ដោយ: ឌីណា
CEN
កំពត: គិតតែរយៈពេលពីរថ្ងៃ ចាប់ពីថ្ងៃអាទិត្យ និងថ្ងៃចន្ទ ក្នុងឱកាសព្រះរាជពិធីបុណ្យចម្រើនព្រះជន្ម ព្រះករុណា ព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត្រ នៃព្រះរាជាណាចក្រកម្ពុជា មានអ្នកទេសចរជាតិ និងអន្តរជាតិប្រមាណជាងបីម៉ឺននាក់ បាននាំគ្នាឡើងទៅកម្សាន្ដលើកំពូលភ្នំបូកគោ ក្នុងខេត្តកំពត។ រមណីយដ្ឋានឋានសួគ៌បូកគោ បានសម្ពោធដាក់ឱ្យប្រើប្រាស់កាលពីថ្ងៃទី៣ ខែឧសភា ឆ្នាំ២០១២ ក្រោមអធិបតីភាពសម្ដេចនាយករដ្ឋមន្ដ្រី ហ៊ុន សែន។
ប៉ុន្តែអ្វីដែលជាការសោកស្ដាយនោះ គឺសេវាកម្មពាក់ព័ន្ធមួយចំនួន ស្ថិតក្នុងភាពអន់ខ្សោយ ពិសេសផ្នែកសណ្ឋាគារ ផ្ទះសំណាក់ ភោជនីយដ្ឋាន និងអាហារដ្ឋានកំពុងខ្វះខាត គឺមិនមានគ្រប់គ្រាន់សម្រាប់អ្នកទេសចរ ដែលកំពុងកើនឡើងយ៉ាងច្រើនសន្ធឹកសន្ធាប់នាពេលនេះឡើយ។
អ្នកគ្រប់គ្រងវិស័យទេសចរណ៍ទទួលស្គាល់នូវអ្វីដែលអវិជ្ជមាន ព្រោះជារឿងថ្មី មិនធ្លាប់នឹកស្មានដល់ ហើយអំពាវនាវចំពោះអ្នកមានអាជីព មានជំនាញ និងទ្រព្យធន ជួយគិតគូរពង្រីកបន្ថែមទាំងបរិមាណ និងគុណភាពលើវិស័យឧស្សាហកម្មគ្មានផ្សែងជាអាទិភាព។
លោក សយ ស៊ីណុល ប្រធានមន្ទីរទេសចរណ៍ខេត្ដកំពត បានឲ្យដឹងថា បញ្ហាកង្វះបន្ទប់ស្នាក់នៅ និងអាហារដ្ឋាន ក្នុងក្រុងកំពត កំពុងកើតមាន ព្រោះតែរយៈពេលចុងក្រោយនេះ ភ្ញៀវបានសម្រុកមកលេងយ៉ាងគំហុក។ នេះជារឿងថ្មីសន្លាង ដែលពីមុនមកមិនធ្លាប់ទទួលបានភ្ញៀវដ៏ច្រើនបែបនេះទេ។ ម្ល៉ោះហើយ ទាំងសេវាកម្មទទួលភ្ញៀវ ទាំងបែបបទផ្សេងៗ ពិតជាជួបការលំបាក ទោះបីជាកន្លងមកមន្ទីរជំនាញធ្លាប់ណ្ដុះបណ្ដាលលើការងារនេះជា រៀងរាល់ឆ្នាំក្ដី ដោយសារអ្នកធ្លាប់ទទួលបានជំនាញភាគច្រើនធ្វើបន្លាស់ទី។ ឯអ្នកមកថ្មីក៏មិនទាន់មានបទពិសោធន៍ ហើយរឿងដែលសំខាន់គឺការខ្វះខាតតែម្ដង។
ជាក់ស្ដែងក្នុងថ្ងៃចម្រីនព្រះជន្មព្រះមហាក្សត្រខ្មែរ គិតត្រឹមតែរយៈពេលពីរថ្ងៃនេះ គឺថ្ងៃទី១៣ និងទី១៤ ខែឧសភា ភ្ញៀវចូលមកកាន់ខេត្ដកំពតមានប្រមាណជាងបីម៉ឺននាក់។ ក្នុងនោះទីដែលទេសចរចាប់អារម្មណ៍ គឺភ្នំបូកគោ ដែលថ្ងៃទីមួយ (១៣ ឧសភា) មានរថយន្ដចំនួន ៨១៦ គ្រឿង និងថ្ងៃទីពីរចំនួន ២.៣៣៨ គ្រឿង បានឡើងទៅកម្សាន្ដ។
