ដោយ ៖ អ.សុផល
ថ្ងៃទី 08-03-2012 ម៉ោង 14:47:18 ខេត្តកំពង់ចាម៖ ជនសង្ស័យម្នាក់បានយកកាំភ្លើងជ័រធ្វើសកម្មភាពភ្ជង់ និងប្លន់យកម៉ូតូរបស់សិស្សសាលា ប៉ុន្តែត្រូវបានប្រជាពលរដ្ឋ និងសមត្ថកិច្ចដេញចាប់ខ្លួនបានកាលពីម៉ោង៦និង៣០នាទី ព្រឹកថ្ងៃទី៧ ខែមីនា ឆ្នាំ២០១២ ស្ថិតនៅភូមិច្រណោម ឃុំបុសខ្នុរ ស្រុកចំការលើ ខេត្តកំពង់ចាម។
ជនសង្ស័យប្លន់ម៉ូតូបានហើយរត់ មិនរួចឈ្មោះ អ៊ន សុភា អាយុ២៤ឆ្នាំ រស់នៅភូមិតារៀម ឃុំជ្រៃវៀន ស្រុកព្រៃឈរ ខេត្តកំពង់ចាម។ រីឯជនរងគ្រោះឈ្មោះអុល ឆេងហួ ភេទស្រី អាយុ១៧ឆ្នាំ ជាសិស្សវិទ្យាល័យបុសខ្នុរ និងមានទីលំនៅភូមិ ឃុំកើតហេតុ។
នគរបាលបានបញ្ជាក់ថា នៅមុនពេលកើតហេតុជនរងគ្រោះបានជិះម៉ូតូម៉ាកសេ ១២៥ចេញពីផ្ទះបម្រុងទៅសាលារៀនស្រាប់តែជួបជនសង្ស័យស្ទុះចេញស្ទាក់ ហើយយកកាំភ្លើងជ័រមក ភ្ជង់គំរាមជនរងគ្រោះថា ប្រយ័ត្នអញ់បាញ់ ទើបធ្វើឲ្យនាងភិតភ័យក៏រត់ចោលម៉ូតូតែម្តង។ បន្ទាប់មកជនសង្ស័យបានជិះម៉ូតូគេចខ្លួនតែរត់មិនរួច ៕
