|ថ្ងៃទី 17 មិថុនា 2014 ម៉ោង 08:14:49
ខេត្តបន្ទាយមានជ័យ ៖ បញ្ហាប្រឈមការអុវត្តច្បាប់រវាងនគរបាលយុត្តិធម៌និងអយ្យការនៃសាលាដំបូង ខេត្តបន្ទាយមានជ័យត្រូវបានបើកកិច្ចប្រជុំឡើងដើម្បីលើកយកមកពិភាក្សានិងធ្វើការដោះស្រាយក្នុងការផ្តល់ជំជឿទុកចិត្តទៅវិញទៅមក ។ ចៀសវាងការនិយាយសាចទឹកដាក់គ្នានៅខាងក្រៅដែលជាហេតុធ្វើឲ្យកើតមានមន្ទិលសង្ស័យ។កិច្ចប្រជុំនេះធ្វើឡើងកាលពីរសៀល ថ្ងៃទី១៦ ខែមិថុនា ឆ្នាំ២០១៤ នៅសាលាខេត្តបន្ទាយមានជ័យ ប្រព្រឹត្តទៅក្រោមវត្តមានលោក ផាន់ វណ្ណរ័ត្ន ព្រះរាជអាជ្ញានៃសាលាដំបូងខេត្តលោក ជឺ សុខ ប្រធានសាលាដំបូងខេត្ត និងលោក អោម ចន្ថា អភិបាលរងខេត្តបន្ទាយមានជ័យ។
លោក អោម ចន្ថា អភិបាលរងខេត្តក៏បានលើកឡើងនាឱកាសនោះថា៖ការ អនុវត្ត ច្បាប់នៅខេត្តបន្ទាយមានជ័យកន្លងមកគឺអនុវត្តទៅល្អប្រសើរ ទោះបីមានកើតមាន បញ្ហាមួយ ចំនួនតូចក៏ពិតមែនប៉ុន្តែយើងបានរួមគ្នាខិតខំដោះស្រាយបញ្ហានោះលើការយោគយល់គ្នា ផ្អែកលើគោលការណ៍ច្បាប់។
តមកតំណាងស្នងកាដ្ឋាននគរបាលខេត្តបន្ទាយមានជ័យ តំណាងកងរាជអាវុធខេត្ត តំណាងមន្ទីរនគរូណីយកម្មសំណង់និងសូរិយោដីខេត្ត ពន្ធនាគារខេត្ត បានលើកយក បញ្ហាប្រ ឈមរួមមាន៖ការចុះអនុវត្តសាលដីការបញ្ហាទំនាស់ដីធ្លីការវាយតម្លៃដីមាន ទំនាស់ សម្រាប់ បង់ពន្ធ ការអនុវត្តសាលដីកាបង្គាប់ឲ្យចាប់ខ្លួន ការចុះបង្ក្រាបបទល្មើស ការបញ្ជូនសំណុំរឿង និងពន្ធនាគារប្រឈម និងទឹកជន់លិចជាដើម។
ជុំវិញបញ្ហាប្រឈមទាំងនោះ លោក ផាន់វណ្ណរ័ត្ន ព្រះរាជអាជ្ញានៃសាលាដំបូង ខេត្តក៏បានលើកឡើងថា៖ជាការពិតណាស់មន្ត្រីអនុវត្តច្បាប់កាលណាធ្វើទៅតែងតែមានការប៉ះពារចៀសមិនផុតនោះទេលុះត្រាតែមិនធ្វើគឺមិនចេះខុស។ប៉ុន្តែសំខាន់ការអនុវត្តច្បាប់ឲ្យបានត្រឹមត្រូវតាមគោលការច្បាប់ និងអនុវត្ត សុក្រិត្យយុត្តិធម៌ នោះហើយការអនុវត្តច្បាប់មិនមានបញ្ហាអ្វីកើតឡើងនោះឡើយ។
លោក ជឺ សុខ ប្រធានសាលាដំបូងខេត្តបានចូលរួមមានមតិលើកឡើងថា៖យើង ជាមន្ត្រីអនុវត្តច្បាប់ត្រូវតែគោរពច្បាប់ បញ្ហាប្រឈមទាំងឡាយគឺអាចដោះស្រាយ បានទាំង អស់ដោយការដោះស្រាយនោះឈរលើគោលការច្បាប់និងផលប្រយោជន៍របស់ប្រជាពលរដ្ឋ។ លោកបានលើកឡើងទៀតថា ការស្វែងរកយុត្តិធម៌ជូនប្រជាពលរដ្ឋមិនមែនផ្អែកទៅលើស្ថាប័នតុលាការតែមួយប៉ុណ្ណោះនោះទេគឺក្នុងនោះក៏ត្រូវមានការចូលរួមពីមន្ត្រីនគរបាលយុត្តិធម៌ផងដែរ។
គួររំលឹកថា ការអនុវត្តច្បាប់នៅក្នុងខេត្តបន្ទាយមានជ័យកន្លងមកមានការប្រឈមមួយ ចំនួនរវាងអាជ្ញាធរដែនដីនិងស្ថាប័នតុលាការ។បញ្ហាប្រឈមទាំងនោះគេមើលឃើញថាភាគច្រើនពាក់ព័ន្ធនិងរឿងទំនាស់ដីធ្លី ៕ដោយ ៖ វិច្ឆិកា
