ថ្ងៃទី 20-03-2012 ម៉ោង 18:06:46 បន្ទាយមាន ជ័យ៖ មនុស្សប្រុស-ស្រី ២ក្រុមមានគ្នា ៧នាក់ដែលបង្កហិង្សា នៅផ្ទះប្រធានភូមិបណ្តាលឲ្យភាគីម្ខាងទទួលរងរបួសស្រាល២នាក់ត្រូវ នគរបាលស្រុកម៉ាឡៃចាប់ខ្លួន ដើម្បីយកមក សាកសួរនៅអធិការដ្ឋាននគរបាលស្រុក។ ហេតុការណ៍វាយតប់គ្នានេះកើតឡើងនៅវេលាម៉ោង១និង១៥នាទីរសៀល ថ្ងៃទី១៩ ខែមីនា ឆ្នាំ២០១២ នៅចំណុចភូមិបល្ល័ង្គ ឃុំតាគង់ ស្រុកម៉ាឡៃ ខេត្តបន្ទាយមានជ័យ។
លោកវរសេនីយ៍ត្រី សៅ ប៊ុន បានបន្តឲ្យដឹងថា ក្រុមទី១មានគ្នា៥នាក់ ១-កែវ សារិទ្ធ ភេទប្រុស អាយុ៤៩ឆ្នាំ, ២-អ៊ិច អឿង ភេទប្រុស អាយុ៣៣ឆ្នាំ, ៣-អ៊ិច អិល ភេទប្រុស អាយុ២៨ឆ្នាំ, ៤-អ៊ិច ធន ភេទប្រុស អាយុ២៥ឆ្នាំ និង៥-សោម អ៊ើយ ភេទស្រី អាយុ៥៥ ឆ្នាំ។ ចំណែកក្រុមទី២មានគ្នា២នាក់ ១-ទូច ប៉ុន ភេទប្រុស អាយុ៦៥ឆ្នាំ ២-គង់ សុភ័ណ ភេទប្រុស អាយុ៣១ ឆ្នាំ ក្រុមទាំងនេះរស់នៅភូមិ ឃុំ ខាងលើជាមួយគ្នា។ រឿងហេតុកើតឡើង មុនដំបូងក្រុមទី២ បានចុះទៅកាប់ដើមឈើចូលដី ចំការក្រុមទី១។ នៅពេលនោះក្រុមទី១បានចុះមកហាមឃាត់មិនឲ្យកាប់ដើមឈើក្នុងដី របស់ខ្លួន ហើយក៏មានទាស់ពាក្យសំដីគ្នាទៅវិញទៅមកបម្រុងឈានដល់ប្រើអំពើ ហិង្សានៅកន្លែងដីចំការ។
លោកអធិការនគរបាលស្រុកម៉ាឡៃបាន ឲ្យដឹងទៀតថា ដោយមានការចូលសម្រប សម្រួលពីប្រជាពលរដ្ឋ ទើបពួកគេទាំង២ក្រុម មិន ប្រើអំពើហិង្សា ហើយបានដឹកដៃគ្នាទៅនិយាយសម្របសម្រួលនៅផ្ទះប្រធានភូមិបល្ល័ង្គ ប៉ុន្តែសម្របសម្រួលគ្នាមិនត្រូវ ក៏ឈានដល់ការប្រើហិង្សាដាក់គ្នា ដោយភាគីម្ខាងៗប្រើកាំបិត ជាអាវុធថែមទៀតផង ។
លទ្ធផលចុងក្រោយគឺក្រុមមានគ្នា ៥នាក់វាយទៅលើក្រុមមានគ្នា២នាក់បណ្តាល ឲ្យរងរបួសស្រាល។ បច្ចុប្បន្នក្រុមគូទំនាស់ទាំង៧នាក់ត្រូវ សមត្ថកិច្ចស្រុកម៉ាឡៃចាប់បញ្ជូនទៅស្នងការដ្ឋាននគរបាលខេត្តដើម្បី ចាត់ការតាមនីតិវិធី ៕
