នាងពិល រឿត អាយុ៣៤ឆ្នាំ កំពុងរស់នៅ ជាមួយប្តីចាស់ ដែលត្រូវជាអ៊ំបង្កើត ក្នុងខ្ទមធ្លុះធ្លាយ រខេករខាកនាភូមិបន្ទាយស្រី ឃុំខ្នារសណ្តាយ ស្រុក បន្ទាយស្រី ខេត្តសៀមរាប បានរៀបរាប់ថា នាងធ្លាប់ មានប្តីទី១ ឈ្មោះលេន លន អាយុស្របាលគ្នា ប៉ុន្តែ គេចេញទៅរកស៊ីនៅស្រុកសៀម ក៏មានប្រពន្ធថ្មីទៀត ដោយបោះបង់នាងចោលឱ្យនៅមេម៉ាយជាមួយកូន ៣នាក់។ ដោយសារជីវភាពខ្វះខាតពេក នាងតែង តត្រុកដើរស៊ីឈ្នួលជួលព័ទ្ធគេ ជួនទៅម្នាក់ឯង ជួន ទៅជាមួយអ៊ំប្រុសឈ្មោះឌួង គិន ដែលជាបងប្រុស របស់ម្តាយនាង ព្រោះគាត់ពោះម៉ាយដែរ ជួនកាល ត្រូវដេកតែពីរនាក់ នៅកន្លែងស៊ីឈ្នួលតែម្តង។ បើទៅស៊ីឈ្នួលច្រូតស្រូវត្រូវដេកនៅវាលស្រែ ក្បែរគំនរ កណ្តាប់ ម្នាក់ៗរងាឱបដៃកំប្រោន ព្រោះត្រូវតំណក់ ទឹកសន្សើម។ លុះយូរៗទៅ អ៊ំប្រុសក៏លួងលោមសុំ ស្នេហ៍ពីនាង ដែលមុនដំបូង នាងប្រកែកដែរ ព្រោះមិនដែលមានអ៊ំឯណាយកក្មួយធ្វើប្រពន្ធនោះទេ។ ទោះជានាងប្រកែកយ៉ាងនេះក្តី ក៏អ៊ំនៅតែព្យាយាម សួរចិត្តនាងរាល់ថ្ងៃ ទើបនាងគិតថា រស់ជាស្រីមេម៉ាយ ពិបាកណាស់ ណាមួយកូនក៏នៅតូចៗ គ្មានឪពុកជាបង្អែក ទើបនាងសម្រេចចិត្តយកអ៊ំធ្វើប្តីទៅ ដោយពុំបានសែនព្រេន ឬរៀបការអ្វីទេ។ ចាប់តាំងពីបានរួមដំណេកជាមួយគ្នាម្តងមក នាងទទួលស្គាល់ថា អ៊ំប្រុសពូកែថ្នមនាងណាស់ មិនដូចប្តីមុននោះទេ គាត់បានផ្តល់រសជាតិស្នេហាពិតៗដល់នាង ធ្វើឱ្យនាងពេញចិត្តពេញថ្លើម រហូតហៅគាត់ថា “បង” វិញ។
នាងពិល រឿត បន្តថា សព្វថ្ងៃ ប្តីអ៊ំបាននាំនាង និងកូនមករស់នៅក្នុងព្រៃនេះ ប្រកបរបរដាំដុះ និង ដុតធ្យូងលក់បន្តិចបន្តួច បានត្រឹមអង្ករច្រកឆ្នាំង មួយថ្ងៃៗប៉ុណ្ណោះ ឯថ្ងៃខ្លះដាច់អង្ករ ក៏រត់ទៅខ្ចីចិន ហូបសិនទៅ ទម្រាំលក់ធ្យូងបាន ចាំទូទាត់សងវិញ។ នាងតូចចិត្តនឹងវាសនាខ្លួនឯងដែរ ព្រោះតាំងពីបានអ៊ំធ្វើប្តីពេលណាមក រកស៊ីអ្វីក៏មិនឡើងដែរ ហើយ បើប្រៀបធៀបជាមួយប្តីមុន ឃើញថា យ៉ាប់ជាងទៅទៀត។ សព្វថ្ងៃ ពុំត្រឹមតែរកស៊ីស្ទើរចិញ្ចឹមកូនមិន រស់នោះទេ តែឪពុកម្តាយបងប្អូននាងខឹងសម្បាខ្លាំងណាស់ មិនដែលមកសួរសុខទុក្ខអ្វីទេ ឯរូបនាងក៏អាម៉ាស់មុខ សុខចិត្តសម្ងំក្នុងព្រៃនេះ ជារៀងរហូត ហើយ។
