(ដោយ៖អ៊ិន.សាមិត្តប៉ោយប៉ែត)៖ មេខ្យល់នាំពលករឆ្លងដែនម្នាក់ ព្រោះតែងប់ងុលនឹងល្បែងស៊ីសងក្នុងកាស៊ីណូក្រុងប៉ោយប៉ែត ងើបមុខមិនរួច បានធ្លាក់ខ្លួនក្លាយជាជនឆបោកយកលុយពីក្រុមពលករខ្មែរ ថានាំទៅរកការងារធ្វើនៅក្នុងទឹកដីថៃ បែរជាយកលុយទៅលេងល្បែងស៊ីសង ផឹកស៊ីស្រីញីអូនបងក្នុងកាស៊ីណូ ចាញ់អស់ ទីបញ្ចប់ត្រូវប៉េអឹមចាប់ខ្លួនពីបទ( ឆបោក និងនាំមនុស្សឆ្លងដែនទៅប្រទេសថៃដោយខុសច្បាប់) កាលពីថ្ងៃទី ១៨ ខែកក្កដា ឆ្នាំ ២០១២ វេលាម៉ោង១០.៣០នាទីថ្ងៃត្រង់ នៅចំណុច រង្វង់មូល មាត់ច្រកទ្វារ អន្តរជាតិប៉ោយប៉ែត ។ លោក ហម ម៉ុត មេបញ្ជាការកងរាជអាវុធហត្ថក្រុងប៉ោយប៉ែតបានប្រាប់ថា ជនសង្ស័យជាមេខ្យល់ មានឈ្មោះ មឺ សេងហ៊ ភេទប្រុសអាយុ ៤៦ឆ្នាំ មានស្រុកកំណើត នៅក្រុងភ្នំពេញ ។ មុននឹង ឈានដល់ការឃាត់ ខ្លួនជនសង្ស័យខាងលើនេះ ជនសង្ស័យបាននាំពលករ ចំនួនបួននាក់ មានស្រីបីនាក់ និងប្រុសម្នាក់ ដោយនាំមកពីភូមិ ក្រសាំង ឃុំចំប៉ី ស្រុកអង្គរជ័យ ខេត្តកំពត ដើម្បីនាំទៅ ប្រទេសថៃ ធ្វើការងារនៅក្នុងរោងចក្រទីក្រុងបាងកក ។លោក ហម ម៉ុត បន្តទៀតថា នៅពេលដែលពួកគេមកដល់ក្រុងប៉ោយប៉ែត មេខ្យល់បានទាលុយ ពីក្រុមកូនខ្យល់មុន ចំនួន១៥០០បាត(ប្រាក់ថៃ) និងលុយដុល្លារ ២០ដុល្លារ ថាយកទៅធ្វើឯកសារ ឆ្លងដែន ។ ក្រោយពីបានលុយដល់ដៃហើយ ឈ្មោះ មឺ សេងហ៊ បានយកលុយទាំងនោះទៅលេងល្បែងក្នុងកាស៊ីណូចាញ់អស់លុយ គ្មានសល់ទើបព្រឹកឡើង គេបានមកទាលុយ ពីកូនខ្យល់បន្ថែមទៀត ។ដោយមានការសង្ស័យក្រុមកូនខ្យល់ទាំងបួននាក់នោះ ពុំព្រមឲ្យបន្ថែមទៀតឡើយ ព្រោះពុំឃើញ មានឯកសារអ្វីមកបង្ហាញក៏កើតជារឿងឈ្លោះប្រកែកគ្នាឡើងតឹងសរសៃ ក ខណៈនោះមានជនរងគ្រោះម្នាក់ដែលជាកូនខ្យល់បានរត់ទៅប្ដឹងប៉េអឹមដែលឈរជើងរក្សាសណ្ដាប់ធ្នាប់ នៅក្បែរកន្លែង កើតហេតុ ហើយក៏ឃាត់ខ្លួន ជនសង្ស័យ មកសួរនាំនៅទីបញ្ជាការប៉េអឹម ក្រុងប៉ោយប៉ែត តែម្ដង ។
ឆ្លើយចំពោះមុខសមត្ថកិច្ច ឈ្មោះមឺ សេងហ៊ បានសារភាពថា ខ្លួនពិតជាបានប្រព្រឹត្តដូចជា ការរៀបរាប់ខាងលើពិតប្រាកដមែនដោយសារខ្លួនញៀន នឹងល្បែងស៊ីសង ក្នុងកាស៊ីណូក្រុងប៉ោយប៉ែត រូបគេក៏បានផ្ដាំផ្ញើទៅជនញៀនល្បែង មួយចំនួនទៀតដែលកំពុងតែធ្លាក់ខ្លួនជាទាសករ ល្បែងក្នុងកាស៊ីណូ សូមមេត្តាភ្ញាក់រលឹកឡើង បើមិនដូច្នោះទេលទ្ធផល គឺអាចជាប់គុកដូចជារូបគេមិនខានឡើយ ។ ផ្អែកតាមចម្លើយសារភាពជនសង្ស័យត្រូវសមត្ថកិច្ចចោទប្រកាន់ពីបទ(នាំមនុស្សឆ្លងដែនខុសច្បាប់ និងបទឆបោក )ហើយកសាងសំណុំរឿងបញ្ជូនទៅកាន់ទីបញ្ជាការកងរាជអាវុធហត្ថ ខេត្តបន្ទាយមានជ័យ ដើម្បីចាត់ការ តាមនីតិវិធី ៕
