| ថ្ងៃទី 14 ខែមិថុនា ឆ្នាំ2012, ម៉ោង 04:55 PM ហេង សុខា  ហេតុការណ៍នេះ កើតឡើងនៅវេលាម៉ោង២ និង១៥ នាទីរសៀល ថ្ងៃទី១៤ មិថុនា នៅផ្ទះលក់ចាប់ហួយ ជួសជុលម៉ូតូ លក់សាំង ផ្ទះលេខ13A ផ្លូវលេខ 57BT ក្រុម៣ ភូមិត្នោតជ្រុំ សង្កាត់បឹងទំពុន ខណ្ឌមានជ័យ ។ ម្ចាស់ផ្ទះដែលបង្កឲ្យមានការឆាបឆេះនេះ មានប្តីឈ្មោះ សែ ឡាយ អាយុ៤៤ឆ្នាំ និងប្រពន្ធឈ្មោះ ព្រូ សំអាត អាយុ៣០ឆ្នាំ មុខរបរលក់លក់ចាប់ហួយ ជួសជុលម៉ូតូ លក់សាំង ជាផ្ទះជួល ។ តាមសម្តីម្ចាស់ផ្ទះជួលនោះបានឲ្យដឹងថា មុនពេលកើតហេតុ មានម៉ូតូគុបជ្រុង៥០ ពណ៌ទឹកប៊ិច បែកកង់យកទៅប៉ះ ស្របពេលនោះ មានម៉ូតូស្មាសរ៉េវ៉ូ ស៊េរី២០០៧ ពណ៌ខ្មៅ ជិះទៅឈប់ចាក់សាំង ពេលកំពុងតែឈប់បម្រុងនឹងចាក់សាំង ស្រាប់តែកំប៉ុងហ្គាសតូចៗ សំរាប់ទុកលក់ដែលដាក់នៅក្រោមតុដាក់សាំងដបលក់ បានផ្ទុះផាំង បណ្តាលឲ្យឆាបឆេះសាំងដបប្រមាណ១០ដប និងឆេះរាលដាលដល់ម៉ូតូ២ គ្រឿង ដែលនៅជិតនោះ ធ្វើឲ្យម៉ូតូគុបជ្រុង កំពុងតែអ៊ុតនឹងចង្ក្រានភ្លើង ឆេះនៅសល់តែគ្រោងឆ្អឹង ។ ចំណែកម៉ូតូស្មាស ពេលដែលឃើញឆេះហុយទ្រលោមដូច្នេះ ម្ចាស់ម៉ូតូបានបណ្តើរររត់ ទើបម៉ូតូឆេះខូចខាតតែក្បាលខាងមុខ និងឆេះរបស់របរចងព្យួរលក់នៅខាងមុខផ្ទះជ្រុះរាយពេញមុខផ្ទះ ។  ដោយឡែក ស្តី្រម្នាក់ដែលទើបនឹងសម្រាលកូន មានផ្ទះនៅជិតកន្លែងកើតហេតុ ពេលឃើញហេតុការណ៍បែបនេះភ័យស្លន់ស្លោ រហូតសន្លប់បាត់ស្មារតី ៕ ម្ចាស់ម៉ូតូគុបជ្រុង ឈ្មោះ ថាន សិលា ភេទប្រុស អាយុ២២ឆ្នាំ ស្នាក់នៅភូមិសន្សំកុសល៣ ផ្ទះលេខ90B ផ្លូវ 43BT សង្កាត់បឹងទំពុន ខណ្ឌមានជ័យ ។ ចំណែកម្ចាស់ម៉ូតូស្មាសរ៉េវ៉ូ មានឈ្មោះ ប៊ឿយ ទូច ភេទប្រុស អាយុ៤៥ឆ្នាំ ជាបុគ្គលិកអង្គការ ។ ជុំវិញការឆាបឆេះនេះ បណ្តាលឲ្យខូចខាតអស់ម៉ូតូគុបជ្រុង៥០មួយគ្រឿងនៅសល់តែគ្រោងឆ្អឹង ម៉ូតូស្មាសរ៉េវ៉ូ ស៊េរី២០០៧ មួយគ្រឿង របររបមុខផ្ទះមួយចំនួន និងបណ្តាលឲ្យទុសេ្សខ្សែភ្លើងដែលរត់កាត់ពីមុខផ្ទះ ធ្វើឲ្យដាច់ចរន្តអគ្គីសនី ព្រមទាំងធ្វើឲ្យស្ត្រីទើបនឹងសម្រាលកូនម្នាក់ សន្លប់ផងដែរ ៕ |