សព្វថ្ងៃនេះ ដោយមិនគិតបញ្ចូលសណ្ឋាគារឋានសួគ៌បូកគោ នៅខេត្ដកំពត មានសណ្ឋាគារប្រាំ ផ្ទះសំណាក់ ៥៦ រួមមាន ១.០៦០ បន្ទប់។ តែពីរយប់នោះ ភ្ញៀវខ្វះកន្លែងសម្រាក រហូតអ្នកខ្លះវិលត្រឡប់ទៅសម្រាកនៅខេត្ដតាកែវ និងខ្លះវិលទៅភ្នំពេញ ទាំងយប់។ រីឯកន្លែងទទួលទានអាហារវិញក៏មានការខ្វះខាតផងដែរ ដោយអ្នកខ្លះនាំគ្នាទៅក្រាលកន្ទេលហូបនៅតាមឆ្នេរព្រែក ព្រោះតែរកអាហារដ្ឋាន និងភោជនីយដ្ឋានមិនបាន។
លោកបានកោតសរសើរដល់ភ្ញៀវផងដែរថា ទោះជាពួកគាត់បរិភោគពាសវាលពាសកាលមែន តែមិនបានរំខានចំពោះបរិស្ថានទេ ត្បិតពួកគាត់មានការទទួលខុសត្រូវខ្ពស់ ចេះវេចខ្ចប់កាកសំណល់ និងសំរាមផ្សេងៗបោះចូលធុង ដែលកាយវិការបែបនេះគួរឱ្យអ្នកដទៃបន្ដយកគំរូ ដើម្បីសោភ័ណភាព អនាម័យទីក្រុងទេសចរណ៍ទាំងអស់គ្នា។
ជាមួយគ្នានេះ លោក សយ ស៊ីណុល បានអំពាវនាវដល់ម្ចាស់ដីទាំងឡាយដែលកំពុងទុកដីនៅទំនេរកណ្ដាលក្រុង គួរគិតគូរជួយប្រែក្លាយដីទាំងនោះ ឱ្យមានប្រយោជន៍ ពិសេសពាក់ព័ន្ធនឹងការសង់ជាសណ្ឋាគារ ផ្ទះសំណាក់ ភោជនីយដ្ឋាន អាហារដ្ឋានតាមស្ដង់ដារដែលខេត្ដនេះកំពុងខ្វះខាត។
ដោយឡែក ប្រភពពីអ្នកគ្រប់គ្រងសណ្ឋាគារឋានសួគ៌បូកគោ បានឱ្យដឹងថា នាពេលនេះ សណ្ឋាគារមានបន្ទប់ចំនួន ៤១៨ បើកបម្រើជូនអតិថិជន ដោយបន្ទប់ទាំងនោះ មានពីរប្រភេទ គឺតម្លៃ ៥០ ដុល្លារ និង ១០០ ដុល្លារ៕ S
CEN
កំពត: គិតតែរយៈពេលពីរថ្ងៃ ចាប់ពីថ្ងៃអាទិត្យ និងថ្ងៃចន្ទ ក្នុងឱកាសព្រះរាជពិធីបុណ្យចម្រើនព្រះជន្ម ព្រះករុណា ព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត្រ នៃព្រះរាជាណាចក្រកម្ពុជា មានអ្នកទេសចរជាតិ និងអន្តរជាតិប្រមាណជាងបីម៉ឺននាក់ បាននាំគ្នាឡើងទៅកម្សាន្ដលើកំពូលភ្នំបូកគោ ក្នុងខេត្តកំពត។ រមណីយដ្ឋានឋានសួគ៌បូកគោ បានសម្ពោធដាក់ឱ្យប្រើប្រាស់កាលពីថ្ងៃទី៣ ខែឧសភា ឆ្នាំ២០១២ ក្រោមអធិបតីភាពសម្ដេចនាយករដ្ឋមន្ដ្រី ហ៊ុន សែន។
ប៉ុន្តែអ្វីដែលជាការសោកស្ដាយនោះ គឺសេវាកម្មពាក់ព័ន្ធមួយចំនួន ស្ថិតក្នុងភាពអន់ខ្សោយ ពិសេសផ្នែកសណ្ឋាគារ ផ្ទះសំណាក់ ភោជនីយដ្ឋាន និងអាហារដ្ឋានកំពុងខ្វះខាត គឺមិនមានគ្រប់គ្រាន់សម្រាប់អ្នកទេសចរ ដែលកំពុងកើនឡើងយ៉ាងច្រើនសន្ធឹកសន្ធាប់នាពេលនេះឡើយ។
អ្នកគ្រប់គ្រងវិស័យទេសចរណ៍ទទួលស្គាល់នូវអ្វីដែលអវិជ្ជមាន ព្រោះជារឿងថ្មី មិនធ្លាប់នឹកស្មានដល់ ហើយអំពាវនាវចំពោះអ្នកមានអាជីព មានជំនាញ និងទ្រព្យធន ជួយគិតគូរពង្រីកបន្ថែមទាំងបរិមាណ និងគុណភាពលើវិស័យឧស្សាហកម្មគ្មានផ្សែងជាអាទិភាព។
