ដោយ៖អ៊ិន សាមិត្ត ប៉ោយប៉ែត ៖ មន្ត្រីសាធារណការកម្ពុជា និងថៃ រួមគ្នាបើកសម្ពោធជាផ្លូវការ ដើម្បីអនុវត្តអនុស្សរណៈ នៃការយោគយល់គ្នា រវាងប្រទេសទាំង២ គឺកម្ពុជា-ថៃ ក្នុងគោលបំណងផ្លាស់ប្ដូរ សិទ្ធិ ធ្វើចរាចរណ៍ ដឹកជញ្ជូនឆ្លងកាត់ព្រំដែន ទៅវិញទៅមក តាមច្រកទ្វារអន្តរជាតិប៉ោយប៉ែត។
នៅក្នុងពិធីនោះ គេបានសង្កេតឃើញខាងកម្ពុជា ចូលរួមជាអធិបតី ពីសំណាក់លោករដ្ឋមន្ត្រីក្រសួងសាធារណការ និង ដឹកជញ្ជូនកម្ពុជា អមដោយមន្ត្រីរាជការជាច្រើននាក់ទៀត ឯខាងថៃ ក៏ដូចគ្នាដែរ។ នៅក្នុងខ្លឹមសារមួយចំនួន ក៏បានសំណូមពរឲ្យភាគីបើកបររថយន្ត ដឹកភ្ញៀវទេសចរណ៍ និង ដឹកទំនិញ ទាំងពីរប្រទេស រួមគ្នាឲ្យបានល្អ ដើម្បីបញ្ចៀសគ្រោះថ្នាក់ចរាចរណ៍។ លោក ត្រាំង អ៊ីវតឹក រដ្ឋមន្ត្រីក្រសួងសាធារណការ បានបញ្ជាក់ថា គម្រោងអនុវត្តលើអនុស្សរណៈនេះ គឺមានយូរណាស់មកហើយ តែខកខានបួនឆ្នាំកន្លងមកនេះ ទើបតែក្នុងថ្ងៃទី១៤ខែមិថុនា ឆ្នាំ២០១២នេះ យើងក៏បានសម្រេចរួមការអនុវត្តអនុស្សរណៈនេះ។ លោកបានបន្តទៀតថា ចាប់ពីពេលនេះទៅ ខាងកម្ពុជា មានរថយន្ត ខ្នាតធំ ចំនួន៤០គ្រឿង សម្រាប់ដឹកភ្ញៀវ និង ដឹកទំនិញ ចេញពីកម្ពុជាទៅថៃ ឯថៃក៏មាន៤០គ្រឿង ដូចគ្នាផងដែរ សម្រាប់ដឹកភ្ញៀវចេញពីថៃមកកម្ពុជា។ កម្ពុជាមានរថយន្តក្រុងសម្រាប់ដឹកភ្ញៀវចំនួន៣០គ្រឿង និង រថយន្តដឹកទំនិញ ធំៗ ចំនួន១០គ្រឿង ឯខាងថៃ មានរថយន្តដឹកភ្ញៀវចំនួន១០គ្រឿង រថយន្តដឹកទំនិញចំនួន៣០គ្រឿង។ រដ្ឋមន្ត្រីសាធារណការ ទាំង២ប្រទេសក៏បានសំណូមពរដល់ក្រុមហ៊ុន ដឹកជញ្ជូនភ្ញៀវទាំងអស់មេត្តារួសរាន់ ទៅធ្វើបែបបទ ទាំងអស់គ្នា ងាយស្រួលដឹកជញ្ជូនភ្ញៀវ ឬដឹកទំនិញទៅមក ឲ្យបានត្រឹមត្រូវទៅតាមការយោគយល់គ្នាលើអនុស្សរណៈនៃប្រទេសទាំង២នោះ៕
