ដោយ ៖ វិច្ឆិកា
ថ្ងៃទី 28-03-2012 ម៉ោង 14:47:50 បន្ទាយមាន ជ័យ៖ យុវជនម្នាក់នៅតែ៣ថ្ងៃទៀតចូលរោងការបែជាលួចទៅជក់គ្រឿងញៀនជាមួយ មិត្តភក្តិ២នាក់ទៀតត្រូវនគរបាលក្រុងសិរីសោភ័ណចុះល្បាតចាប់ ឃាត់ខ្លួនដើម្បីកសាងសំណុំរឿងបញ្ជូនទៅតុលាការ។ ការចាប់ខ្លួននេះ ធ្វើឡើងកាលពីថ្ងៃទី២៧ ខែមីនា ឆ្នាំ២០១២ នៅចំណុចពុំ នូកស្រូវកណ្តាលវាលស្រែ ក្បែរស្ពានទី២ បឹងឈូក ស្ថិតនៅភូមិ១ សង្កាត់ព្រះ ពន្លា ក្រុងសិរីសោភ័ណ ខេត្តបន្ទាយមានជ័យ។
លោកវរសនីយ៍ត្រី រ៉ែម វិរៈ អធិការនគរបាលក្រុងសិរីសោភ័ណបានប្រាប់ អ្នកយកព័ត៌មានឲ្យដឹងថាយុវជនទាំង៣នាក់មានឈ្មោះ ១-ជីវ ផាន់ណា អាយុ២០ ឆ្នាំប្រកបមុខរបរមិនពិតប្រាកដ, ២-តាំង បញ្ហា អាយុ១៩ ឆ្នាំ មានមុខ របរមិនពិតប្រាកដ និង ៣-អ៊ុន គឹមហុង អាយុ២០ឆ្នាំ ប្រកបមុខតបរកម្មករ ពួកគេទាំងនេះបច្ចុប្បន្នរស់នៅភូមិចក្រី ឃុំជប់វ៉ារី ស្រុកព្រះនេត្រព្រះ ខេត្តបន្ទាយមានជ័យ។ ជាមួយនឹងការ ឃាត់ខ្លួននេះដែរ សមត្ថកិច្ច ដកហូតបានថ្នាំញៀន មេតំហ្វេតាមីន១គ្រាប់និងម៉ូតូ ម៉ាកហុងដា C១២៥ ស៊េរីឆ្នាំ២០១១ ពណ៌ខ្មៅ ពាក់ស្លាកលេខ បន្ទាយមានជ័យ ១E ៧៧៩៣មួយគ្រឿង។
លោកវរសេនីយ៍ត្រី រ៉ែម វិរៈ បានបន្តឲ្យដឹងទៀតថា កាលពីល្ងាចថ្ងៃទី២៧ ខែមីនា នៅពេលសមត្ថកិច្ចចុះល្បាតរកមុខសញ្ញាចោរ ឆក់ខ្សែកនៅផ្លូវលេខ២ ខណៈដែលសមត្ថកិច្ចចុះទៅដល់ចំណុចខាងលើស្រាប់ តែឃើញពួកគេទាំង៣នាក់គួរឲ្យសង្ស័យ ។ បន្ទាប់មកសមត្ថកិច្ចបានចុះទៅសួរ នាំពួកគេនិងឆែកឆេររកឃើញថ្នាំញៀនមួយគ្រាប់ ហើយបន្ទាប់មក បានចាប់បញ្ជូនមកអធិការដ្ឋាននគរបាលក្រុងដើម្បីយកមកសាកសួរបន្តទៀត ។
លោកអធិការនគរបាលក្រុងសិរីសោភ័ណបានបញ្ជាក់ឲ្យដឹងទៀតថានៅ ចំពោះមុខសមត្ថកិច្ចយុវជនសង្ស័យបានឆ្លើយសារភាពថាពួកគេមកពីផ្ទះ ជិះម៉ូតូមកទិញថ្នាំញៀននៅចំណុចស្ថានីយ៍រថរទះភ្លើង ក្នុងក្រុងសិរីសោភ័ណ ដើម្បីយកមកជក់។ ខណៈ ដែលបម្រុងនិងជក់ស្រាប់តែសមត្ថកិច្ចមកចាប់ ឃាត់ខ្លួនតែម្តង។
លោកវរសេនីយ៍ត្រី រ៉ែម វិរៈ បានបន្តឲ្យដឹងទៀតថា ក្នុងចំណោមពួកគេ ទាំង៣នាក់ មានយុវជនម្នាក់ឈ្មោះ អ៊ុន គឹមហុង (ឈរនៅចំកណ្តាល) នឹង ចូលរោងការនៅថ្ងៃទី៣០ ខែមីនាខាងមុខនេះថែមទៀតផង។ លុះនៅព្រឹកថ្ងៃទី២៨ ខែមីនា ឪពុករបស់គេមកសុំធានាកូនគាត់ឲ្យក្រៅឃុំ ពីព្រោះកូនគាត់ហ្នឹងជិតដល់ថ្ងៃចូលរោងការខាងកូនក្រមុំគេព្រួយ បារម្មណ៍ ប្រសិនគ្មានមុខកូនកម្លោះទេ តើត្រូវរៀបចំពិធីមង្គលការរបៀបណា បើអ្វីៗកក់គេរួចអស់ និងបានហៅភ្ញៀវរួចរាល់ផងដែរ។
លោកអធិការនគរបាលក្រុងសិរីបាន បញ្ជាក់ប្រាប់ឪពុកយុវជន ឈ្មោះ អ៊ុន គឹមហុង វិញថារឿងទាំងនេះខាងលោកមិនមានសិទ្ធិសម្រេចឲ្យកូនគាត់នៅ ក្រៅឃុំបានទេ គឺមានតែលោកព្រះរាជអាជ្ញាអមសាលាដំបូងខេត្ត ទើបមានសិទ្ធិ សម្រេចយ៉ាងណានោះ៕
