កាលពីព្រឹកម៉ោង ១០ និង ១៥នាទី ថ្ងៃទី២២ ខែឧសភា ឆ្នាំ២០១២ ទាហានឈុតខ្មៅថៃ បានបិទច្រកអន្តរជាតិជាំ រយៈពេលជាង ១០នាទី រួចបើកវិញ ប៉ុន្តែនៅម៉ោងបាយថ្ងៃត្រង់ ពលរដ្ឋទាំងសងខាង កម្ពុជា-ថៃ មិនទាន់អនុញ្ញាតឲ្យ
ចេញចូលនៅឡើយទេ។
នាយប៉ុស្តិ៍ច្រកអន្តរជាតិជាំ លោកនេត ដារ៉ា បានឲ្យដឹងថា ទាហានឈុតខ្មៅថៃមួយក្រុមមានគ្នាប្រមាណពី ៧ ទៅ ៨នាក់ បានឈរមើលពីចម្ងាយ (ក្នុងទឹកដីថៃ) ឃើញមានដាក់ស្លាកសញ្ញាផ្ទះសំណាក់ នៅមុខផ្ទះសំណាក់ក្នុងទឹកដីកម្ពុជា យ៉ាងជ្រៅ។ ទាហានថៃសង្ស័យថា ទីតាំងនោះជាព្រំដែនមិនទាន់បានកំណត់ច្បាស់ ក៏ទាញបារ៉ាសបិទភ្លាមៗ មួយសន្ទុះក្រោយមកទើបបើកបារ៉ាសវិញ។ តែពលរដ្ឋប្រទេសទាំងពីរ នៅម៉ោងបាយថ្ងៃត្រង់ថ្ងៃដដែលនេះ មិនទាន់ដោះដូរទំនិញគ្នាបាននៅឡើយទេ ហើយសមត្ថកិច្ចនៃប្រទេសទាំងពីរ កំពុងធ្វើការទំនាក់ទំនងគ្នា៕អង្គរធំ
