ថ្ងៃទី 29 ឧសភា 2014 ម៉ោង 09:38:47
ខេត្តស្ទឹងត្រែង ៖ការកាប់បំផ្លាញព្រៃឈើនៅតំបន់ព្រៃឡង់ត្រូវបានគេនិយាយថាមានមេឈ្មួញម្នាក់ដែលល្បីខាងជំនួញរកស៊ីបទល្មើសព្រៃឈើគឺលោកឧកញ៉ាតឹកបានដាក់ពង្រាយកម្លាំងមេការមួយចំនួនរបស់ខ្លួននាំកម្មករទៅកាប់យកឈើប្រណិតនិងបានទៅបំផុសបំផុលឲ្យប្រជាពលរដ្ឋនៅតាមភូមិជាច្រើនក្នុងស្រុកសៀមបូកនិងជាប់ស្រុកថាឡាបរិវ៉ាត់ចូលទៅកាប់ឈើប្រណិតប្រភេទបេង នាងនួននិងធ្នង់នៅក្នុងព្រៃឡង់ដែលជាព្រៃឈើអភិរក្សដ៏សំខាន់មួយមានព្រំប្រទល់ជាប់គ្នាចំនួន៤ខេត្តគឺខេត្តស្ទឹងត្រែង ក្រចេះ ព្រះវិហារ និងខេត្តកំពុងធំ។
បច្ចុប្បន្ននេះព្រៃឡង់កំពុងរងការវិនាសហិនហោចដោយសារការដាក់តម្លៃថ្លៃលើជំនួញឈើធ្នង់ដើម្បីដឹកជញ្ជូនមកលក់ឲ្យខ្លួននៅតាមភូមិមួយចំនួនក្នុងស្រុកសៀមបូក។ជាក់ស្តែងឈើធ្នង់នៅតាមភូមិត្រូវបានគេបង្ហើបប្រាប់ថាឈើដឹកមកពីព្រៃឡង់លក់ឲ្យលោក សិដ្ឋ មេការរបស់លោកឧកញ៉ាតឹកហើយដឹកបន្តតាមរថយន្តយីឌុបទៅឲ្យឈ្មួញដ៏ធំនៅខេត្តកំពង់ចាម។
ប្រជាពលរដ្ឋនៅភូមិទន្សោង ភូមិសៀមបូកភូមិស្រែក្រសាំង ភូមិម៉ម ភូមិពងទឹក ភូមិកាំងចាម ភូមិក្ងោកក្នុងស្រុកសៀមបូកបានប្រាប់ថាឈើធ្នង់ដែលពួកខ្លួនកាប់មកពីព្រៃឡង់ដឹកតាមគោយន្តកន្ត្រៃយកមកទំលាក់នៅតាមមាត់ទន្លេនេះគឺលក់ទៅឲ្យក្រុមហ៊ុនលោកឧកញ៉ា តឹក គឺបានតម្លៃ២៥០ដុល្លារក្នុងមួយម៉ែត្រគូប។ហើយតម្លៃនេះគឺត្រូវដឹកជញ្ជូនពីព្រៃយកមកដល់ភូមិទើបវាស់វែងយកទៅតាមខ្នាត(ឡាំងជាបួនជ្រុង៣តឹកបួនជ្រុងប្រវែងចាប់ពី២មែត្រឡើងទៅ)តែប្រសិនធ្លាក់មុខកាត់និងធ្លាក់ខ្នាតគឺក្រុមហ៊ុនមិនយកទេ ។
ប្រភពបង្ហើបឲ្យដឹងផងដែរថាពាក់ពន្ធ័និងករណីបទល្មើសព្រៃឈើខាងលើគឺមេឈ្មួញ(លោកឧកញ៉ា តឹក)បានរត់ការនិងបង់ប្រាក់ឲ្យគ្រប់ជំនាញទូរទាំងខេត្តស្ទឹងត្រែងអស់រួចហើយ ទើបការធ្វើជំនួញរបស់លោកដំណើការបានយ៉ាងរលូនបែបនេះ។
លោក ឈាង តុលា នាយខណ្ឌរដ្ឋបាលព្រៃឈើខេត្តស្ទឹងត្រែងនៅថ្ងៃ២៨ ខែឧសភាឆ្នាំ២០១៤នេះនគរវត្តមិនអាចទំនាក់ទំនងសុំការបំភ្លឺបានទេ ពាក់ពន្ធ័និងករណីបទល្មើសព្រៃឈើខាងលើ ៕