ដោយ ៖ សហការី
ថ្ងៃទី 22-03-2012 ម៉ោង 09:27:02 ខេត្តកោះកុង ៖ នៅថ្ងៃទី ២១ ខែមីនា ឆ្នាំ២០១២ វេលាម៉ោង ០៨និង៣០នាទីព្រឹក មានកើតឡើងនូវសកម្មភាពលួចគាស់ផ្ទះយកទូដែកមួយបានកើតឡើងខណៈ ពេលដែលម្ចាស់ផ្ទះចាក់សោរចេញពីផ្ទះអស់ ។ ក្រុមចោរមានគ្នា ៤នាក់ បានធ្វើសកម្មភាពលួចគាស់ផ្ទះរបស់លោក ពេជ្រ ពិសិដ្ឋ ស្នងការរងនគរបាលខេត្តកោះកុង នៅចំណុចភូមិស្ទឹងវែង សង្កាត់ស្ទឹងវែង ក្រុងខេមរភូមិន្ទ ខេត្តកោះកុង ។
ក្រោយកើតហេតុភ្លាមៗ ក្រោមការដឹកនាំបញ្ចារផ្ទាល់របស់ លោកឧត្តសេនីយ៍ត្រី សំឃិត វៀន ស្នងការនគរ បាល បញ្ជាដល់កងកម្លាំងមានភារកិច្ចប្រតិបត្តិការទាំងអស់ ធ្វើការរុករក និងស្ទាក់នៅតាមផ្លូវឆ្ពោះចេញពីខេត្តជាបន្ទាន់ ។ ក្រោយពីទទួលព័ត៌មានរបស់ លោកឧត្តសេនីយ៍ត្រី សំឃិត វៀន ស្នងការនគរបាល លោកវរសេនីយ៍ត្រី ស៊ុន ឃៀម អធិការ ស្រុកកោះកុង បានដាក់កម្លាំងចំនួន ១២នាក់ ចេញល្បាត និង ស្ទាក់ចាប់បានជនសង្ស័យចំនួន ០៤នាក់ នៅតាមផ្លូវជាតិលេខ៤៨ នៅវេលាម៉ោង៩ព្រឹកគត់ ថ្ងៃខែឆ្នាំដដែល នៅចំនុចភូមិដីទំនាប ឃុំត្រពាំងរូង ស្រុកកោះកុង ខេត្តកោះកុង ។
ជនសង្ស័យទាំង០៤នាក់ ទី១.ឈ្មោះ ធឿន អ៊ីម ភេទប្រុស អាយុ២៧ឆ្នាំ ស្រុកកំនើត ភូមិកោះធំ ឃុំកោះធំ ស្រុកកោះធំ ខេត្តកណ្តាល ទី២.ឈ្មោះ នី សំណាន ភេទប្រុស អាយុ២២ឆ្នាំ ស្រុកកំនើត ភូមិព្រែកសំរោង ឃុំព្រែកសំរោង ក្រុងតាខ្មៅ ខេត្តកណា្តល ទី៣.ឈ្មោះ ហែល នី ភេទប្រុស អាយុ២៧ឆ្នាំ ស្រុកកំនើត ភូមិព្រែកសំរោង ឃុំព្រែកសំរោង ក្រុងតាខ្មៅ ខេត្តកណា្តល និងទី៤.ឈ្មោះ សុខ ទ្រី ភេទប្រុស អាយុ១៦ឆ្នាំ ស្រុកកំនើត សង្កាត់ទឹកថ្លា ខណ្ឌសែនសុខ រាជធានីភ្នំពេញ ។ វត្ថុតាងដែលសមត្ថកិច្ចធ្វើការដកហូតបានរួមមាន៖ រថយន្តម៉ាក TICO (ទីកូ) មួយគ្រឿង ពណ៌ទឹកប៊ិចលាយទឹកប្រាក់ ពាក់ស្លាកលេខ ភ្នំពេញ 2A.6729 សោរលេខ៨ ចំនួន ០២ ដង្កាប់ចំនួន ០១ ទូរស័ព្ទដៃ ចំនួន ០២ នាឡិកាដៃ ចំនួន ០១ ប្រាក់បាត ចំនួន ២៧៤០៥០បាត និងគ្រឿងអលង្ការមួយចំនួនធំ ។
បច្ចុប្បន្ន កំលាំងអធិការដ្ឋាននគរបាលស្រុកកោះកុង កំពុងបំពេញសំនុំរឿងបញ្ជូនទៅកាន់ស្នងការនគរបាលខេត្តកោះកុង ដើម្បីបញ្ជូនជនសង្ស័យទៅសាលាដំបូងខេត្តកោះកុង ចាត់ការតាមផ្លូវច្បាប់ ៕
