ឯកឧត្តមទេសរដ្ឋមន្ត្រី ចម ប្រសិទ្ធ រៀបចំឯកសាររារាំងគម្រោងសាងសង់អង្គរវត្តនៅឥណ្ឌា ~ knewdaily

Tuesday, 20 March 2012 08:26

administrator

ក្រសួងពាណិជ្ជកម្ម ដែលមាននាយកដ្ឋានកម្មសិទ្ធិបញ្ញាចំណុះនោះ បានមានប្រតិកម្មចំពោះការយកគំរូប្រាសាទអង្គរវត្ត សាងសង់នៅក្នុងប្រទេសឥណ្ឌា។ ឯកឧត្តមទេសរដ្ឋមន្រ្តី និងជារដ្ឋមន្ត្រីក្រសួងពាណិជ្ជកម្ម ចម ប្រសិទ្ធ បានថ្លែងប្រាប់អ្នកសារព័ត៌មានថា ក្រសួងពាណិជ្ជកម្មរបស់លោក គឺជាអ្នករៀបចំឯកសារ ដើម្បីទប់ស្កាត់គម្រោងដ៏គួរឲ្យភ្ញាក់ផ្អើលនេះរបស់អង្គការក្រៅ រដ្ឋាភិបាលមួយរបស់ឥណ្ឌា ដែលកំពុងចាប់ផ្តើមសាងសង់អង្គរវត្តឲ្យធំជាងប្រាសាទអង្គរវត្តដើម របស់កម្ពុជាទៅទៀត។

ឯកឧត្តមទេសរដ្ឋមន្រ្តី ចម ប្រសិទ្ធ បានបញ្ជាក់នៅថ្ងៃចន្ទទី១៩ មីនា នេះថា ក្រសួងពាណិជ្ជកម្មរបស់លោកកំពុងរៀបចំឯកសារ ដើម្បីទប់ស្កាត់គម្រោងសាងសង់អង្គរវត្តដ៏ធំមួយនៅប្រទេសឥណ្ឌា។ The Mahavir Mandir Trust គឺជាអង្គការក្រៅរដ្ឋាភិបាលមួយនៅឥណ្ឌា ដែលបានប្រកាសសាងសង់អង្គរវត្តចម្លងពីប្រាសាទអង្គរវត្តចំណាស់ ១០០០ឆ្នាំ របស់កម្ពុជា។ អង្គការនេះគ្រោងប្រើរយៈពេល ១០ឆ្នាំ និងទឹកប្រាក់ ២០ លានដុល្លារ ដើម្បីសាងសង់ប្រាសាទហិណ្ឌូមួយនេះ ឲ្យធំជាងគេក្នុងពិភពលោក។

ក្នុងពេលកន្លងមក មិនមានប្រតិកម្មផ្លូវការណាមួយពីរដ្ឋាភិបាលកម្ពុជានោះឡើយ។ ផ្ទុយទៅវិញមន្ត្រីរដ្ឋាភិបាល បានបញ្ចេញគំនិតផ្ទាល់ខ្លួន ដែលបង្ហាញពីការយល់ឃើញខុសគ្នាចំពោះគម្រោងសាងសង់អង្គរវត្តនេះ។ នៅពេលរដ្ឋមន្ត្រីមួយចំនួនថ្លែងថា ការសាងសង់អង្គរវត្តចម្លងនេះ នឹងធ្វើឲ្យអង្គរវត្តពិតប្រាកដកាន់តែមានតម្លៃនោះ រដ្ឋមន្ត្រីផ្សេងទៀតបានបញ្ចេញទស្សនៈប្រឆាំងដាច់អហង្ការ។ ប្រសាសន៍របស់ឯកឧត្តមទេសរដ្ឋមន្រ្តី ចម ប្រសិទ្ធ ក្លាយជាប្រតិកម្មផ្លូវការរបស់កម្ពុជា ចំពោះបញ្ហានេះ៕