(ដោយ៖អ៊ិនសាមិត្តប៉ោយប៉ែត) ៖ លោកវរសេនីយ៍ឯក សំ ជិត ស្នងការរងខេត្តបន្ទាយមានជ័យទទួលផែនព្រំដែន និងលោកវរសេនីយ៍ត្រីសូ ចាន់ណារី មេបញ្ជាការវរការពារព្រំដែនគោកនៃវរសេនាតូចលេខ៩១១ ឈរជើងនៅក្រុងប៉ោយប៉ែត កាលពីរសៀលថ្ងៃទី៨ សីហា ឆ្នាំ២០១២បានចុះត្រួតពិនិត្យកម្លាំងនគរបាលការពារព្រំដែនគោកវរសេនាតូចលេខ៩១១ដែលកំពុងឈរជើងតាមបន្ទាត់ព្រំដែនកម្ពុជាថៃ ។
លោកវរសេនីយ៍ត្រី សូ ចាន់ណារី មេបញ្ជាការវរការពារព្រំដែនគោកលេខ៩១១ ឈរជើងនៅក្រុងប៉ោយប៉ែតបានឱ្យដឹងថា ការចុះត្រួតពិនិត្យកម្លាំងនគរបាលការពារព្រំដែននៅពេលនេះធ្វើឡើងក្នុងគោលបំណងពង្រឹងកម្លាំងសមត្ថកិច្ចទាំងអស់ឱ្យយកចិត្តទុកដាក់ការពារសន្តិសុខព្រំដែនកន្លែងដែលឈរជើងតាមគោលដៅនីមួយៗឱ្យបានល្អប្រសើរ ។
លោកមេបញ្ជាការបន្តថា ជាការលើកទឹកចិត្តដល់កងកម្លាំងនគរបាលវរការពារព្រំដែនគោកលេខ៩១១ ផងដែរ លោកឧត្តមសេនីយ៍ត្រី ខេង ស៊ុម ស្នងការនគរបាលខេត្តបន្ទាយមានជ័យបានចំណាយថវិកាផ្ទាល់ខ្លួនរបស់លោកទិញវិទ្យុទាក់ទងម៉ាកម៉ូតូរ៉ូឡា និងគ្រឿងឧបភោគបរិភោគមួយចំនួនទៀតយកមកចែកជូនដល់កងកម្លាំងដែលឈរជើងនៅតាមបណ្តាប៉ុស្តិ៍ទាំងអស់ជាប់ព្រំដែនកម្ពុជាថៃ ។ លោកមេបញ្ជាការបន្តទៀតថា កម្លាំងនគរបាលវរការពារព្រំដែនគោកលេខ៩១១ របស់លោកឈរជើងការពារនៅតាមបន្ទាត់ព្រំដែននេះចាប់ពីចំណុចក្រុងប៉ោយប៉ែតរហូតទៅដល់ចំណុចតំបន់១ជាប់នឹងព្រំប្រទល់ស្រុកស្វាយចេក សរុបមានប៉ុស្តិ៍ធំៗចំនួន៩ ហើយក្នុងប៉ុស្តិ៍នីមួយៗទទួលបានវិទ្យុទាក់ទងម៉ាកម៉ូតូរ៉ូឡា ១គ្រឿង និងគ្រឿងឧបភោគបរិភោគមួយចំនួនផងដែរ ។
លោកវរសេនីយ៍ឯក សំ ជិត ស្នងការរងខេត្តបានមានប្រសាសន៍ផ្តាំផ្ញើដល់កងកម្លាំងនគរបាលការពារព្រំដែនទាំងអស់ឱ្យចេះសាមគ្គីគ្នា និងគោរពវិន័យកងកម្លាំងឱ្យបានខ្ជាប់ខ្ជួនជានិច្ចនិងត្រូវយកចិត្តទុកដាក់ធ្វើយ៉ាងណាការពារបូរណភាពទឹកដីកម្ពុជារបស់យើងឱ្យបានគង់វង្សជានិរន្តរ៍តទៅថ្ងៃអនាគតផងដែរ ៕