ថ្ងៃទី 05 ខែកញ្ញា ឆ្នាំ2012, ម៉ោង 08:53 AM ឈ ភ
តាមRFA បានឲ្យដឹងថា ធនាគារអភិវឌ្ឍន៍អាស៊ី (ADB) បានទទួលជោគជ័យក្នុងការជួសជុល និងស្ដារឡើងវិញនូវហេដ្ឋារចនាសម្ព័ន្ធផ្លូវថ្នល់ ស្ពាន និងប្រព័ន្ធធារាសាស្ត្រ ក្នុងខេត្តចំនួន៦ដែលរងការខូចខាតធ្ងន់ធ្ងរជាងគេ គឺខេត្តព្រៃវែង បន្ទាយមានជ័យ កំពង់ធំ សៀមរាប កំពង់ចាម និងខេត្តកណ្ដាល
ក្រោយពីទឹកជំនន់ កាលពីឆ្នាំ២០១១។
នៅថ្ងៃទី៥ ខែកញ្ញា ឆ្នាំ២០១២ នេះមន្ត្រីជាន់ខ្ពស់ធនាគារអភិវឌ្ឍន៍អាស៊ី និងមន្ត្រីជាន់ខ្ពស់គណៈកម្មាធិការជាតិគ្រប់គ្រងគ្រោះមហន្តរាយ គ្រោងដឹកនាំក្រុមអ្នកកាសែតទៅត្រួតពិនិត្យគម្រោងស្ដារ ហេដ្ឋារចនាសម្ព័ន្ធ ដែលបានទទួលជោគជ័យជាក់ស្តែងនោះនៅខេត្តព្រៃវែង និងខេត្តកំពង់ចាម ។ការស្ដារឡើងវិញនោះ គឺមានតម្លៃ៦០លានដុល្លារអាមេរិក ក្រោមប្រាក់កម្ចីសម្បទានរបស់ធនាគារអភិវឌ្ឍន៍អាស៊ី។
លោក ភីធឺ ប្រីមបូល (Patter Brimble) នាយករងធនាគារអភិវឌ្ឍន៍អាស៊ី ប្រចាំនៅប្រទេសកម្ពុជា បានមានប្រសាសន៍នៅក្នុងសន្និសីទកាសែត ថា រាល់គម្រោងស្ដារឡើងវិញទាំងនោះ គឺជាប្រាក់កម្ចីសម្បទានពីធនាគារអភិវឌ្ឍន៍អាស៊ី លើកលែងតែស្បៀងពលកម្មទេ គឺជាជំនួយ។
ទាក់ទងនឹងគម្រោងស្ដារឡើងវិញ នៅខេត្តចំនួន៦នោះ លោក ហ៊ី សំណាង អនុប្រធានក្រុមការងាររបស់ធនាគារអភិវឌ្ឍន៍អាស៊ី ជាអ្នកតាមដានការអនុវត្តគម្រោងកន្លងមក បានមានប្រសាសន៍ថា ផ្លូវថ្នល់ និងស្ពានមួយចំនួន ត្រូវបានជួសជុលហើយ។ ក្រវាត់ក្រុងខេត្តព្រៃវែង នោះ គឺថារៀបនឹងបាក់ទៅហើយបាទ បើសិនជាទំនប់នោះបាក់ គឺថាប្រជាជននៅក្រុងព្រៃវែង ទាំងមូល គឺត្រូវរងការខូចខាតទាំងស្រុង។ នៅពេលដែលមានទឹកជំនន់ឆ្នាំ២០១១ នោះ ខាងក្រសួងធនធានទឹក សាលាខេត្តបានធ្វើការត្រួតពិនិត្យជាប្រចាំតែម្តង។ យើងបានសាងសង់ស្រទាប់គ្រឹះរួចហើយ បានរហូតដល់៣០% នៃគម្រោងទាំងមូលនោះ បើសិនមានភ្លៀងមក មានទឹកជំនន់ទៀត គឺលែងមានការព្រួយបារម្ភទៀត។
ធនាគារអភិវឌ្ឍន៍អាស៊ី កាលពីឆ្នាំ២០១១ កន្លងទៅនេះ បានវាយតម្លៃខូចខាតដោយសារទឹកជំនន់ មានតម្លៃសរុបជិត៥០០លានដុល្លារអាមេរិកនៅក្នុងខេត្តចំនួន១៨។ ប្រជាពលរដ្ឋជិត២លាននាក់ បានរងការប៉ះពាល់ដោយសារទឹកជំនន់នោះ។ ប្រជាពលរដ្ឋជាង៥ម៉ឺនគ្រួសារ ត្រូវបានជម្លៀសទៅទីសុវត្ថិភាព និងមានមនុស្សស្លាប់ចំនួន២៥០នាក់។
កាលពីថ្ងៃទី២៩ ខែសីហា កន្លងទៅនេះដែរ លោក ញឹម វណ្ណដា អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ បានកោះប្រជុំជាបន្ទាន់មួយ ដើម្បី វិធានការចាំបាច់នានា ត្រៀមសង្គ្រោះបន្ទាន់ នៅគ្រាដែលមានគ្រោះទឹកជំនន់នៅឆ្នាំ២០១២ និងគ្រោះរាំងស្ងួតកន្លងមកនេះ៕Agkor thom