ដោយ៖អ៊ិនសាមិត្តប៉ោយប៉ែត ៖ ក្រុមហ៊ុនបេតុងស៊ីម៉ង់ត៍សញ្ញារូបដំរីសាខាប៉ោយប៉ែតដែលមានទីតាំងស្ថិតនៅភូមិគីឡូម៉ែត្រលេខ៤ សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ បច្ចុប្បន្នកំពុងតែរងនូវការរិះគន់ពីប្រជាពលរដ្ឋនៅក្រុងប៉ោយប៉ែត និងអ្នកធ្វើដំណើរតាមផ្លូវជាតិលេខ ៥បាននាំគ្នានិយាយថា ក្រុមហ៊ុនខាងលើកំពុងតែប្រឆាំងនឹងពាក្យស្លោក “ទីក្រុងស្អាត រមណីយដ្ឋានស្អាត សេវាកម្មល្អ” ដែលក្រសួងទេសចរណ៍បានដាក់ឲ្យខេត្តក្រុងអនុវត្ត ប៉ុន្តែពេលពេលនេះក្រុមហ៊ុនបេតុងស៊ីម៉ង់ត៍ដំរីដែលគេស្គាល់ថាជារបស់លោក អ៊ុយ សុភាព តារាទឹកភ្នែកអាណិកជនខ្មែរ-អូស្ត្រាលីបច្ចុប្បន្នជាថៅកែម៉ៅការផ្លូវចាក់បេតុងនៅក្រុងប៉ោយប៉ែត និងជាប្រធានក្រុមហ៊ុនខាងលើនេះមិនបានយកចិត្តទុកដាក់អនុវត្តន៍តាមទេ។ ក្រុមប្រជាពលរដ្ឋ បានបន្តទៀតថា លោក អ៊ុយ សុភាព កន្លងមកធ្លាប់បានបង្ហូរទឹកភ្នែកកណ្តាលមហាជនស្របនឹងសម្តីនិយាយទៅកាន់មហាជនថាមូលហេតុដែលបណ្តាលឲ្យលោកបង្ហូរទឹកភ្នែកនោះគឺមកពីលោកអាណិតដល់ប្រជារាស្ត្រក្រីក្រគ្មានផ្លូវបេតុងដើរដូចពលរដ្ឋនៅប្រទេសអូស្ត្រាលីឡើយក្រោយមកគេបានឃើញសកម្មភាពរបស់លោក អ៊ុយ សុភាព និងអតីតចៅហ្វាយក្រុងប៉ោយប៉ែតឈ្មោះ ទ្រី ណារិន សព្វថ្ងៃឡើងធ្វើជាអភិបាលរងខេត្តបន្ទាយមានជ័យបានបើកការដ្ឋានសម្ពោធ ធ្វើផ្លូវបេតុងជាច្រើនខ្សែក្នុងក្រុងដោយយកលុយពីប្រជាពលរដ្ឋមួយរយភាគរយក្នុងការស្ថាបនានោះ។លុះក្រោយមកទៀតគេបានឃើញលោក អ៊ុយ សុភាព បើកដំណើរការក្រុមហ៊ុនបេតុងស៊ីម៉ង់ត៍ដំរីនៅជាប់ផ្លូវជាតិលេខ ៥ទល់មុខសាលាក្រុងប៉ោយប៉ែតតែម្តងហើយរហូតមកដល់ បច្ចុប្បន្ននេះគេបានឃើញក្រុមហ៊ុនខាងលើនេះដំណើរដោយរលូនប៉ុន្តែអ្វីដែលធ្វើឲ្យពលរដ្ឋរិះគន់នោះគឺក្រុមហ៊ុនបានបង្កផលប៉ះពាល់ដល់បរិស្ថានដូចជាកម្ទេចស៊ីម៉ង់ត៍ធ្លាក់លើដងផ្លូវជាតិអាចម៍ដីហូរពីក្រុមហ៊ុនចូលមកផ្លូវជាដើម។ចំណែកលោក ង៉ោ មេងជ្រួន គណៈអភិបាលក្រុងប៉ោយប់ប៉ែតបានប្រាប់ភ្នាក់ងារយើងថា ក្រុមហ៊ុនខាងលើនេះលោកធ្លាប់បានសរសេរលិខិតអញ្ជើញចំនួនពីរដងមកហើយក្នុងគោលបំណងឲ្យក្រុមហ៊ុនចាក់បេតុងពីផ្លូវជាតិឡើងទៅក្រុមហ៊ុនដើម្បីបង្ការការហូរធ្លាក់អាចម៍ដីមកលើដងផ្លូវប៉ុន្តែការណែនាំរបស់លោកអភិបាលក្រុងមិនទាន់មានប្រសិទ្ធភាពនៅឡើយទេ។លោក ង៉ោ មេងជ្រួន បានបន្តប្រាប់ភ្នាក់ងារយើងបន្ថែមទៀតថា ម្តងនេះបើក្រុមហ៊ុនមួយនេះមិនអនុវត្តតាមគោលការណ៍សាលាក្រុងទេលោកនឹងសុំគោលការណ៍ពីឯកឧត្តមអភិបាលខេត្តដើម្បីបញ្ឈប់ដំណើរការក្រុមហ៊ុនជាបណ្តោះអាសន្នលុះត្រាតែក្រុមហ៊ុនព្រមអនុវត្តតាមសេចក្តីណែនាំរបស់សាលាក្រុងទើបយើងអនុញ្ញាតឲ្យដំណើរការវិញ។ យើងសង្ឃឹមថា លោក អ៊ុយ សុភាព ប្រធានក្រុមហ៊ុនខាងលើក្នុងនាមលោកជាអាណិកជនខ្មែរ-អូស្ត្រាលីនិងមិនបន្តរឹងទទឹងប្រឆាំងជាមួយសេចក្តីណែនាំរបស់សាលាក្រុងតទៅទៀតទេព្រោះលោកក៏ស្រឡាញ់រាស្ត្រក្រីក្ររហូតដល់ហូរទឹកភ្នែកម្តងហើយដែរ៕
