ដោយ ៖ បញ្ញា(អត្ថបទនគរវត្ត) ថ្ងៃទី 11 សីហា 2012ម៉ោង 17:15:01
ភ្នំពេញ ៖ សាលាដំបូងរាជធានីភ្នំពេញបានសម្រេចឃុំខ្លួនបុរសម្នាក់ជាបុគ្គលិក ផ្នែកទីផ្សារនៅក្នុងក្រុមហ៊ុនលក់ ថ្នាំពេទ្យពន្លឺឧត្ដម ក្រោមបទចោទប្រកាន់រំលោភសេចក្ដីទុកចិត្ដ ដោយយោងតាមមាត្រា៣៩១ និងមាត្រា៣៩២នៃក្រមព្រហ្មទណ្ឌនៃព្រះរាជាណាចក្រកម្ពុជា កាលពីល្ងាចថ្ងៃទី១១ខែសីហាឆ្នាំ២០១២។ បើសិនជាចៅក្រមស៊ើបសួរសាលាដំបូង រាជធានីភ្នំពេញរកឃើញថា បុរសរូបនេះមានពិរុទ្ធភាពដូចការចោទប្រកាន់មែននោះ បុរសរូបនេះអាចប្រឈមនឹង ការជាប់ពន្ធនាគារពី៦ខែទៅ៣ឆ្នាំ និង ពិន័យជាប្រាក់ពី១លានទៅ៦លានរៀល ។
បុរស រូបនោះឈ្មោះ សុខ ទូច ហៅ ឆ្លូញ អាយុ២៦ឆ្នាំ ជាបុគ្គលិកផ្នែកទីផ្សារ នៅក្នុងក្រុមហ៊ុនលក់ថ្នាំពេទ្យពន្លឺឧត្ដម ត្រូវបានសមត្ថកិច្ចកងរាជអាវុធហត្ថលើផ្ទៃប្រទេសឃាត់ខ្លួនកាលពីថ្ងៃ ទី៩ ខែសីហាឆ្នាំ២០១២ នៅកន្លែងធ្វើការរបស់ខ្លួន ។
ដើមហេតុនាំឱ្យឈានដល់ការឃាត់ខ្លួនបុរសរូបនោះ គឺកាលពីឆ្នាំ២០០៦ បុរសរូបនេះបានចូលមកធ្វើការនៅក្នុង ក្រុមហ៊ុនលក់ថ្នាំពេទ្យខាងលើនៅសាខាផ្សារអូឡាំពិក ដោយធ្វើជាបុគ្គលិកធម្មតាប៉ុណ្ណោះ ។ លុះដល់ឆ្នាំ២០០៩ ថៅកែបាន ទុកចិត្ដឱ្យបុរសរូបនេះកាន់តំណែងផ្នែក ទីផ្សារ ដោយត្រូវយកអីវ៉ាន់ទៅបោះឱ្យម៉ូយ ហើយក្នុងការដាក់អីវ៉ាន់ម្ដងៗគិត ជាទឹកប្រាក់ពី៦.០០០ដុល្លារទៅ៨.០០០ដុល្លារ ។ ក្រោយមកបុរសរូបនេះបានទៅលេងល្បែងនៅក្នុងកាស៊ីណូ ហើយ ចាញ់ប្រាក់អស់ ទើបបែកគំនិតកិបលុយ ក្រុមហ៊ុនដោយក្នុងពេលយកអីវ៉ាន់ឱ្យម៉ូយម្ដងៗកិបប្រាក់ពី៥០០ ដុល្លារទៅ ១.០០០ដុល្លារ និងក្នុងមួយខែកិបប្រាក់ក្រុមហ៊ុនបានពី២.០០០ដុល្លារទៅ៣.០០០ ដុល្លារ ។
ក្រោយមកទើបក្រុមហ៊ុនមានការសង្ស័យបានទូទាត់ប្រាក់ ទើបឃើញថា បាត់អស់៨៥.៣០០ដុល្លារ ហើយថៅកែ ក្រុមហ៊ុនក៏បានប្ដឹងមកសមត្ថកិច្ចកងរាជអាវុធហត្ថឱ្យឃាត់ខ្លួនតែ ម្ដង៕