យោងតាមសេចក្ដីប្រកាសព័ត៌មានរបស់ស្ថានទូតជប៉ុនឲ្យដឹងថា នាវេលាម៉ោង៤រសៀលថ្ងៃអង្គារ នេះ រដ្ឋាភិបាលជប៉ុន នឹងធ្វើពិធីផ្ដល់ប្រាក់ចំនួន៩០,៩០០ដុល្លារទៅឲ្យគណៈកម្មាធិការ តស៊ូមតិនៃសមាគម-អង្គការមិនមែនរដ្ឋាភិបាល សម្រាប់គម្រោងបោះពុម្ពឯកសារព័ត៌មានស្ដីពីការបោះឆ្នោតជ្រើសរើស សមាជិកក្រុមប្រឹក្សាឃុំ-សង្កាត ។
សេចក្ដីប្រកាសនោះបានលើកឡើងថា ស្ថានទូតជប៉ុនប្រចាំកម្ពុជា បានបង្ហាញថា ក្រោមគម្រោងការនៃកិច្ចសហប្រតិបត្តិការសេដ្ឋកិច្ចរបស់ជប៉ុន ជំនួយឧបត្ថម្ភឥតសំណងសម្រាប់គម្រោងទ្រង់ទ្រាយតូចសន្តិសុខ មនុស្សជាតិ ( ជំនួយ គូណាណូណិ ) នឹងត្រូវចុះហត្ថលេខាដោយឧបទូតស្ថានទូតជប៉ុនប្រចាំកម្ពុជា គឺ លោក ការ៉ាមូរា ហ៊ីរ៉ូស៊ី និង ប្រធានគណកម្មាធិកាតស៊ូមតិនៃសមាគម-អង្គការមិនមែនរដ្ឋាភិបាល លោក ម៉ុក ម៉ៃល នៅស្ថានទូតជប៉ុន នារសៀលម៉ោង៤ថ្ងៃទី១៣ ខែមិនា ឆ្នាំ២០១២ នេះ៕
