ថ្ងៃទី 30 ខែកក្កដា ឆ្នាំ2012, ម៉ោង 09:11 AM ឈ ភ
ក្រសួងយុត្តិធម៌គ្រោងបន្ថែមឲ្យមានមុខតំណែងចៅក្រម និងព្រះរាជអាជ្ញាចំនួន៥២នាក់បន្ថែមទៀត នៅតាមតុលាការទូទាំងខេត្តក្រុង នៅដើមខែសីហាខាងមុខនេះ ដើម្បីបំពេញសមត្ថកិច្ចក្នុងដំណើរការរកយុត្តិធម៌ជូនពលរដ្ឋ។ ខណៈសព្វថ្ងៃនេះចៅក្រម និងព្រះរាជអាជ្ញា មានចំនួនសរុប ៤១៥នាក់។
លោក សំ ប្រជាមានិត មន្ត្រីខុទ្ទកាល័យក្រសួងយុត្តិធម៌ មានប្រសាសន៍ថា ចំនួនចៅក្រម និងព្រះរាជអាជ្ញារងដែលនឹងដាក់បន្ថែមនៅតុលាការទូទាំងប្រទេសខាង មុខនេះ នឹងគ្រប់គ្រាន់សំរាប់ពលរដ្ឋខ្មែរជាង ១៤លាននាក់ ដើម្បីធ្វើការឲ្យបានរលូនក្នុងកិច្ចខិតខំប្រឹងប្រែងរកយុត្តិធម៌ ជូនពលរដ្ឋឲ្យបានទាន់ពេលវេលា។
លោកបណ្ឌិត ឡៅ ម៉ុងហៃ អ្នកវិភាគឯករាជ្យ និងជាអ្នកឃ្លាំមើលដំណើរការនីតិរដ្ឋនៅកម្ពុជា បានសាទរចំពោះគម្រោងបន្ថែមចំនួនចៅក្រម និងព្រះរាជអាជ្ញានេះ ហើយលោកក៏បានជំរុញឲ្យមានការបំពាក់មធ្យោបាយផ្សេងៗសម្រាប់កិច្ចការ របស់តុលាការឲ្យកាន់តែមានប្រសិទ្ធភាព។
ក្រសួងការបរទេសសហរដ្ឋអាមេរិក កាលពីថ្ងៃទី២៤ ខែឧសភា ឆ្នាំ២០១២ បានបង្ហាញរបាយការណ៍ប្រចាំឆ្នាំរបស់ខ្លួនថា ប្រាក់ខែរបស់ចៅក្រម និងព្រះរាជអាជ្ញានៅកម្ពុជា មានកម្រិតទាប ចំនួនចៅក្រម និងព្រះរាជអាជ្ញាមានចំនួនតិច ខ្វះការហ្វឹកហ្វឺនជំនាញដល់ចៅក្រម ករណីជាច្រើនកកស្ទះមិនចាត់ការ មានអំពើពុករលួយកម្រិតខ្ពស់ ខ្វះការអនុវត្តតាមនីតិវិធីច្បាប់។ ប្រាក់ខែរបស់ចៅក្រម ព្រះរាជអាជ្ញា និងប្រធានតុលាការត្រូវគេដឹងថា មានចំនួនជាង ២លានរៀល ហើយរីឯអនុប្រធានតុលាការ និងព្រះរាជអាជ្ញារងមាន ១,៨លានរៀល។
លោក បាស៊ីល ហ្វឺណាន់ដូ (Basil Fernando) នាយកប្រតិបត្តិខាងផ្នែកច្បាប់នៃគណៈកម្មការសិទ្ធិមនុស្ស អាស៊ី មានប្រសាសន៍ថា ការបន្ថែមចំនួនចៅក្រម និងព្រះរាជអាជ្ញាជំហានមួយដ៏ល្អ និងត្រឹមត្រូវ ប៉ុន្តែត្រូវធានាឲ្យបានច្បាស់ថា អ្នកទាំងនោះមិនស្ថិតនៅក្រោមការត្រួតត្រារបស់រដ្ឋាភិបាល។
ចំណែកលោកបណ្ឌិត ឡៅ ម៉ុងហៃ មានប្រសាសន៍ថា ដើម្បីឲ្យស្ថាប័នយុត្តិធម៌មួយនេះកាន់តែមានការវិវឌ្ឍន៍ជឿនលឿនទៅ មុខដ៏គួរឲ្យជឿទុកចិត្តពីមហាជននោះ កម្ពុជាគួរអនុម័តច្បាប់ស្តីពីលក្ខន្តិកៈចៅក្រម និងព្រះរាជអាជ្ញាឲ្យបានឆាប់ ដើម្បីធានាឯករាជភាពដល់កិច្ចការរបស់ពួកគេ។
មន្ត្រីជាន់ខ្ពស់របស់រដ្ឋាភិបាលឲ្យដឹងថា ក្រសួងយុត្តិធម៌បានបញ្ជូនសេចក្ដីព្រាងច្បាប់ចំនួនបីដែលនៅសេសសល់ គឺច្បាប់ស្ដីពីការរៀបចំ និងការប្រព្រឹត្តទៅនៃប្រព័ន្ធតុលាការ ច្បាប់ស្ដីពីលក្ខន្តិកៈចៅក្រម និងព្រះរាជអាជ្ញា និងច្បាប់ស្ដីពីវិសោធនកម្មច្បាប់ឧត្ដមក្រុមប្រឹក្សានៃអង្គចៅក្រម នោះ ដាក់ទៅទីស្ដីការគណៈរដ្ឋមន្ត្រីដើម្បីជជែករួចពិភាក្សាហើយ៕
( Agkor thom)