(ដោយ៖អ.ស.មប៉ោយប៉ែត) ៖ មន្ត្រីសាធារណការ -ដឹកជញ្ជូនថៃ និង កម្ពុជារួមគ្នាចុះទៅសិក្សាលើគម្រោងដែលគ្រោងបើកច្រកទ្វារអន្តរជាតិស្ទឹងបត់ថ្មីមួយកន្លែងទៀត នៅឯក្រុងប៉ោយប៉ែត ក្នុងនោះដែរក្រុមប្រតិភូទាំង២ប្រទេស ក៏នាំគ្នាសិក្សាលើគម្រោងអនុវត្តន៍ ផែនការកសាងផ្លូវដែកពីក្រុងប៉ោយប៉ែត ទៅប្រទេសថៃផងដែរ។
មន្ត្រីជំនាញចុះពិនិត្យគម្រោងខាងលើ កាលពីព្រឹកថ្ងៃទី១៦ ខែសីហា ឆ្នាំ២០១២នៅចំណុច ទីតាំងដែលគ្រោងបើកច្រកអន្តរជាតិស្ទឹងបត់ ដែលស្ថិតនៅក្នុងភូមិស្ទឹងបត់ ក្រុងប៉ោយប៉ែត ខេត្តបន្ទាយមានជ័យ។
លោក អ៊ុក សុតា ប្រធានលេខាធិការដ្ឋានគ្រប់គ្រងសម្បទានផ្លូវដែក បានបញ្ជាក់ប្រាប់ឲ្យដឹងថាគម្រោងដែលរួមគ្នាចុះសិក្សាក្នុងពេលនេះ គឺយោងទៅលើទៅតាមប្រសាសន៍របស់ប្រមុខរាជរដ្ឋាភិបាលនៃប្រទេសកម្ពុជា-ថៃ នៅខេត្តសៀមរាបកាលពីពេលកន្លងមកស្ដីពីគម្រោងកសាងផ្លូវដែកផង គម្រោងបើកច្រកអន្តរជាតិស្ទឹងបត់នាពេលខាងមុខនេះ។
លោក អ៊ុក សុតា បន្តទៀតថា នេះគ្រាន់តែជាគម្រោងតែប៉ុណ្ណោះ មិនទាន់អនុវត្តជាផ្លូវការភ្លាមៗឡើយ ហើយគម្រោងនេះអាចដំណើរការបានលុះត្រាតែភាគីកម្ពុជា-ថៃ រួមគ្នាដោះស្រាយបញ្ហាព្រំដែននៃប្រទេសទាំង២ឲ្យរួចរាល់សិន៕