ដោយ ៖ សាគុណ ថ្ងៃទី 15 សីហា 2012ម៉ោង 16:44:17
ភ្នំពេញ ៖ លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន បានអនុញ្ញាតឲ្យលោក Prasit Sangrungrueng ប្រធានក្រុមហ៊ុន Apex Power Solution Co.,Ltd របស់ថៃ ចូលជួប ពិភាក្សាការងារ នាព្រឹកថ្ងៃទី១៥ ខែសីហា ឆ្នាំ២០១២ នៅទីស្តីការក្រសួងព័ត៌មាន ។នៅក្នុងជំនួបនោះលោក Prasit Sangrungrueng បានជម្រាបថា ក្រុមហ៊ុនរបស់លោក មានគម្រោងវិនិយោគលើការបង្កើតបណ្តាញអគ្គិសនីប្រើដោយ ថាមពលព្រះអាទិត្យនៅ កម្ពុជា ដើម្បីបំពេញតម្រូវការក្នុងការប្រើប្រាស់ថាម ពលអគ្គិសនីឲ្យបានគ្រប់គ្រាន់នៅ់ទូទាំង ប្រទេសកម្ពុជា ។ លោកប្រធានក្រុមហ៊ុនបានជម្រាបបន្តថា បច្ចុប្បន្នក្រុមហ៊ុនរបស់លោក បានលើកគម្រោងវិនិយោគលើការបង្កើតបណ្តាញអគ្គិសនីប្រើដោយ ថាមពលព្រះអាទិត្យនេះ ស្នើសុំទៅក្រសួងឧស្សាហកម្ម រ៉ែ និងថាមពល ដើម្បីសុំការអនុញ្ញាត ក្នុងការសិក្សា ស្រាវជ្រាវលើការងារនេះ ។ លោកប្រធានក្រុមហ៊ុនបានបញ្ជាក់ថា តាមគម្រោងរបស់ក្រុម ហ៊ុន ប្រសិនបើការសិក្សាស្រាវជ្រាវរួចរាល់នោះ ក្រុមហ៊ុននឹងបង្កើតថាមពលអគ្គិសនីប្រើ ដោយថាមពលព្រះអាទិត្យនេះមានរហូតដល់ទៅ 800MKW ។
ដើម្បីឲ្យដំណើរការសិក្សា ស្រាវជ្រាវ និងការបង្កើតនូវគម្រោងនេះឲ្យបានឆាប់នោះ លោក Prasit Sangrungrueng បានសុំជាមតិយោបល់ និងគំនិតល្អៗពីលោករដ្ឋមន្ត្រី ខៀវ កា ញារីទ្ធ ដើម្បីឲ្យដំណើរការសិក្សាស្វែងយល់ពីភូមិសាស្ត្រនៅកម្ពុជាកាន់តែ ច្បាស់ថែមទៀត និងជំរុញឲ្យដំណើរការបង្កើតបណ្តាញអគ្គិសនីប្រើថាមពលព្រះអាទិត្យនេះ បានឆាប់រហ័ស ។
ជាការឆ្លើយតបនាពេលនោះ លោករដ្ឋមន្ត្រី ខៀវ កាញារីទ្ធ បានស្វាគមន៍យ៉ាងកក់ ក្តៅចំពោះបំណងរបស់លោកប្រធានក្រុមហ៊ុន និងសហការី ដែលចង់មកវិនិយោគលើការ បងើ្កតបណ្តាញអគ្គិសនីប្រើថាមពលព្រះអាទិត្យនៅកម្ពុជា ។ លោកបានជម្រាបទៅប្រធាន ក្រុមហ៊ុនថា ទាក់ទងទៅនឹងគម្រោងវិនិយោគនេះ លោកនិងជួយសម្រួល និងជំរុញឲ្យក្រ សួងឧស្សាហកម្ម រ៉ែ និងថាមពល ជួយសម្រួលនូវការអនុញ្ញាតវិនិយោគនេះ ឲ្យបានឆាប់ រហ័សតាមលទ្ធភាពដែលអាចធ្វើបាន ។
