កម្មការិនី​រងគ្រោះ​ទាមទារ​​ឲ្យ​តុលាការ​ខេត្ត ស្វាយរៀង​ពន្លឿនកាត់​ទោស​​ ឈូក បណ្ឌិត​

សៅរ៍ 21 កក្តដា 2012 - 8:34 am កម្មការិនី​​រងគ្រោះ​​ពីការ ​បាញ់​ប៉ងប្រហារ​​នៅ​ក្នុង​ព្រឹត្តិការណ៏​​​មួយ​​កាល​ពី​ខែ ឧសភា  ម្សិលមិញ​បាន​ធ្វើ​ការ​ទាមទារ​​យ៉ាង​ទទូច​ ​ឲ្យ​តុលាការ​​ខេត្ត ស្វាយរៀង​ ពន្លឿន​ការ​កាត់ទោស​​ជន​ដៃ​ដល់​ ដែល​កំពង់​រស់​ប្រកប​​ដោយសេរីភាព ​ក្រៅ​ការ​ឃុំឃាំង​។

កម្មការិនីមួយ រូប ក្នុងចំណោម បីរូប កំពុងសម្រាកព្យាបាលមុខរបួស បន្ទាប់ពីទទួល រងការបាញ់ភ្លាមៗ កាល ពី ខែ ឧសភា

ប៊ុត ចិន្តា កម្មការិនី​មួយ​រូប​​ក្នុង​ចំណោម​បី​រូប ​​ដែល​ទទួល​រង​ការ​បាញ់ប៉ងប្រហារ​​ពីអតីត​ចៅ​ហ្វាយ​ក្រុង​​បាវ៉ិត​​ឈ្មោះ​ ឈូក បណ្ឌិត បាន​ថ្លែង​ប្រាប់​ក្រុម​អ្នករាយការណ៏ព័ត៌​មាន​​កាល​ពី​ថ្ងៃសុក្រ​ម្សិលមិញ​​ អំឡុង​ការ​សាកសួរ​ដោយ​តុលាការ​​​ជា​លើក​ទី​បី​ថា ការ​សាកសួរ​​ពុំ​មានអ្វី​ខុស​ពី​​ពីរ​​លើក​មុនទេ , ប៉ុន្តែ​អ្វី​ដែល​នាង​​ចង់​បាន​​នោះ​ គឺ​តុលាការ​​ត្រូវ​តែ​ពន្លឿន​​ការ​កាត់ទោស​ជន​ដៃ​ដល់​​​​ដែល​​កំពុង​រស់នៅ​ ក្រៅ​ឃុំ ដែល​នៅតែ​ធ្វើ​​ឲ្យ​ពួកនាង​នៅ​តែ​​មាន​អារម្មណ៏​ភ័យ​ខ្លាច ​។
ឈូក បណ្ឌិត អតីត​ចៅហ្វាយក្រុងបាវ៉ិត ​​​ធ្លាប់​ត្រូវ​បាន​​រដ្ឋមន្រ្តី​ក្រសួងមហាផ្ទៃ​​លោក ស ខេង និយាយ​ថា​ គឺ​ជាជន​​សង្ស័យ​តែ​​ម្នាក់​គត់ ​ដែល​បាន​​បាញ់​ប៉ង​ប្រហារ​​ទៅ​លើ​កម្មការិនី​​បី​នាក់ ​ក្នុង​ព្រឹត្តការណ៏​​បង្រ្កាប​​បាតុកម្ម​មួយ ​នៅ​រោង​ចក្រ កៅវ៉េ ក្នុង​ក្រុង បាវ៉ិត កាលពីថ្ងៃទី២០ ​ខែ ឧសភា ។ ប៉ុន្តែ​បើ​ទោះ​បី​ជា​​មាន​​ភស្តុតាង ​និង សក្ខីកម្មគ្រប់គ្រាន់ ​បញ្ជាក់​ពី​បទ​ល្មើស​របស់ជន​នេះយ៉ាងណា​​ក្ដី​ ក៏​អយ្យការ​អមតុលាការ​ខេត្ត ស្វាយរៀង បាន​ធ្វើ​ការ​ចោទ្រកាន់​​ត្រឹម​បទ​បង្ករ​បួសស្នាម​ដោយ​អចេតនា ដែល​ការ​​នេះ​បាន​ធ្វើ​ឲ្យ​​មាន​ការរិៈគន់​​យ៉ាងខ្លាំងក្លា ពី សាធារណៈមតិ​ជាតិ និង អន្តរជាតិ ៕​