ដោយ ៖ វិច្ឆិកា
ថ្ងៃទី 23-03-2012 ម៉ោង 17:43:24
ខេត្ដបន្ទាយមានជ័យ ៖ ស្ដ្រីម្នាក់បាន លេបថ្នាំសម្លាប់ខ្លួនហើយក៏ដាច់ខ្យល់ ស្លាប់ក្នុងមន្ទីរពេទ្យចោលកូនប្រុសស្រី៥ នាក់ដោយសារតែខឹងប្ដីបោះសំបកកង់ គោយន្ដត្រូវចំមុខ បន្ទាប់ពីក្រុមគ្រួសារ ដឹកយកទៅសង្គ្រោះនៅមន្ទីរពេទ្យ។ ហេតុ ការណ៍នេះកើតឡើងកាលពីវេលាម៉ោង៣រសៀល ថ្ងៃទី២១ ខែមីនា ឆ្នាំ២០១២ នៅ ភូមិគោកក្ដួច ឃុំបន្ទាយនាង ស្រុក មង្គលបុរី ខេត្ដបន្ទាយមានជ័យ ។ ចំណែក បុរសជាប្ដីពេលដឹងថាប្រពន្ធដាច់ខ្យល់ ស្លាប់ក៏លេបថ្នាំសម្លាប់ខ្លួនតាមប្រពន្ធដែរ តែសំណាងល្អត្រូវក្រុមគ្រួសារដឹកយកទៅ សង្គ្រោះនៅមន្ទីរពេទ្យទាន់ពេលវេលា ។
លោកវរសេនីយ៍ត្រី យ៉ត សុផល អធិ ការនគរបាលស្រុកមង្គលបុរីបានឱ្យដឹងថា ស្ដ្រីដែលធ្វើអត្ដឃាតសម្លាប់ខ្លួននោះមាន ឈ្មោះ ធៀម ស៊ីណយ អាយុ៤០ឆ្នាំ ចំណែក បុរសជាប្ដីវិញមានឈ្មោះ អន យឿន អាយុ ៤៣ឆ្នាំ គ្រួសារនេះមានកូន ប្រុសស្រី ៥នាក់ រស់នៅភូមិឃុំខាងលើ ។លោកអធិការនគរបាលស្រុកមង្គល បុរីបានបន្ដឱ្យដឹងថា បើតាមសមត្ថកិច្ច ចុះទៅសាកសួរក្រុមគ្រួសារសាច់ញាតិ សពពីរឿងរ៉ាវកើតឡើងគឺមុនដំបូង គេ ឃើញ២នាក់ប្ដីប្រពន្ធនេះមានការឈ្លោះ ប្រកែកគ្នាទៅវិញទៅមកមិនដឹងឈ្លោះពី បញ្ហាអ្វីនោះទេ ។ ក្រោយមកប្ដីបានយក សំបកកង់គោយន្ដបោះត្រូវចំមុខស្ដ្រីជា ប្រពន្ធធ្វើឱ្យប្រពន្ធខឹងខ្លាំងពេកក៏ដើរឡើងលើផ្ទះលួចទៅ ផឹកថ្នាំបំពុលសត្វល្អិតម៉ាក ប៉ូអាដុល។ បន្ទាប់មកដោយប្ដីសង្ស័យថា ប្រពន្ធឡើងលើផ្ទះធ្វើអ្វីមិនស្រួលក៏ឡើង ទៅមើលស្រាប់តែឃើញប្រពន្ធដេក សន្លប់បែកពពុះមាត់ធ្វើឱ្យមានការភ្ញាក់ ផ្អើលដល់បងប្អូនសាច់ញាតិ ហើយភ្លាមៗ នោះត្រូវបានក្រុមគ្រួសារដឹកយកទៅ សង្គ្រោះបន្ទាន់នៅក្នុងមន្ទីរពេទ្យមិត្ដភាព កម្ពុជា-ជប៉ុនមង្គលបុរី ។ លុះរំលងបាន រយៈពេលប្រមាណ២ម៉ោងក្រោយមក ស្ដ្រីរូបនេះបានដាច់ខ្យល់ស្លាប់នៅក្នុង មន្ទីរពេទ្យ។ ក្រោយមកត្រូវបានគ្រួសារ ដឹកយកមកធ្វើបុណ្យតាមប្រពៃណីនៅផ្ទះ។
លោកវរសេនីយ៍ត្រី យ៉ត សុផល អធិការនគរបាលស្រុកមង្គលបុរីបានបន្ដ ឱ្យដឹងទៀតថា ចំណែកបុរសជាប្ដីវិញ ពេលដឹងថាប្រពន្ធដាច់ខ្យល់ស្លាប់ក៏ទៅ លេបថ្នាំបំពុលសត្វល្អិតម៉ាកដូចគ្នាដើម្បី សម្លាប់ខ្លួនទៅតាមប្រពន្ធ ។ ប៉ុន្ដែនៅពេល នោះត្រូវគ្រួសារឃើញទាន់ហើយជាតិ ថ្នាំពុលមិនទាន់ជ្រាបចូលក្នុងខ្លួនខ្លាំងត្រូវ បានក្រុមគ្រួសារដឹកយកទៅសង្គ្រោះនៅ មន្ទីរពេទ្យមិត្ដភាពកម្ពុជា-ជប៉ុនមង្គល បុរី រួចផុតពីមរណាផងដែរ ៕