ទាក់ទងទៅនឹងការបង្កើត បណ្តាញអគ្គីសនីប្រើ ផ្ទាំងសូឡាព្រះអាទិត្យនេះ លោករដ្ឋមន្ត្រីបានបញ្ជាក់ថា កន្លងមក កម្ពុជាបានធ្វើការសិក្សា ជាមួយប្រទេសជប៉ុន តាមរយៈអង្គការ JICA ជាតំណាងនៅកម្ពុជា បានលើកជាគម្រោង 2MKW តែប៉ុណ្ណោះ តែត្រូវចំណាយថវិកាជាច្រើន ដូចនេះការងារនេះពុំទទួលបានជោគ ជ័យឡើយ ។
លោករដ្ឋមន្ត្រី បានបញ្ជាក់ទៀតថា បច្ចុប្បន្នកម្ពុជា បានតបណ្តាញអគ្គីសនី មកពីប្រទេសវៀតណាម ដែលមានកម្លាំងថាមពល 200MKW ដោយធ្វើការតភ្ជាប់ពីខេត្ត ជាប់ព្រំដែនមករាជធានីភ្នំពេញ និងភ្ជាប់ទៅ តាមបណ្តាខេត្តមួយចំនួនទៀតនៅក្នុងប្រទេស កម្ពុជា ។ ជាមួយគ្នានេះដែរកម្ពុជាក៏មានរោងចក្រអគ្គីសនីប្រើដោយថាមពល ធ្យូងថ្មនៅ ក្រុងព្រះសីហនុ ដែលមានថាមពល 200MKW និងខេត្តកោះកុងមានថាមពល 1000MKW ផងដែរ សម្រាប់ផ្គត់ផ្គង់នៅក្នុងរដូវប្រាំង ។ បច្ចុប្បន្នកម្ពុជា ក៏មានវារីអគ្គីសនីមួយចំនួន ដែលក្រុមហ៊ុនចិនបានមកវិនិយោគ ប៉ុន្តែទោះជាយ៉ាងនេះក្តី ក៏យើងនៅខ្វះថាមអគ្គីសនី ជាច្រើនទៀតដើម្បីផ្គត់ផ្គង់ដល់ទីជនបទដាច់ស្រយាលផងដែរ ។ លោករដ្ឋមន្ត្រីបានបញ្ជាក់ ផងដែរថា សព្វថ្ងៃនេះនៅក្នុងប្រទេសកម្ពុជា ការផ្គត់ផ្គង់ផ្ទាំងសូឡាប្រើថាមពលព្រះអាទិត្យ គឺក្រុមហ៊ុនរបស់ប្រទេសអាល្លឺម៉ង់ ប៉ុន្តែមិនមានជាលក្ខណៈទ្រង់ទ្រាយធំនៅឡើយទេ ភាគ ច្រើនគឺមានប្រើតែនៅតាមផ្ទះប៉ុណ្ណោះ មិនអាចប្រើប្រាស់នៅក្នុងសិប្បកម្មបានទេ ។
លោករដ្ឋមន្ត្រីក៏បានណែនាំដល់ ក្រុមហ៊ុនត្រូវធ្វើការពិនិត្យឲ្យបានត្រឹមត្រូវ ព្រោះថាការបង្កើតបណ្តាញអគ្គីសនីប្រើថាមពលព្រះអាទិត្យនេះ ត្រូវប្រើប្រាស់ទុនច្រើនណាស់ ដូច នេះក្រុមហ៊ុនត្រូវប្រមូលទុនវិនិយោគឲ្យបានច្រើន ដើម្បីដំណើរការងារនេះប្រព្រឹត្តទៅបាន ជោគជ័យ នៅពេលទទួលបានការអនុញ្ញាតពីរាជរដ្ឋាភិបាលកម្ពុជា ៕នគរវត្ត
