ស្ទឹងត្រែង: សមត្ថកិច្ចចម្រុះដែលដឹកនាំដោយព្រះរាជអាជ្ញារងអមតុលាការខេត្តស្ទឹងត្រែង ចុះឃាត់រថយន្តយីឌុបបីគ្រឿង កាលពីយប់ថ្ងៃទី១១ឧសភា រួចបញ្ជូនទៅកាន់ស្នងការរដ្ឋាននគរបាលខេត្ត រហូតមកទល់នឹងថ្ងៃទី១៥ ខែឧសភាឆ្នាំ២០១៤ បានរកឃើញថា មានឈើលួចដាក់បន្លំលើសពីច្បាប់ដឹកជញ្ជូនដល់ទៅជាង ៦០ ម៉ែត្រគូប ពោលគឺលើសពីច្បាប់កំណត់ជាងពាក់កណ្តាល។
សូមបញ្ជាក់ថា កាលពីយប់ថ្ងៃទី១១ខែឧសភាឆ្នាំ២០១៤សមត្ថកិច្ចរួមមាន នគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃ បានសហការជាមួយនគរបាលការិយាល័យប្រឆាំងបទល្មើសសេដ្ឋកិច្ចខេត្តស្ទឹងត្រែង និងមន្ត្រីជំនាញរដ្ឋបាលព្រៃឈើ បានឃាត់រថយន្តយីឌុបបីគ្រឿងដឹកឈើស្របច្បាប់មានទិសដៅចេញពីស្រុកសៀមប៉ាង។
លោក វន គុន អនុប្រធានផ្នែកនគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃ បាននិយាយថា រថយន្តដឹកឈើស្របច្បាប់ទាំងនោះ សមត្ថកិច្ចមានការសង្ស័យដឹកលើសពីច្បាប់អនុញ្ញាត ទើបសហការគ្នាឃាត់ដើម្បីត្រួតពិនិត្យ។ ពេលឃាត់រថយន្តដឹកឈើនោះ មានអ្នករត់ការម្នាក់ចេញមុខអះអាងថា ឈើមានច្បាប់ដេញថ្លៃត្រឹមត្រូវ មិនចង់ឱ្យសមត្ថកិច្ចឃាត់រថយន្តដឹកឈើរបស់ខ្លួនឡើយ។
លោកលី គន នាយផ្នែករដ្ឋបាលព្រៃឈើសៀមប៉ាង បាននិយាយឱ្យដឹងថា ឈើច្បាប់ដេញថ្លៃប្រណីតប្រភេទធ្នង់ចំនួន ៨៩ ម៉ែត្រគូប ក្នុងស្នាក់ការតំបន់ព្រៃការឧទ្យានជាតិវីរជ័យសៀមប៉ាងខេត្តស្ទឹងត្រែង។ ឈ្មោះព្រំ ថន បានធ្វើការដឹកជញ្ជួនតាមរថយន្តបីគ្រឿងជាលើកទី១ មានបរិមាណ ៥៣ ម៉ែត្រគូបឆ្ពោះទៅកាន់តាខ្មៅខេត្តកណ្តាល។
លោកប្រធានផ្នែករដ្ឋបាលព្រៃឈើ បាននិយាយបន្តទៀតថា អ្នកដេញថ្លៃពិតជាមានច្បាប់អនុញ្ញាតធ្វើការដឹកជញ្ជូនទៅកាន់គោលដៅខាងលើ ឈើ៥៣ម៉ែត្រគូបប្រាកដមែន ក៏ប៉ុន្តែបើសិនជាសមត្ថកិច្ចឃាត់ហើយរកឃើញដាក់លើស ឬយ៉ាងណានោះម្ចាស់ត្រូវទទួលខុសត្រូវដោយខ្លួនឯង។
លោកវន គុន បាននិយាយឱ្យដឹងថា ក្រោយពីឃាត់រថយន្តយីឌុបដឹកឈើបីគ្រឿងមានច្បាប់អនុញ្ញាត ១៦៥ ដុំស្មើ ៥៣,៦៥៦ ម៉ែត្រគូបទេ។ ក៏ប៉ុន្តែ សមត្ថកិច្ចបានរកឃើញមានឈើលើសពីច្បាប់កំណត់រហូតដល់ទៅជាង ៦០ ម៉ែត្រគូប។ នេះបានន័យថា ឈើសរុបក្នុងរថយន្តបីគ្រឿងមាន ៣៤៨ ដុំស្មើ ១២២,១១១ ម៉ែត្រគូប។ ដាក់លើស ១៨៣ ដុំ ស្មើ ៦៨,៤៥៥ ម៉ែត្រគូប។ ក្រោយពីធ្វើការត្រួតពិនិត្យរួចរាល់ហើយសមត្ថកិច្ចបានប្រគល់កំណត់ហេតុ ទៅឱ្យខាងជំនាញរដ្ឋបាលព្រៃឈើ ដើម្បីចាត់ការរថយន្តយីឌុបដឹកឈើនោះជាបន្តទៀត។
លោកសិទ្ធិ សំណាង ប្រធានផ្នែករដ្ឋបាលព្រៃឈើស្ទឹងត្រែង បាននិយាយឱ្យដឹងថា ក្រោយពីសមត្ថកិច្ចប្រគល់កំណត់ហេតុរថយន្តដឹកឈើទាំងបីគ្រឿង ខាងជំនាញនឹងធ្វើការផាកពិន័យទៅលើម្ចាស់ឈើតាមច្បាប់។ លោកបន្ថែមថា ការប្រព្រឹត្តខុសត្រូវតែអនុវត្តទៅតាមច្បាប់៕ ប្រភពពត៌មាន ៖ cen
