ថ្ងៃទី 16-03-2012 ម៉ោង 10:20:15 សៀមរាប ៖ រថយន្តសេរីទំនើបមួយគ្រឿងបានឆាបឆេះចេញពីម៉ាស៊ីនរថយន្ត ខណៈកំពុងបើកបរ ត្រូវបានប្រជាពលរដ្ឋនិង សមត្ថកិច្ចមូលដ្ឋានជួយអន្តរាគមន៍ទាន់ពេលវេលាកាលពីម៉ោង៨និង៣០ ព្រឹកថ្ងៃទី១៦ខែមីនា ឆ្នាំ២០១២នៅលើកំណាត់ផ្លូវជាតិលេខ៦ មុខធនាគារANZ ផ្សារលើ ភូមិចុងកៅស៊ូ សង្កាត់ស្លក្រាម ក្រុងសៀមរាប ខេត្តសៀមរាប។
រថយន្តដែលឆេះម៉ាកឡិចស៊ីសRX300 ពណ៌ស្ករ ពាក់ស្លាកលេខ សៀមរាប 2A-6128 បើកមកពីកើតមកលិច លុះមកដល់កន្លែងកើតហេតុ ស្រាប់តែមានផ្សែងហុយនិងមានអណ្ដាតភ្លើង ឆេះឡើងតែម្ដងធ្វើឲ្យអ្នកបើកបរដែលមានឈ្មោះ អាំ សំអាត ភេទប្រុស អាយុជាង៥០ឆ្នាំជាមន្ត្រីថ្នាក់ដឹកនាំនៅក្នុង ខេត្តសៀមរាបព្រលឹងចុងសក់។
ស្របពេលជាមួយគ្នានេះ ពលរដ្ឋខ្លះបានយកដីខ្សាច់បាចពន្លត់ ខ្លះទៀតយកបំពង់ពន្លត់អគ្គិភ័យ មកជួយបាញ់ពន្លត់ ទើបបានរលត់ទៅវិញ។ ហេតុការណ៍នេះមិនបណ្តាលឲ្យគ្រោះ ថ្នាក់ជីវិតមនុស្សឡើយ៕
