាទីរសៀល ថ្ងៃទី១០ ខែឧសភា ឆ្នាំ២០១២ ម្នាក់ត្រូវបានចាប់ ខ្លួននៅចំណុចដុងក្រឡ ជិតប៉ុស្តិ៍ច្រកព្រំដែនត្រពាំងក្រៀលចាស់ ក្នុងសង្កាត់សាមគ្គី ក្រុងស្ទឹងត្រែង ជា មួយថ្នាំញៀនចំនួន១០កញ្ចប់តូចពណ៌ខៀវ ។ រីឯបុរសម្នាក់ទៀតត្រូវបានចាប់ខ្លួននៅផ្ទះជួលមួយកន្លែង របស់កញ្ញាលួន ធានី ប្រធានមន្ទីរទេសចរណ៍ខេត្តស្ទឹងត្រែង ស្ថិតក្នុងភូមិថ្មលាត សង្កាត់ស្រះឬស្សី ក្រុងស្ទឹងត្រែង នាវេលាម៉ោងប្រហែលជា៤និង៣០នាទីល្ងាច ថ្ងៃ ខែ ដដែល ។
លោកអនុសេនីយ៍ឯកកាន់ សុទ្ធារ៉ា នាយការិយាល័យស្រាវជ្រាវប្រឆាំងគ្រឿងញៀន របស់ មន្ទីរស្រាវជ្រាវនិងយុត្តិធម៌ នៃទីបញ្ជាការដ្ឋានកងរាជអាវុធហត្ថខេត្តបានប្រាប់ឲ្យដឹងថា ជនសង្ស័ទាំង ពីរនាក់ដែលត្រូវចាប់ខ្លួននោះគឺ៖១.ឈ្មោះប៊ុន វ៉ាត អាយុ៥០ឆ្នាំ មានទីលំនៅភូមិភូមិផាបាំង ឃុំថ្មកែវ ស្រុកសៀមប៉ាង ហើយបច្ចុប្បន្នរស់នៅ ភូមិរលាក ឃុំអំពិល ស្រុក កំពង់សៀម ខេត្តកំពង់ចាម ។ ២. ឈ្មោះលី ភា ហៅហន អាយុ២៤ឆ្នាំមានទីលំនៅភូមិច្របក់ជ្រុំ ឃុំតាំងក្រសាំង ស្រុកសន្ទុក ខេត្តកំពង់ ធំ ដែលបច្ចុប្បន្នស្នាក់នៅផ្ទះប្រធានមន្ទីរទេសចរណ៍ខេត្ត ស្ថិតក្នុងភូមិ ឃុំ ឃាត់ខ្លួនខាងលើ។
ប្រភពដដែលបានបន្តឲ្យដឹងទៀតថា ក្រោមបទបញ្ជាដ៏ម៉ឹងម៉ាត់របស់លោកឧត្តមសេនីយ៍ត្រីឧិ បូរិន្ទ មេបញ្ជាការកងរាជអាវុធហត្ថខេត្ត កម្លាំងជំនាញបានប្រើគ្រប់យុទ្ធវិធីក្នុការចុះស៊ើបអង្កេត ដោយ ចំណាយអស់ពេលជាយូរថ្ងៃ ទើបឈានទៅកំណត់មុខសញ្ញាជនសង្ស័យជួញដូរគ្រឿងញៀន បានចំ នួនពីរនាក់ធ្វើឡើងនៅកន្លែងពីរផ្សេងគ្នានៅថ្ងៃតែមួយ ក្នុងក្រុងស្ទឹងត្រែង។ ឯការឃាត់ខ្លួនជនសង្ស័យ ទី២ដោយបានចម្លើយសារភាពពីជនសង្ស័យទី១ឈ្មោះប៊ុន វ៉ាត់ ថាថ្នាំញៀនទាំងនេះខ្លួនបានទទួលពី ឈ្មោះលី ភាហៅហន ស្នាក់នៅភូមិថ្មលាត ចំនួន១០កញ្ចប់តូចពណ៌ខៀវ យកទៅឲ្យស្ត្រីម្នាក់ទៀត ឈ្មោះថាន់ អាយុប្រហែល៥០ឆ្នាំ នៅតំបន់ជាប់ព្រំដែនកម្ពុជា- ឡាវ ។លុះធ្វើដំណើរបានជាងពាក់ កណ្តាលផ្លូវក៏ត្រូវកម្លាំងអាវុធហត្ថចាប់ខ្លួនតែម្តង។
លោកឧត្តសេនីយ៏ត្រីឧ បូរិន្ទ មេញ្ជាការកងរាជអាវុធហត្ថខេត្តបានមានប្រសាសន៏ថា ការបង្ក្រាប នេះកម្លាំងជំនាញបានឃាត់ខ្លួនបុរសជនជាតិខ្មែរ ជាប់សង្ស័យពីបទជួញដូរគ្រឿងញៀនចំនួនពីរនាក់ ហើយឈានទៅដកហូតវត្ថុតាងបទល្មើសជាក់ស្តែង បានថ្នាំញៀនចំនួន១០កញ្ចប់តូចពណ៌ខៀវ ស្មើ នឹង១៦០៨ គ្រាប់ជាប្រភេទថ្នាំមេតំហ្វេតាមីន ព្រមទាំងដកហូតរថយន្តកាមរីហើម១គ្រឿង ពណ៌ខៀវ ចាស់ ពាក់ស្លាកលេខភ្នំពេញ2A.2263 សង្ស័យជាមធ្យោបាយផ្តល់ការចរាចរណ៏ថ្នាំញៀន។ ឯការចុះ បង្ក្រាបក្នុងករណីនេះ គឺអនុវត្តទៅតាមបទបញ្ជារបស់ក្រសួងមហាផ្ទៃ និងមន្ទីរប្រឆាំងគ្រឿងញៀន ជា ពិសេសនោះគឺ ទីបញ្ជាការដ្ឋានកងរាជអាវុធហត្ថលើផ្ទៃប្រទេសផងដែរ។ ហើយទីបញ្ជាការដ្ឋានខេត្ត និងខិតខំ បន្តចុះទប់ស្កាត់ និងធ្វើការបង្ក្រាបនូវគ្រប់រូបភាព នៃសកម្មភាពរបស់ក្រុមឧក្រិដ្ឋជន ដែល ចរាចរគ្រឿង ញៀនឆ្លងដែន។ ចំណែកឯជនសង្ស័យជនសង្ស័យទាំងពីរនាក់ ព្រមទាំងវត្ថុតាងថ្នាំ ញៀនចំនួន១៦០៨ គ្រាប់ កម្លាំងជំនាញកំពុងកសាងសំណុំរឿង ត្រៀមបញ្ជូនទៅកាន់សាលាដំបូង ខេត្តស្ទឹងត្រែង ដើម្បីចាត់ការទៅតាមនីតិវិធី ៕
នគរវត្ត
