(ដោយ៖អ.ស.មប៉ោយប៉ែត)៖ ពលករចំណាកស្រុកដែលលួចឆ្លងដែនខុសច្បាប់ទៅរកការងារធ្វើលើទឹកដីថៃ ហើយត្រូវភាគីថៃចាប់បញ្ជូនត្រឡប់មកកម្ពុជាវិញ តាមច្រកទ្វារអន្តរជាតិប៉ោយប៉ែត តាមការកត់សម្គាល់មួយរយៈនេះមានការថយចុះជាងពេលមុនៗ ។
តាមប្រភពពីសមត្ថកិច្ចនៅមាត់ច្រកទ្វារអន្តរជាតិប៉ោយប៉ែតឱ្យដឹងថា មួយរយៈកន្លងមកនេះចំនួនពលករខុសច្បាប់ដែលភាគីថៃចាប់បញ្ជូនត្រឡប់មកកម្ពុជាវិញតាមច្រកទ្វារអន្តរជាតិប៉ោយប៉ែតប្រគល់ឱ្យសមត្ថកិច្ចអន្តោប្រវេសន៍មានការថយចុះបើប្រៀបធៀបទៅនឹងពេលមុនៗ ។ ប្រភពបន្តថា រយៈពេល១ខែចុងក្រោយនេះ ចំនួនពលករខ្មែរដែលភាគីថៃបញ្ជូនត្រឡប់មកវិញក្នុងមួយថ្ងៃស្ទើរមិនដល់២០០នាក់ ហើយថ្ងៃខ្លះមិនដល់១០០នាក់ផងទេ ។ ជាក់ស្តែងសម្រាប់ថ្ងៃទី១០ខែកញ្ញា គិតត្រឹមម៉ោង១២ថ្ងៃត្រង់ ចំនួនពលករខុសច្បាប់ដែលភាគីថៃចាប់បញ្ជូនត្រឡប់មកឱ្យសមត្ថកិច្ចកម្ពុជានៅច្រកទ្វារអន្តរជាតិប៉ោយប៉ែតមានត្រឹមតែ១រថយន្ត ឬស្មើនឹងប្រហែល៥០នាក់តែប៉ុណ្ណោះ ។
តាមក្រុមអ្នករកស៊ីប្តូរប្រាក់ និងចាប់ម៉ូយពលករនៅខាងមុខស្នាក់ការប៉ូលិសអន្តោប្រវេសន៍ច្រកទ្វារអន្តរជាតិប៉ោយប៉ែតប្រាប់ថា មួយរយៈនេះចំនួនពលករខុសច្បាប់ដែលភាគីថៃចាប់បញ្ជូនត្រឡប់មកវិញមានការថយចុះខ្លាំង ខណៈដែលជិតដល់រដូវភ្ជុំបិណ្ឌឆ្នាំមុនៗ គឺមានពលករខ្មែរត្រូវភាគីថៃចាប់បញ្ជូនត្រឡប់មកវិញច្រើនជាងឆ្នាំនេះ ។
ទាក់ទងនឹងការធ្វើចំណាកស្រុកឆ្លងដែនទៅរកការងារធ្វើដោយខុសច្បាប់នៅក្នុងទឹកដីថៃនេះ មន្ត្រីរដ្ឋាភិបាលក៏ដូចជាអង្គការសង្គមស៊ីវិលនានា ធ្លាប់បានអំពាវនាវថា ការងារនៅកម្ពុជា បច្ចុប្បន្នមានច្រើនសម្រាប់ធ្វើ ដូច្នេះគ្រប់គ្នាគួរតែកុំធ្វើចំណាកស្រុកឆ្លងដែនខុសច្បាប់ដោយប្រថុយប្រថាន ម្យ៉ាងពេលជួបគ្រោះថ្នាក់គ្មានអ្នកណាទទួលខុសត្រូវ