ដោយឡែក លោកតាឌួង គិន អាយុជាង៦០ ឆ្នាំ ជាអ៊ំប្រុស និងក្លាយជាប្តី បានឱ្យដឹងថា គាត់ធ្លាប់ មានប្រពន្ធមុនឈ្មោះញយ ទួន អាយុស្របាលគ្នា រួម រស់ជាមួយគ្នាបង្កើតបានកូន៦នាក់ ប៉ុន្តែ ជាអកុសល ប្រពន្ធនោះបានស្លាប់ចោលគាត់តាំងពីឆ្នាំ២០០៥ម៉្លេះ។ គាត់ពោះម៉ាយបានត្រឹម៦ខែ តែងដើរស៊ីឈ្នួលជាមួយ ក្មួយស្រីមេម៉ាយ ក៏ត្រូវរ៉ូវគ្នាយកជាប្តីប្រពន្ធទៅ។ ក្មួយស្រីនេះ មានឪពុកឈ្មោះពិល ថន និងម្តាយឈ្មោះ ឌួង ខុន ត្រូវជាប្អូនបង្កើតរបស់គាត់ រូបនាងជាកូន ទី៤ ក្នុងចំណោមបងប្អូន៨នាក់។ មូលហេតុដែល គាត់យកនាងពិល រឿត ជាក្មួយធ្វើប្រពន្ធ ក៏ដោយសារគាត់ដើរធ្វើការរកស៊ីពិបាកពេក គាប់ជួនក្មួយស្រី នេះ ត្រូវប្តីបោះបង់ចោលថ្មីៗផងនោះ គាត់ចេះតែអាណិតធ្ងន់ទៅៗ ទើបប្រថុយសួរចិត្តនាង សុំក្តីប្រតិព័ទ្ធ។ មុនដំបូង នាងប្រកែកដែរ ប៉ុន្តែ លុះគាត់លួងលោម យូរៗទៅ ស្របពេលកំពុងដេកនៅវាលស្រែ ក្រោមតំណក់ទឹកសន្សើម រងាឱបដៃផងនោះ ក្មួយស្រីក៏ព្រមចូលក្នុងរង្វង់ដៃគាត់ទៅ។ ចំពោះរឿងសុខទុក្ខពេល យប់ព្រលប់នោះ អត់បញ្ហាទេ ព្រោះទាំងអ៊ំ ទាំងក្មួយ សុទ្ធតែមានការពិសោធន៍ក្នុងរឿងជីវិតដូចគ្នា ប៉ុន្តែ អ្វីដែលពិបាកដោះស្រាយនោះ គឺជីវភាពតែម្តង។ តាំងពីចាប់ដៃគ្នាមក រកស៊ីអ្វីក៏មិនឡើងសោះ ឆុងគ្នារហូត ពុំដឹងមូលហេតុអ្វីទេ នឹងថា មកពីខ្ជិលក៏មិន ត្រូវដែរ ព្រោះម្នាក់ៗ ខំណាស់ តែអត់ណាស់។ សូម្បីតែខ្ទម ក៏រកស្បូវប្រក់មិនបានផង ជញ្ជាំងក៏គ្មានពេល ភ្លៀងម្តងៗ ទាល់តែនាំកូនៗឡើងអង្គុយ ព្រោះអត់កន្លែងដេក។
នាងមឿន ផ្លន់ អាយុ៣០ឆ្នាំ ជាអ្នកជិតខាង បាន ឱ្យដឹងថា រូបនាងពុំសូវដឹងពីប្រវត្តិស្នេហ៍របស់ប្តីប្រពន្ធ អ៊ំ និងក្មួយនេះឡើយ តែក៏ធ្លាប់ឮពួកគាត់និយាយ ដូចបទសម្ភាសន៍អ៊ីចឹង។ គ្រួសារនេះក្រខ្លាំងណាស់ រស់ក្នុងខ្ទមដំបូលប្រក់មេឃ តែពួកគាត់ពុំដែល ឈ្លោះគ្នាទេ ទោះជាអត់ឃ្លានយ៉ាងណាក៏ដោយចុះ។
លោកសួង សៃ អាយុ៥០ឆ្នាំ ជាអ្នកជិតខាង បានឱ្យដឹងថា គាត់ក៏មិនសូវដឹងពីប្រវត្តិរបស់ប្តីចាស់ ប្រពន្ធក្មេងនេះដែរ ព្រោះពួកគេនាំគ្នាមករស់នៅក្នុងព្រៃ ធ្វើចម្ការបន្តិចបន្តួច និងដុតធ្យូងលក់។ គាត់ អាណិតដែរ ព្រោះឃើញជីវភាពយ៉ាប់យ៉ឺនពេក តែក៏មិនដឹងជាជួយយ៉ាងម៉េចកើតដែរ មានតែខ្លួនទីពឹង ខ្លួនប៉ុណ្ណោះ។
គួរបញ្ជាក់ថា ច្បាប់រដ្ឋប្បវេណីពីបុរាណ និង ច្បាប់បច្ចុប្បន្ន បានហាមឃាត់ញាតិកា៧សន្តាន ឬ៧ ជួរមិនឱ្យយកគ្នា ជាប្តីប្រពន្ធទេ ដោយគិតត្រឹមថ្នាក់សាមីខ្លួន ទៅថ្នាក់ឪពុកម្តាយ ថ្នាក់ជីដូនជីតា ថ្នាក់ជីដូនជីតាទួត ថ្នាក់កូន ថ្នាក់ចៅ និងថ្នាក់ចៅទួត។ ដូច្នេះ រវាងអ៊ំប្រុស នឹងក្មួយស្រី ដែលយកគ្នាជាប្តី ប្រពន្ធនេះ ឃើញថា ខុសច្បាប់ទាំងស្រុង ប៉ុន្តែ ធ្វើម្តេច និស្ស័យស្នេហ៍របស់មនុស្សលោក៕អត្ថបទAgkor thom
