ភ្នំពេញ: អស់រយៈពេលជាច្រើនថ្ងៃមកហើយដែលក្រុមកម្មករ នៅរោងចក្រកាត់ដេរ តាយ យ៉ាង នាំគ្នាធ្វើកូដកម្មទាមទារប្រាក់អត្តប្រយោជន៍ការងារ ចំនួន ៥ ចំណុច មានជាអាទិ៍ ថ្លៃចំណាយលើការធ្វើដំណើរ និងការស្នាក់នៅ ១០ ដុល្លារ ថ្លៃទឹកដោះគោកូន ចំនួន ១០ ដុល្លារ
និងប្រាក់រង្វាន់ការងារទៀងទាត់ចំនួន ១១ ដុល្លារ ជាដើម តែពុំមានដំណោះស្រាយសោះ ។ ទើបតែ មកដល់រសៀលថ្ងៃទី៣កក្កដា ឆ្នាំ២០១២ កញ្ញា យ៉ាង សុភ័ណ្ឌ ប្រធានសម្ព័ន្ធសហជីពកម្ពុជា ដែលចូលរួមដឹកនាំកម្មករតវ៉ានោះ បានឲ្យដឹងថា ការចរចារវាងសហជីពតំណាងកម្មករ ភាគីថៅកែរោងចក្រ និងអាជ្ញាធរនៅមន្ទីរការងារខេត្តកណ្តាល បានសម្រេចតាមសំណើរបស់កម្មករជាង ៣.០០០ នាក់ នៅរោងចក្រកាត់ដេរ តាយ យ៉ាងនោះ ហើយ។
នៅរសៀលនេះដែរ ក៏មានពាក្យចចាមអារ៉ាមថាលោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ និងជាប្រធានសហភាពសហជីពកម្ពុជា ដែលចូលរួមដឹកនាំកម្មករតវ៉ា នៅក្រៅរោងចក្រកាត់ដេរ តាយ យ៉ាង ( Tai Yang ) នៅខាងក្រោយផ្សារបែកចាយ ក្នុងស្រុកអង្គស្នួល ខេត្តកណ្តាលនោះត្រូវបានចាប់ខ្លួន ប៉ុន្តែលោក រ៉ុង ឈុនបានបដិសេធថាមិនមានការចាប់ខ្លួនលោកទេ៕agor thom