លោក សយ ស៊ីណុល ប្រធានមន្ទីរទេសចរណ៍ខេត្ដកំពត បានឲ្យដឹងថា បញ្ហាកង្វះបន្ទប់ស្នាក់នៅ និងអាហារដ្ឋាន ក្នុងក្រុងកំពត កំពុងកើតមាន ព្រោះតែរយៈពេលចុងក្រោយនេះ ភ្ញៀវបានសម្រុកមកលេងយ៉ាងគំហុក។ នេះជារឿងថ្មីសន្លាង ដែលពីមុនមកមិនធ្លាប់ទទួលបានភ្ញៀវដ៏ច្រើនបែបនេះទេ។ ម្ល៉ោះហើយ ទាំងសេវាកម្មទទួលភ្ញៀវ ទាំងបែបបទផ្សេងៗ ពិតជាជួបការលំបាក ទោះបីជាកន្លងមកមន្ទីរជំនាញធ្លាប់ណ្ដុះបណ្ដាលលើការងារនេះជា រៀងរាល់ឆ្នាំក្ដី ដោយសារអ្នកធ្លាប់ទទួលបានជំនាញភាគច្រើនធ្វើបន្លាស់ទី។ ឯអ្នកមកថ្មីក៏មិនទាន់មានបទពិសោធន៍ ហើយរឿងដែលសំខាន់គឺការខ្វះខាតតែម្ដង។
ជាក់ស្ដែងក្នុងថ្ងៃចម្រីនព្រះជន្មព្រះមហាក្សត្រខ្មែរ គិតត្រឹមតែរយៈពេលពីរថ្ងៃនេះ គឺថ្ងៃទី១៣ និងទី១៤ ខែឧសភា ភ្ញៀវចូលមកកាន់ខេត្ដកំពតមានប្រមាណជាងបីម៉ឺននាក់។ ក្នុងនោះទីដែលទេសចរចាប់អារម្មណ៍ គឺភ្នំបូកគោ ដែលថ្ងៃទីមួយ (១៣ ឧសភា) មានរថយន្ដចំនួន ៨១៦ គ្រឿង និងថ្ងៃទីពីរចំនួន ២.៣៣៨ គ្រឿង បានឡើងទៅកម្សាន្ដ។
សព្វថ្ងៃនេះ ដោយមិនគិតបញ្ចូលសណ្ឋាគារឋានសួគ៌បូកគោ នៅខេត្ដកំពត មានសណ្ឋាគារប្រាំ ផ្ទះសំណាក់ ៥៦ រួមមាន ១.០៦០ បន្ទប់។ តែពីរយប់នោះ ភ្ញៀវខ្វះកន្លែងសម្រាក រហូតអ្នកខ្លះវិលត្រឡប់ទៅសម្រាកនៅខេត្ដតាកែវ និងខ្លះវិលទៅភ្នំពេញ ទាំងយប់។ រីឯកន្លែងទទួលទានអាហារវិញក៏មានការខ្វះខាតផងដែរ ដោយអ្នកខ្លះនាំគ្នាទៅក្រាលកន្ទេលហូបនៅតាមឆ្នេរព្រែក ព្រោះតែរកអាហារដ្ឋាន និងភោជនីយដ្ឋានមិនបាន។
លោកបានកោតសរសើរដល់ភ្ញៀវផងដែរថា ទោះជាពួកគាត់បរិភោគពាសវាលពាសកាលមែន តែមិនបានរំខានចំពោះបរិស្ថានទេ ត្បិតពួកគាត់មានការទទួលខុសត្រូវខ្ពស់ ចេះវេចខ្ចប់កាកសំណល់ និងសំរាមផ្សេងៗបោះចូលធុង ដែលកាយវិការបែបនេះគួរឱ្យអ្នកដទៃបន្ដយកគំរូ ដើម្បីសោភ័ណភាព អនាម័យទីក្រុងទេសចរណ៍ទាំងអស់គ្នា។
ជាមួយគ្នានេះ លោក សយ ស៊ីណុល បានអំពាវនាវដល់ម្ចាស់ដីទាំងឡាយដែលកំពុងទុកដីនៅទំនេរកណ្ដាលក្រុង គួរគិតគូរជួយប្រែក្លាយដីទាំងនោះ ឱ្យមានប្រយោជន៍ ពិសេសពាក់ព័ន្ធនឹងការសង់ជាសណ្ឋាគារ ផ្ទះសំណាក់ ភោជនីយដ្ឋាន អាហារដ្ឋានតាមស្ដង់ដារដែលខេត្ដនេះកំពុងខ្វះខាត។
ដោយឡែក ប្រភពពីអ្នកគ្រប់គ្រងសណ្ឋាគារឋានសួគ៌បូកគោ បានឱ្យដឹងថា នាពេលនេះ សណ្ឋាគារមានបន្ទប់ចំនួន ៤១៨ បើកបម្រើជូនអតិថិជន ដោយបន្ទប់ទាំងនោះ មានពីរប្រភេទ គឺតម្លៃ ៥០ ដុល្លារ និង ១០០ ដុល្លារ៕ S