ដោយ៖ អ៊ិន សាមិត្ត ប៉ោយប៉ែត ៖ តៃកុងស្ទើរភ្លើងថយរថយន្តទៅបុកផ្ទះអ្នកស្រុកទាំងព្រឹកបណ្ដាលឲ្យបុរសម្នាក់ រងរបួសស្រាល ឯទ្រព្យសម្បត្តិរបស់ជនរងគ្រោះបានរងការខូចខាតទាំងស្រុង។ ក្រោយពេលកើតហេតុរួច តៃកុងស្ទើរភ្លើងនោះ សងលុយចំនួន២៥០០បាតជាការសងថ្លៃដល់ការខូចខាតជូនជនរងគ្រោះ។
ហេតុការណ៍គ្រោះថ្នាក់ខាងលើបានកើតឡើងនៅវេលាម៉ោង ៩ និង៣០នាទី ព្រឹកថ្ងៃទី ២២ ខែឧសភា ឆ្នាំ២០១២ នៅចំណុចផ្សាររ៉ាថ្មី ក្នុងសង្កាត់-ក្រុងប៉ោយប៉ែត ខេត្ត បន្ទាយមានជ័យ។
សាក្សីជាច្រើននៅកន្លែងកើតហេតុបានអះអាងថា មុនពេលកើតហេតុ គេឃើញ រថយន្តកាមរី ពណ៌ស្ករ ស៊េរី ៩៣ ពាក់ស្លាកលេខ ប៉ៃលិន 2A-0841 បានដឹកត្រីចេញពីខេត្តសៀមរាប មកក្រុងប៉ោយប៉ែត។ សាក្សីបានបញ្ជាក់ទៀតថានៅពេលម្ចាស់រថយន្តបានដាក់ត្រីជូនម៉ូយរួច ក៏ចតរថយន្តចោល ហើយដើរចូលទៅក្នុងផ្សាររុងក្លឿប្រទេសថៃ។ ក្រោយមក ក៏មានឈ្មោះ សិលា ភេទប្រុស អាយុ ១៨ឆ្នាំ ជាកម្មករ បានឡើងបើករថយន្តថយក្រោយ រួចក៏ជ្រុលទៅបុកផ្ទះជនរងក្រោះតែម្ដង។
បុរសចំណាស់ម្នាក់ឈ្មោះ ណូន អាយុ ៥៨ឆ្នាំ ជាម្ចាស់ផ្ទះ ក៏បានរងរបួសស្រាល ឯទ្រព្យសម្បត្តិរបស់ជនរងគ្រោះដូចជាចាន ឆ្នាំង ត្រូវបានខូចខាតទាំងស្រុង។ ប្រភពបានបន្តថា ក្រោយពេលកើតហេតុ រួចជនបង្កហេតុ បានយកលុយចំនួន២៥០០បាតទៅជូនជនរងគ្រោះជាការបញ្ចប់ការប្ដឹងតវ៉ាគ្នា៕